ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​ប្រឹក្សា​សន្តិសុខ​អង្គការ​សហប្រជាជាតិ​អនុម័ត​សេចក្ដី​សម្រេច​ដាក់​ទណ្ឌកម្ម​ថ្មី​បន្ថែម​លើ​កូរ៉េ​ខាង​ជើង


លោក​ Rex Tillerson រដ្ឋមន្រ្តី​ការបរទេស​អាមេរិក​ដើរជាមួយ​លោក​ Bobby Bell អនុប្រធានរដ្ឋបាល​នៃគណៈកម្មការ​អនុស្សាវរីយ៍សមរភូមិអាមេរិក ក្នុង​ទស្សនកិច្ច​របស់លោក​នៅ​រដ្ឋធានី​ម៉ានីល​ប្រទេស​ហ្វីលីពីន​កាលពីថ្ងៃទី០៦ សីហា ២០១៧។
លោក​ Rex Tillerson រដ្ឋមន្រ្តី​ការបរទេស​អាមេរិក​ដើរជាមួយ​លោក​ Bobby Bell អនុប្រធានរដ្ឋបាល​នៃគណៈកម្មការ​អនុស្សាវរីយ៍សមរភូមិអាមេរិក ក្នុង​ទស្សនកិច្ច​របស់លោក​នៅ​រដ្ឋធានី​ម៉ានីល​ប្រទេស​ហ្វីលីពីន​កាលពីថ្ងៃទី០៦ សីហា ២០១៧។

កាល​ពី​ថ្ងៃ​សៅរ៍​ម្សិលមិញ ក្រុម​ប្រឹក្សា​សន្តិសុខ​អង្គការ​សហប្រជាជាតិ​បាន​បោះឆ្នោត​ជា​ឯកច្ឆន្ទ​ដើម្បី​អនុម័ត​នូវ​សេចក្ដី​សម្រេច​មួយ ដែល​ជំរុញ​ឡើង​ដោយ​សហរដ្ឋ​អាមេរិក ក្នុង​គោល​បំណង​ដកហូត​នូវ​ប្រាក់​ចំណូល​ដែល​ជួយ​បង្កើន​នូវ​កម្មវិធី​នុយក្លេអ៊ែរ និង​គ្រាប់​ផ្លោង​មីស៊ីល​ខុស​ច្បាប់​របស់​ប្រទេស​កូរ៉េ​ខាង​ជើង​ចំនួន ១ ពាន់​លាន​ដុល្លារ​អាមេរិក ក្នុង​មួយ​ឆ្នាំ។

វិធានការ​ដាក់​ទណ្ឌកម្ម​បន្ថែម​នេះ គឺ​ជា​ការ​ឆ្លើយតប​ទៅ​នឹង​ការ​បាញ់​គ្រាប់​ផ្លោង​មីស៊ីល​ឆ្លង​ទ្វីប​របស់​រដ្ឋាភិបាល​ក្រុង​ព្យុងយ៉ាង កាល​ពី​ថ្ងៃ​ទី ៣ និង​ថ្ងៃ​ទី ២៨ ខែ​កក្កដា កន្លង​ទៅ​នេះ ដែល​ការ​បាញ់​គ្រាប់​មីស៊ីល​ទាំង​នោះ បាន​បង្ហាញ​ថា កូរ៉េ​ខាង​ជើង​នា​ពេល​បច្ចុប្បន្ន​នេះ ប្រហែល​ជា​អាច​មាន​សមត្ថភាព​វាយ​ប្រហារ​ដែនដី​សហរដ្ឋ​អាមេរិក និង​ភាគ​ច្រើន​នៃ​ដែនដី​នៅ​ទ្វីប​អឺរ៉ុប​បាន។

សេចក្ដី​សម្រេច​នេះ​បដិសេធ​ប្រាក់​ចំណូល​របស់​កូរ៉េ​ខាង​ជើង​ចំនួន ១ ភាគ ៣ នៃ​ប្រាក់​ចំណូល​ប្រចាំ​ឆ្នាំ​របស់​ប្រទេស​នេះ​ចំនួន ៣ ពាន់​លាន​ដុល្លារ​អាមេរិក ដែល​ទទួល​បាន​ពី​ការ​នាំ​ចេញ។ សេចក្ដី​សម្រេច​នេះ​សំដៅ​ដល់​ការ​នាំ​ចេញ​ចំនួន ៤ ផ្នែក គឺ​ធ្យូង​ថ្ម ដែក និង​រ៉ែ​ដែក សំណ និង​រ៉ែ​សំណ និង​អាហារ​សមុទ្រ។

ប្រធានាធិបតី​សហរដ្ឋ​អាមេរិក​លោក Donald Trump បាន​និយាយ​ថា លោក​សាទរ​ចំពោះ​កិច្ច​សហប្រតិបត្តិការ​របស់​ចិន និង​រុស្ស៊ី នៅ​ក្នុង​ការ​ធ្វើ​ឲ្យ​សេចក្ដី​សម្រេច​នេះ​លេច​ចេញ​ជា​រូប​រាង​ឡើង។ សេចក្ដី​ប្រកាស​របស់​សេតវិមាន​បាន​បន្ថែម​ថា លោក Trump នឹង​បន្ត​ធ្វើ​ការ​ជាមួយ​នឹង​សម្ព័ន្ធមិត្ត និង​ដៃគូ​របស់​សហរដ្ឋ​អាមេរិក ដើម្បី​បង្កើន​សម្ពាធ​ការទូត និង​សេដ្ឋកិច្ច​លើ​ប្រទេស​កូរ៉េ​ខាង​ជើង ដើម្បី​បញ្ចប់​នូវ​ឥរិយាបថ​គំរាម​កំហែង និង​បំផ្លិចបំផ្លាញ​របស់​ប្រទេស​នេះ។

នៅ​ក្នុង​សេចក្ដី​សម្រេច​របស់​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ពីរ​លើក​កាល​ពី​ខែ​មិនា និង​វិច្ឆិកា ឆ្នាំ​មុន ក្រុម​ប្រឹក្សា​នេះ​បាន​ដាក់​ទណ្ឌកម្ម​លើ​ការ​នាំ​ចេញ​ធ្យូង​ថ្ម​របស់​ប្រទេស​កូរ៉េ​ខាង​ជើង ដែល​ជា​ការ​នាំ​ចេញ​ដ៏​ធំ​បំផុត​តែ​មួយ​គត់​របស់​ប្រទេស​នេះ៕

XS
SM
MD
LG