ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធាន​សិទ្ធិ​មនុស្ស​អ.ស.ប. ថ្កោល​ទោស​ចំពោះ​ការ​បង្កាច់​បង្ខូច​អ្នក​រាយការណ៍​ពិសេស​ដោយ​មន្ត្រី​ហ្វីលីពីន


ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​ផ្នែក​សិទ្ធិ​មនុស្ស​ លោក Zeid Ra'ad al Hussein ថ្លែង​នៅ​ក្នុង​សន្និសីទ​ព័ត៌មានក្នុងទីក្រុងហ្ស៊ឺណែវ ប្រទេស​ស្វីស កាល​ពី​ថ្ងៃ​ទី៩ ខែមិនា​ ឆ្នាំ២០១៨។

ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​ផ្នែក​សិទ្ធិ​មនុស្ស​ លោក Zeid Ra'ad al Hussein បាន​និយាយ​ថា​ ក្រុម​ប្រឹក្សា​សិទ្ធិ​មនុស្ស​អង្គការ​សហ​ប្រជាជាតិ​ត្រូវ​តែ​មាន​ជំហរ​រឹងមាំ​ប្រឆាំង​នឹង​អ្វី​ដែល​លោក​ហៅ​ថា​ជា​ការ​ប្រមាណ​ទៅ​លើ​អ្នក​ជំនាញ​ការ​សិទ្ធិ​មនុស្ស​ រួម​មាន​ អ្នក​ស្រី​ Agnes Callamard អ្នក​រាយការណ៍​ពិសេស​ស្ដី​ពី​ការ​សម្លាប់​ក្រៅ​ប្រព័ន្ធ​តុលាការនៅក្នុងប្រទេសហ្វីលីពីន​។ លោក​ Zeid និយាយ​ថា​ការ​និយាយ​ប្រមាណ​បែប​នេះ​ត្រូវ​តែ​បញ្ឈប់។

លោក Zeid Ra’ Ad Al Hussein បានប្រសាសន៍​ថា៖ «នេះ​គឺ​ជា​ការ​អាម៉ាស់​ខ្លាំងណាស់​ ដែល​ប្រធានាធិបតី​នៃ​ប្រទេស​មួយ​អាច​និយាយ​ ដោយ​ប្រើប្រាស់​ភាសា​យ៉ាង​អាក្រក់​បំផុត​បែប​នេះ​ចេញ​មក​រួច មក​លើ​ប្រេសិត​ម្នាក់ ដែល​ជា​មនុស្ស​ដ៏​គួរ​ឲ្យ​គោរព​។ ហើយការណ៍​នេះ​ពិត​ជា​ធ្វើ​ឲ្យ​គេ​ជឿ​ថា​ ប្រធានាធិបតី​ហ្វីលីពីន​ចាំ​បាច់​ត្រូវ​តែ​ទៅ​ជួប​គ្រូពេទ្យ​ចិត្តសាស្រ្ត​ដើម្បី​ឲ្យ​គេ​ធ្វើ​រោគវិនិច្ឆ័យលើរូបលោក»។​

លោក​ Duterte​ បាន​វាយ​ប្រហារ​តាម​រយៈ​ពាក្យ​សម្ដី​ទៅ​លើ​អ្នកស្រី​ Agnes Callamard ចំពោះ​ការ លើក​ឡើង​ពី​ការ​ព្រួយ​បារម្ភ​របស់​អ្នកស្រី​ ទៅ​លើ​ការ​សម្លាប់​ជន​សង្ស័យ​ជា​ច្រើន​ពាន់​នាក់​ នៅ​ក្នុង​សង្គ្រាម​ប្រឆាំង​គ្រឿង​ញៀន​របស់លោក​ Duterte។

អង្គការ​ឃ្លាំ​មើល​សិទ្ធិ​មនុស្ស​បាន​ប៉ាន់ប្រមាណ​ថា​ យ៉ាង​ហោច​ណាស់​មាន​ជន​សង្ស័យ​ ៧,០០០​ នាក់​ ដែល​ជា​អ្នក​ប្រើប្រាស់ និង​ជាអ្នក​ជួញដូរ​ថ្នាំ​ញៀន​ ត្រូវ​បាន​សម្លាប់​ចាប់​តាំង​ពី​ថ្ងៃ​ទី​១​ ខែ​កក្កដា​ ឆ្នាំ​២០១៦មក។ លោក Zeid Ra’ Ad Al Hussein ក៏​បាន​រិះគន់​រដ្ឋ​អាជ្ញា​ហ្វីលីពីន​ ចំពោះ​ការ​ចេញ​ញត្តិ​មួយ​កាល​ពី​ខែ​មុន ដោយ​ប្រកាស​ហៅ​អ្នករាយការណ៍​ពិសេស​ស្ដី​ពី​សិទ្ធិ​ជន​ជាតិ​ដើម​ភាគ​តិច​ អ្នកស្រី​ V​ictoria Tauli-Corpus និង​អ្នក​ជំនាញជនជាតិ​ហ្វីលីពីនលើ​ផ្នែក​នេះពីរ​នាក់​ទៀត​ថា​ជាភេវរករ។

លោក Zeid Ra’ Ad Al Hussein បានប្រសាសន៍​ថា៖

«ការណ៍​នេះ​ពិត​ជា​មិន​អាច​ទទួល​យក​បាន​នោះ​ទេ ចំពោះ​អ្នករាយការណ៍​ពិសេស​ម្នាក់ ដែល​តំណាង​ឲ្យ​សហគមន៍​អន្តរជាតិ និង​ជា​អ្នក​មាន​ជំនាញម្នាក់​របស់​ក្រុម​ប្រឹក្សា​សិទ្ធិ​មនុស្ស​ ត្រូវ​ទទួល​នូវ​រង​ទង្វើបែប​នេះនោះ​ ។ »

រដ្ឋ​មន្ត្រី​ការបរទេស​ហ្វីលីពីន​ លោក​ Alan Peter Cayetano បាន​ឆ្លើយ​តប​ទៅ​នឹង​សេចក្ដី​ថ្លែងការណ៍​របស់​លោក​ Zeid Ra’ Ad Al Hussein​ ថា​ជា «​ប្រតិកម្ម​ដែល​មិន​បាន​ថ្លឹងថ្លែង​មួយ»។

លោក​ Zeid Ra’ Ad Al Hussein​ និយាយ​ថា​ លោក​មាន​ការ​ព្រួយ​បារម្ភ​យ៉ាង​ខ្លាំង​ ចំពោះ​ការ​បង្ក្រាប​កាន់​តែ​ខ្លាំងទៅៗ​ និង​ការ​គំរាម​កំហែងដែល​កំពុង​កើនឡើង​ ទៅ​លើបុគ្គល​ និង​ក្រុម​អ្នកប្រឆាំង​នៅ​ក្នុង​ប្រទេស​ហ្វីលីពីន៕

ប្រែ​សម្រួល​ដោយ​ នូវ​ ពៅ​លក្ខិណា

XS
SM
MD
LG