ភ្ជាប់​ទៅ​គេហទំព័រ​ទាក់ទង

អ្នក​ជំនាញ​អង្គការ​សហប្រជាជាតិ​នឹង​ស៊ើបអង្កេត​លើ​ការ​រំលោភ​សិទ្ធិ​មនុស្ស​នៅ​ក្នុង​តំបន់ Kasai ប្រទេស​កុងហ្គោ

  • Lisa Schlein

កងកម្លាំង​រក្សា​សន្តិភាព​របស់​អង្គការ​សហប្រជាជាតិ​ធ្វើ​ការ​ដើរ​ត្បាត​នៅ​ក្នុង​ក្រុង Kinshasa សាធារណ​រដ្ឋ​ប្រជាធិបតេយ្យ​កុងហ្គោ កាលពី​ថ្ងៃទី២០ ខែធ្នូ​ ឆ្នាំ២០១៦។

ក្រុម​ប្រឹក្សា​សិទ្ធិ​មនុស្ស​របស់​អង្គការ​សហប្រជាជាតិ​បាន​អនុម័ត​នូវ​សេចក្តី​សម្រេច​មួយ ដើម្បី​ចាប់​ផ្តើម​ការ​ស៊ើបអង្កេត​លើ​ការ​រំលោភ​សិទ្ធិ​មនុស្ស​ដ៏​ធ្ងន់ធ្ងរ នៅ​តំបន់ Kasai ក្នុង​សាធារណរដ្ឋ​ប្រជាធិបតេយ្យ​កុងហ្គោ។

លោក Zeid Ra'ad al-Hussein ឧត្តម​ស្នងការ​ទទួល​បន្ទុក​ផ្នែក​សិទ្ធិ​មនុស្ស​របស់​អង្គការ​សហប្រជាជាតិ បាន​ស្វាគមន៍​ការ​អនុម័ត​សេចក្តី​សម្រេច​នេះ ដោយ​បាន​និយាយ​ថា សេចក្តី​សម្រេច​នេះ​ផ្ញើ​សារ​ដ៏​មុតមាំ​មួយ​ថា សហគមន៍​អន្តរជាតិ​មាន​ភាព​ម៉ឺងម៉ាត់​ក្នុង​ការ​ផ្តន្ទាទោស​អ្នក​ប្រព្រឹត្ត​ឧក្រិដ្ឋកម្ម​នៅ​ក្នុង​តំបន់ Kasai។

ចាប់​តាំង​ពី​ខែ​សីហា​ឆ្នាំ​មុន​មក នៅ​ពេល​ដែល​អំពើ​ហិង្សា​ផ្ទុះ​ឡើង​រវាង​កងកម្លាំង​រដ្ឋាភិបាល និង​កង​ជីវពល​កុលសម្ព័ន្ធ អង្គការ​សហប្រជាជាតិ​បាន​រាយការណ៍​ថា មនុស្ស​ជាង ៣.៣០០ នាក់ ត្រូវ​បាន​សម្លាប់​នៅ​ក្នុង​ខេត្ត​ពីរ​ក្នុង​តំបន់ Kasai ហើយ​មនុស្ស​ប្រមាណ​ជា ១ លាន ៣ សែន​នាក់ បាន​គេច​ចេញ​ពី​ផ្ទះ​សម្បែង​របស់​ខ្លួន​នៅ​ក្នុង​ប្រទេស។

អ្នក​តាមដាន​សិទ្ធិ​មនុស្ស​របស់​អង្គការ​សហប្រជាជាតិ​បាន​កត់ត្រា​ទុក​ជា​ឯកសារ​នូវ​រណ្ដៅ​សាកសព​ធំៗ​ចំនួន ៤២ ដែល​ត្រូវ​បាន​ចោទ​ប្រកាន់​ថា បាន​ជីក​ដោយ​កងទ័ព​កុងហ្គោ។ កង​ជីវពល​កុលសម្ព័ន្ធ Kamuina Nsapu បាន​រង​ការ​ចោទ​ប្រកាន់​ថា​បាន​សម្លាប់​មនុស្ស​រាប់​រយ​នាក់ បំផ្លាញ​ភូមិ​ចំនួន ៤ និង​វាយប្រហារ​ទ្រព្យ​សម្បត្តិ​របស់​ព្រះវិហារ​គ្រិស្ត​សាសនា។

លោកស្រី Liz Throssell អ្នក​នាំ​ពាក្យ​របស់​ឧត្ដម​ស្នងការ​សិទ្ធិ​មនុស្ស​អង្គការ​សហប្រជាជាតិ បាន​ប្រាប់ VOA ថា មនុស្ស​ប្រមាណ ៣០.០០០ នាក់ ក្នុង​តំបន់ Kasai បាន​រត់​ភៀស​ខ្លួន​ទៅ​ប្រទេស​អង់ហ្គោឡា ដែល​ជា​ប្រទេស​ជិត​ខាង ដើម្បី​ស្វែងរក​ការ​ជ្រក​កោន។

លោកស្រី​បាន​និយាយ​ថា៖ «ការិយាល័យ​សិទ្ធិ​មនុស្ស​មាន​ក្រុម​ការងារ​ធ្វើ​ការ​នៅ​ក្នុង​ប្រទេស​អង់ហ្គោឡា។ នៅ​ទី​នោះ ពួកគេ​ប្រមូល​ភស្តុតាង​ពី​មនុស្ស​ម្នា​នានា ដែល​មាន​ការ​តក់ស្លុត​ដោយសារ​ការ​រំលោភ​បំពាន ការ​កាប់​សម្លាប់ និង​ការ​វាយប្រហារ​លើ​ប្រជា​ពលរដ្ឋ​ទូទៅ ដែល​មាន​ទាំង​ប្រុស ទាំង​ស្រី និង​កុមារ គ្រប់​រូប​ភាព​ទាំង​អស់។ កាល​ពី​ពេល​ថ្មីៗ​នេះ លោក​ឧត្តមស្នងការ​បាន​កត់​សម្គាល់​ឃើញ​ថា ស្ថានភាព​ក្នុង​តំបន់ Kasai ដូច​ដែល​យើង​បាន​ដឹង​រួច​មក​ហើយ​ថា​មាន​សភាព​ធ្ងន់ធ្ងរ​ខ្លាំងក្លា​នោះ បាន​ចុះ​ដុនដាប​កាន់​តែ​ខ្លាំង​ជា​ទី​បំផុត ក្នុង​រយៈពេល​ប៉ុន្មាន​ខែ​ចុង​ក្រោយ​នេះ។ ដូច្នេះ​ហើយ បាន​ជា​វា​មាន​សារៈសំខាន់​ណាស់​ក្នុង​ការ​មាន​ការ​ស៊ើបអង្កេត​មួយ​ទៅ​លើ​អ្វី​ដែល​កំពុង​តែ​កើត​មាន​ឡើង​នៅ​ទី​នោះ»។

បន្ទាប់​ពី​មាន​ការ​បោះឆ្នោត​សម្រេច​របស់​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ​កាលពី​ថ្ងៃ​ទី ២៣ ខែ​មិថុនា កន្លង​ទៅ​នេះ អ្នក​តំណាង​សាធារណរដ្ឋ​ប្រជាធិបតេយ្យ​កុងហ្គោ​មួយ​រូប បាន​បង្ហាញ​ពី​ការ​មិន​ពេញ​ចិត្ត ដោយ​បាន​និយាយ​ថា ការ​ស៊ើបអង្កេត​ជា​អន្តរជាតិ​គឺ​មិន​ចាំបាច់​នោះ​ទេ។

ទោះ​ជា​មាន​ប្រតិកម្ម​បែប​នេះ​ក្តី លោកស្រី Liz Throssell បាន​និយាយ​ថា លោក​ឧត្តម​ស្នងការ​សិទ្ធិ​មនុស្ស​អង្គការ​សហប្រជាជាតិ​រំពឹង​ថា អាជ្ញាធរ​កុងហ្គោ​នឹង​សហការ​ពេញលេញ​ជាមួយ​នឹង​ការ​ស៊ើបអង្កេត​នេះ និង​អនុញ្ញាត​ឲ្យ​ក្រុម​អ្នក​ស៊ើប​អង្កេត​មាន​សិទ្ធិ​ចេញ​ចូល​គ្រប់​កន្លែង​ទាំង​អស់ អាច​ប្រើប្រាស់​ឯកសារ​នានា និង​អាច​ជួប​ជាមួយ​នឹង​មនុស្ស​គ្រប់​ប្រភេទ​ទាំង​អស់​ដោយ​គ្មាន​ការ​រឹតត្បិត៕

ប្រែ​សម្រួល​ដោយ ប៊ុន ប៉េងហ៊ុយ

XS
SM
MD
LG