នៅថ្ងៃអាទិត្យនេះ ប្រទេសអូស្ត្រាលី និងបណ្ដាប្រទេសសមាជិកអាស៊ានបានសន្យាបង្កើនចំណងទាក់ទងផ្នែកការពារ ស្របពេលដែលសង្កត់ធ្ងន់ទៅលើសារៈសំខាន់នៃការមិនប្រើកម្លាំងយោធានៅក្នុងសមុទ្រចិនខាងត្បូងដែលមានជម្លោះ។ ការសន្យានេះបានធ្វើឡើងនៅឯកិច្ចប្រជុំអូស្ត្រាលីអាស៊ាន ដែលជាកិច្ចប្រជុំមួយផ្ដោតខ្លាំងលើវិបត្តិ Rohingya។
នៅក្នុងកិច្ចប្រជុំរយៈពេល ៣ ថ្ងៃ នៅក្នុងទីក្រុងស៊ីដនី ប្រទេសអូស្ត្រាលីនេះ មេដឹកនាំមកពីបណ្ដាប្រទេសអាស៊ានទាំងអស់ក៏បានឯកភាពគ្នាលើការសហការឲ្យកាន់តែជិតស្និទ្ធបន្ថែមទៀត ដើម្បីដោះស្រាយការកើនឡើងនៃការគំរាមកំហែងនៃភាពជ្រុលនិយមហិង្សានានា។
ភាពតានតឹងនៅក្នុងសមុទ្រចិនខាងត្បូងនៅតែជាក្ដីបារម្ភដ៏ចម្បងសម្រាប់មេដឹកនាំនានានៅក្នុងតំបន់ដដែល ដោយសារតែរដ្ឋាភិបាលចិននៅតែបន្តសាងសង់កោះសិប្បនិម្មិតនានាសម្រាប់ទីតាំងយោធារបស់ខ្លួន។
ប្រទេសវៀតណាមនៅតែជាប្រទេសដែលជម្នះយ៉ាងស្វិតស្វាញនៅក្នុងជម្លោះនៅសមុទ្រចិនខាងត្បូងនេះដដែល។ រីឯប្រទេសហ្វីលីពីននៅក្រោមការដឹកនាំរបស់លោក Rodrigo Duterte វិញ បានបន្ថយការតវ៉ារបស់ខ្លួន។ កោះតៃវ៉ាន់ ប្រទេសម៉ាឡេស៊ី និងប្រ៊ុយណេក៏មានជម្លោះនៅក្នុងសមុទ្រចិនខាងត្បូងនោះដែរ។
ប្រទេសអូស្ត្រាលី និងអាស៊ានបានបញ្ជាក់ឡើងវិញអំពី «សារៈសំខាន់នៃការរក្សា និងជំរុញឲ្យមានសន្តិភាព ស្ថិរភាព សុវត្ថិភាព និងសន្តិសុខដែនសមុទ្រ សេរីភាពនៃការធ្វើនាវាចរណ៍ និងហោះហើរនៅក្នុងតំបន់សមុទ្រចិនខាងត្បូង» ដោយមិនបានលើកឡើងពីរដ្ឋាភិបាលក្រុងប៉េកាំងនោះទេ។
មេដឹកនាំទាំងនោះក៏បានបន្ថែមទៀតថា ពួកគេចង់ឃើញ «ការសម្រេចឲ្យបានឆាប់នូវក្រមប្រតិបត្តិដ៏មានប្រសិទ្ធភាពមួយនៅក្នុងសមុទ្រចិនខាងត្បូង»៕
