ប្រធានអ.ស.ប.ខាងសិទ្ធិមនុស្សអំពាវនាវដល់ប្រជារាស្ត្រលីប៊ីឲ្យពុះពារឧបសគ្គនៃការខ្វែងគំនិតគ្នាខាងនយោបាយដែលបានធ្វើឲ្យប្រទេសនេះមានការបែកបាក់ ហើយរួបរួមគ្នាប្រឆាំងនឹងភាពជ្រុលនិយមនៅក្រោយមានការលាតត្រដាងថា ពួកជនសកម្មប្រយុទ្ធនៃរដ្ឋអ៊ីស្លាមបានកាត់ក្បាលកម្មករអេហ្ស៊ីបកាន់គ្រឹស្តសាសនា២១នាក់នៅទីនោះ។
លោក Zeid Al Hussein អគ្គស្នងការអ.ស.ប.ខាងសិទ្ធិមនុស្សបានសរសេរនៅក្នុងសេចក្តីថ្លែងការណ៍មួយថា៖«ការសម្លាប់យ៉ាងឃោរឃៅនៃពួកជនទាំងនេះនិងការប៉ុនប៉ងយ៉ាងអាក្រក់ក្រៃលែងក្នុងការបង្ហាញថា ការធ្វើឃាតជនទាំងនេះជាការត្រឹមត្រូវនិងលើកតម្កើងការសម្លាប់មនុស្សទាំងនេះនៅក្នុងវីដេអូមួយគួរត្រូវផ្តន្ទាទោសដោយមនុស្សគ្រប់គ្នា...»។
លោកប្រធានាធិបតីអេហ្ស៊ីប Abdel Fattah el-Sissi បានសុំឲ្យអ.ស.ប.នាំមុខគេ ដោយកាលពីថ្ងៃអង្គារលោកបានសុំដល់ក្រុមប្រឹក្សាសន្តិសុខអ.ស.ប.ឲ្យអនុម័តិសេចក្តីសម្រេចចិត្តមួយអំពាវនាវឲ្យមានអន្តរាគមន៍យោធាអន្តរជាតិក្នុងប្រទេសលីប៊ី។
ប្រទេសហ៊្សកដានី (Jordan) បានអំពាវនាវឲ្យមានការប្រជុំគ្រាមានអាសន្នមួយរបស់ក្រុមប្រឹក្សាសន្តិសុខអ.ស.ប.នៅថ្ងៃពុធនេះ៕
