របាយការណ៍របស់អ.ស.ប.ព្រមានថា ភាពក្រីក្រ ការខ្វះខាត និងការបំពានអំណាចរបស់រដ្ឋាភិបាលកំពុងជំរុញឲ្យពលរដ្ឋអាហ្វ្រិកក្មេងៗទៅចូលរួមក្រុមហិង្សាជ្រុលនិយម ដូចជាពួក Boko Haram ក្រុម al-Shabab និងរដ្ឋឥស្លាម។ ការសិក្សាដោយកម្មវិធីអភិវឌ្ឍន៍របស់អ.ស.ប. (UNDP)នេះរកឃើញហេតុផលដែលនាំឲ្យមានការអូសទាញយុវជនទៅចូលរួមជាមួយអង្គការដែលធ្វើសកម្មភាពភេវកម្ម។
ការសិក្សារយៈពេល២ឆ្នាំនេះគឺជាការសិក្សាស្រាវជ្រាវប្រភេទនេះលើកទីមួយហើយវាផ្អែកលើបទសម្ភាសន៍ជាមួយអ្នកស្ម័គ្រចិត្ត៤៩៥នាក់ដែលចូលរួមជាមួយអង្គការជ្រុលនិយម។ ការសិក្សានេះឆ្លុះបញ្ចាំងអំពីការប្រមូលទាហានភេរវកម្ម ការយល់ច្រឡំ គ្រោះថ្នាក់ច្រើនឡើង និងសកម្មភាពដែលអាចកើតមានដើម្បីឲ្យមានការផ្លាស់ប្តូរ។
របាយការណ៍នេះរកឃើញថា ដំណើរឆ្ពោះទៅកាន់ភាពជ្រុលនិយមនៅអាហ្វ្រិកគឺបណ្តាលមកពីការខ្វះខាត ភាពក្រីក្រ ការអភិវឌ្ឍទន់ខ្សោយជាងគេ និងការផាត់ចេញដោយសង្គម។ អង្គការមូលនិធិអភិវឌ្ឍន៍អ.ស.ប.ព្រមានថា ទ្វីបអាហ្វ្រិកងាយរងគ្រោះដោយអំពើហិង្សាជ្រុលនិយមកាន់តែជ្រៅទៅៗ។ អង្គការនេះកត់សម្គាល់ថា ប្រជាជនក្នុងទ្វីបនេះរស់នៅក្រោមបន្ទាប់ភាពក្រីក្រ ហើយយុវជនជាច្រើនប្រឈមនឹងភាពអត់ការងារធ្វើធ្ងន់ធ្ងរ។
លោក Mohamed Yahya អ្នកសម្របសម្រួលកម្មវិធីក្នុងតំបន់របស់កម្មវិធីអភិវឌ្ឍន៍របស់អ.ស.ប. (UNDP) នៅទ្វីបអាហ្វ្រិក និងជាអ្នកឈានមុខគេក្នុងការសរសេររបាយការណ៍នេះ បានប្រាប់ VOA ថា ត្រូវមានដំណោះស្រាយចំពោះបញ្ហានេះ បន្ថែមពីលើវិធានការនានាខាងសន្តិសុខ។
«ជាក់ស្តែង កត្តាសន្តិសុខដើរតួនាទីសំខាន់។ ប៉ុន្តែបញ្ហាសន្តិសុខសំខាន់តែនៅពេលណាដែលក្រុមទាំងនេះគឺអ្នកដែលបានចូលរួមជាមួយក្រុមទាំងនោះ ធ្វើសកម្មភាព ឬចូលរួមក្នុងអំពើភេរវកម្ម ឬអំពើហិង្សាជ្រុលនិយមតែប៉ុណ្ណោះ។ នេះបើតាមមតិរបស់ខ្ញុំ។ ក្នុងករណីជាច្រើន បញ្ហានេះហួសពេល ពីព្រោះគេបានចូលរួមជាមួយក្រុមភេរវកម្មរួចទៅហើយ។ដូច្នេះតើយើងត្រូវធ្វើអ្វីខ្លះ មុនពេលពួកគេចូលរួមជាមួយក្រុមជ្រុលនិយម?»
អ្នកចូលរួមក្នុងការសិក្សានេះបង្ហាញថា ការខកចិត្តអំពីស្ថានភាពជីវភាពរបស់គេ គឺជាកត្តាសំខាន់ជាងកត្តាមនោគមវិជ្ជាសាសនា ពេលគេធ្វើការសម្រេចចិត្តចូលរួមជាមួយក្រុមជ្រុលនិយម។ ការសិក្សានេះរកឃើញថា ការចូលធ្វើទាហានភេរវកម្មនៅអាហ្វ្រិកកើតមានឡើង ភាគច្រើននៅតំបន់ជនបទ ហើយមានការជួបគ្នាទល់មុខ ជាជាងការចូលរួមតាមអ៊ីនធឺណិត ដូចករណីជាច្រើនក្នុងតំបន់ផ្សេងទៀតដែរ។
លោក Yahya នៃកម្មវិធីអភិវឌ្ឍន៍អ.ស.ប.ព្រមានថា ការចុះឈ្មោះទាហានអាហ្រិ្វកក្មេងៗក្នុងអង្គការភេរវកម្ម ទំនងជានឹងកើនឡើង នៅពេលបណ្តាញអ៊ីនធឺណិតជ្រាបចូលសុះសាយក្នុងទ្វីបនេះ។ លោកនិយាយថា គេត្រូវផ្តល់ជម្រើសខាងសេដ្ឋកិច្ចសង្គមប្រសើរឡើងដល់យុវជនក្មេងៗ ដើម្បីទប់ស្កាត់បញ្ហានេះ៕
