ក្រុមប្រឹក្សាសន្តិសុខអង្គការសហប្រជាជាតិបានទាមទារជាឯកច្ឆន្ទកាលពីថ្ងៃសៅរ៍ម្សិលមិញថា គ្រប់ភាគីជម្លោះទាំងអស់នៅក្នុងប្រទេសស៊ីរីត្រូវតែអនុវត្តនូវបទឈប់បាញ់នៅទូទាំងប្រទេសសម្រាប់រយៈពេលយ៉ាងតិច ៣០ ថ្ងៃ និងដកការហ៊ុមព័ទ្ធចេញពីតំបន់មួយចំនួន ដែលក្នុងនោះមានទាំងតំបន់ Ghouta ផងដែរ។
ការឯកភាពគ្នាជារួមរបស់ក្រុមប្រឹក្សាសន្តិសុខអង្គការសហប្រជាជាតិនេះបានធ្វើឡើងក្នុងរយៈពេលប៉ុន្មានថ្ងៃក្រោយមក បន្ទាប់ពីមានការចរចាយ៉ាងតឹងតែងដើម្បីស្វែងរកពាក្យពេចន៍ណាដែលប្រទេសរុស្ស៊ីនឹងគាំទ្រ។ កិច្ចប្រឹងប្រែងដែលដឹកមុខដោយប្រទេសស៊ុយអែត និងកូវ៉ែតដែលជាប្រទេសធ្វើសេចក្ដីព្រាងសេចក្ដីសម្រេចនេះ បានបន្តរហូតដល់ដំណាក់កាលចុងក្រោយមុនពេលការបោះឆ្នោតលើសេចក្ដីសម្រេចនេះបានធ្វើឡើង។
លោក Mansour al-Otaibi ឯកអគ្គរដ្ឋទូតកូវ៉ែតប្រចាំអង្គការសហប្រជាជាតិ បាននិយាយថា៖ «យើងខ្ញុំមានអារម្មណ៍ថា សេចក្ដីសម្រេចនេះមិនអាចបញ្ចប់ការឈឺចាប់បែបមនុស្សធម៌នៅក្នុងប្រទេសស៊ីរីបានភ្លាមៗនោះទេ។ ប៉ុន្តែ វាជាសញ្ញាវិជ្ជមានមួយរបស់ក្រុមប្រឹក្សាសន្តិសុខអង្គការសហប្រជាជាតិ។ ដូច្នេះ ឥឡូវនេះយើងត្រូវតែអនុវត្តសេចក្ដីសម្រេចនេះ»។
សេចក្ដីសម្រេចនេះទាមទារឲ្យភាគីជម្លោះទាំងអស់បញ្ឈប់ជម្លោះ «ដោយមិនបង្អង់យូរឡើយ» សម្រាប់រយៈពេលយ៉ាងតិច ៣០ ថ្ងៃ ជាប់ៗគ្នា ដើម្បីអនុញ្ញាតឲ្យមានការបញ្ជូនជំនួយមនុស្សធម៌ចូលទៅកាន់តំបន់ជម្លោះ និងដើម្បីជម្លៀសអ្នកជំងឺ និងអ្នករងរបួសធ្ងន់ធ្ងរចេញពីតំបន់ជម្លោះ។ សេចក្ដីសម្រេចនេះមិនបានសំដៅលើក្រុមភេរវកម្មនានា ដែលមានទាំងក្រុមជ្រុលនិយមរដ្ឋឥស្លាម និងក្រុមរណសិរ្ស Nusra ឬក៏ក្រុមអាល់កៃដានោះទេ៕
