របាយការណ៍អ.ស.ប.ឲ្យដឹងថា អម្បូររុក្ខជាតិនិងសត្វចំនួន១លានកំពុងរងគ្រោះនៃ ការផុតពូជដោយសារតែទង្វើរបស់មនុស្ស ហើយចំនួនជាច្រើននឹងផុតពូជក្នុងរយៈពេលប៉ុន្មានទសវត្សរ៍ទៀតនេះ។
របាយការណ៍ចេញផ្សាយកាលពីថ្ងៃចន្ទ ដែលកើតចេញពីការស្រាវជ្រាវរបស់ក្រុមអ្នកស្រាវជ្រាវចំនួន ៤៥០ នាក់ មកពីប្រទេសជាង ១០ បានព្រមានថា ការផុតពូជដែលរងការគំរាមដ៏ធំធេងនេះគឺជាបញ្ហាដែលមិនធ្លាប់កើតមានពីមុនទេ ក្នុងប្រវត្តិសាស្ត្រមនុស្សជាតិ។ ធម្មជាតិកំពុងតែថមថយជាសាកលក្នុងកម្រិតមិនធ្លាប់មានពីមុន។
ក្រុមអ្នកវិទ្យាសាស្ត្រនិយាយថា អម្បូរទាំងនេះ នឹងផុតពូជក្នុងល្បឿនលឿនរាប់រយដង ជាងកម្រិតធម្មតាក្នុងអំឡុងពេល ១០ ឆ្នាំកន្លងទៅ។ នៅពេលបច្ចុប្បន្ននេះមានអម្បូរសត្វ និងរុក្ខជាតិជាង៨លាននៅលើផែនដី។
របាយការណ៍ចំនួន ១៨០០ ទំព័រ ដែលបានចេញផ្សព្វផ្សាយនៅឯវេទិកាវិទ្យាសាស្ត្រអន្តររដ្ឋាភិបាលនិងគោលនយោបាយស្តីពីសេវាកម្ម ជីវៈចម្រុះ និងប្រព័ន្ធអេកូឡូស៊ី ក្នុងទីក្រុងប៉ារីស បាននិយាយថា ការដោះស្រាយបញ្ហានេះត្រូវការកំណែទម្រង់ពិតប្រាកដ៕
