គណៈកម្មការរៀបចំការបោះឆ្នោតរបស់ប្រទេសម៉ាឡេស៊ីបានបញ្ជាក់កាលពីថ្ងៃព្រហស្បតិ៍ថា ប្រទេសម៉ាឡេស៊ីនឹងរៀបចំការបោះឆ្នោតថ្នាក់ជាតិនៅថ្ងៃទី ១៩ ខែវិច្ឆិកាខាងមុខនេះ ដែលនេះគឺជាការបោះឆ្នោតមួយដែលគណបក្សគ្រប់គ្រងអំណាចដែលពោរពេញដោយរឿងអាស្រូវពុករលួយ សង្ឃឹមថានឹងអាចពង្រឹងការគ្រប់គ្រងអំណាចរបស់ខ្លួនជាបន្តទៀត។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
គណបក្ស United Malays National Organization (UMNO) ដែលជាគណបក្សកាន់អំណាច អាចមានប្រៀបនៅក្នុងការបោះឆ្នោតនេះ ខណៈដែលគណបក្សប្រឆាំងកំពុងស្ថិតក្នុងភាពច្របូកច្របល់ ហើយចំនួនអ្នកចេញទៅបោះឆ្នោតត្រូវគេរំពឹងថាអាចមានចំនួនតិច ដោយសារតែអ្នកបោះឆ្នោតមិនសូវមានការចាប់អារម្មណ៍ខ្លាំងនិងដោយសារតែការបោះឆ្នោតនេះធ្វើឡើងចំរដូវមូសុង។ នេះបើតាមការបញ្ជាក់របស់អ្នកវិភាគនានា។
ក្រុមអ្នកបោះឆ្នោតដែលមាននិន្នាការទៅរកគណបក្សកាន់អំណាច UMNO អាចបោះឆ្នោតគាំទ្រគណបក្សនេះ នៅក្នុងពេលដែលស្ថានភាពសេដ្ឋកិច្ចបច្ចុប្បន្នរបស់ប្រទេសម៉ាឡេស៊ីមានភាពស្រពិចស្រពិល។
គណបក្ស UMNO បានចាញ់ការបោះឆ្នោតកាលពីឆ្នាំ ២០១៨ ដោយសាររឿងអាស្រូវពុករលួយក្នុងទឹកប្រាក់រាប់ពាន់លានដុល្លារអាមេរិកពាក់ព័ន្ធនឹងក្រុមហ៊ុន 1MDB របស់រដ្ឋ ដែលបានធ្វើឱ្យអតីតនាយករដ្ឋមន្ត្រីម៉ាឡេស៊ីលោក Najib Razak ជាប់ពន្ធនាគារ។
បេក្ខជនឈរឈ្មោះជាសមាជិករដ្ឋសភាតម្រូវឱ្យដាក់ពាក្យឈរឈ្មោះបោះឆ្នោតរបស់ខ្លួនជូនគណៈកម្មការរៀបចំការបោះឆ្នោតនៅថ្ងៃទី ៥ ខែវិច្ឆិកាខាងមុខនេះ។ នេះបើតាមការបញ្ជាក់របស់ប្រធានគណៈកម្មការរៀបចំការបោះឆ្នោតម៉ាឡេស៊ីលោក Abdul Ghani Salleh នៅក្នុងសន្និសីទកាសែតកាលពីថ្ងៃព្រហស្បតិ៍។
យុទ្ធនាការឃោសនាបោះឆ្នោតនឹងធ្វើឡើងរយៈពេល ២ សប្តាហ៍។
ពលរដ្ឋម៉ាឡេស៊ីប្រមាណ ២១ លាននាក់មានសិទ្ធិបោះឆ្នោតនៅឆ្នាំនេះ ដើម្បីជ្រើសរើសសមាជិករដ្ឋសភាចំនួន ២២២ នាក់។
គណបក្សឬសម្ព័ន្ធភាពគណបក្សណាមួយដែលឈ្នះសំឡេងភាគច្រើនលើស ៥០% គឺចំនួន ១១២ អាសនៈ គឺជាគណបក្សដែលនឹងមានសិទ្ធិបង្កើតរដ្ឋាភិបាលថ្មីនៅក្រោយការបោះឆ្នោតនេះ៕
