ក្រុមប្រឹក្សាអង្គការសហប្រជាជាតិកាលពីថ្ងៃពុធបានសម្រេចជាឯកច្ឆន្ទដាក់ពង្រាយក្រុមត្រួតពិនិត្យ៧៥នាក់ទៅទីក្រុងកំពង់ផែ Hodeida របស់យេម៉ែន ដែលជាផ្នែកមួយនៃកិច្ចខំប្រឹងប្រែងដើម្បីរក្សាបទឈប់បាញ់គ្នាដ៏សំខាន់មួយនៅទីនោះ។
សេចក្តីសម្រេចនេះផ្តល់ឲ្យនូវការបង្កើតបេសកកម្មនយោបាយពិសេសមួយសម្រាប់រយៈពេល៦ខែដំបូង។
បេសកកម្មនេះនឹងត្រូវគេស្គាល់ថាជាបេសកកម្មរបស់អង្គការសហប្រជាជាតិដើម្បីគាំទ្រដល់កិច្ចព្រមព្រៀងនៅទីក្រុង Hodeida ឬហៅកាត់ថា UNMHA ហើយនឹងមានការចូលរួមពីក្រុមការងារដឹកនាំដោយឧត្តមសេនីយ៍ទោជនជាតិហូឡង់លោក Patrick Cammaert ដែលត្រូវបានបញ្ជូនទៅទីក្រុងនេះកាលពីខែមុន។
ឯកអគ្គរដ្ឋទូតអង់គ្លេសលោក Karen Pierceជាអ្នកដឹកនាំក្រុមការងារព្រាងសេចក្តីសម្រេចនេះបាននិយាយថា«យើងសង្ឃឹមថាការដាក់ពង្រាយបេសកកម្មដ៏សំខាន់នេះ នឹងអាចជួយយើងឲ្យចាប់ផ្តើមមានការវិវត្តន៍នៅលើដីបាន»។
កាលពីខែមុនប្រតិភូតំណាងឲ្យរដ្ឋាភិបាលរបស់លោកប្រធានាធិបតី Abdu Rabu Mansour Hadi និងក្រុមឧទ្ទាមហ៊ូទីបានជួបប្រជុំគ្នានៅក្រោមការជួយសម្របសម្រួលដោយអង្គការសហប្រជាជាតិនៅជិតទីក្រុង Stockholmប្រទេសស៊ុយអ៊ែតដែលជាកិច្ចចរចាតុមូលជាលើកដំបូងមានបំណងបញ្ចប់ជម្លោះដែលមានរយៈពេលជិត៤ឆ្នាំ
នៅប្រទេសយេម៉ែន។ ភាគីទាំងពីរបានយល់ព្រមលើបទឈប់បាញ់គ្នានៅក្រុង Hodeida ព្រមទាំងយល់ព្រមដាក់ពង្រាយកងទ័ពឡើងវិញនៅតាមតំបន់ខាងក្រៅទីក្រុង។ កិច្ចព្រមព្រៀងនេះក៏បានរួមបញ្ជូលការដោះដូរអ្នកទោសរាប់ពាន់នាក់និងបញ្ចប់ជម្លោះនៅទីក្រុង Taizភាគអាគ្នេយ៍ផងដែរ៕
