អ្នកជំនាញអង្គការសហប្រជាជាតិផ្នែកការកេងប្រវ័ញ្ច និងការជួយដូរកុមារម្នាក់បានអំពាវនាវឲ្យរដ្ឋាភិបាលឡាវបង្កើនការគាំទ្រផ្នែកសន្តិសុខសង្គមសម្រាប់ជនរងគ្រោះដែលជាកុមារ និងបង្កើនកិច្ចសហប្រតិបត្តិការក្នុងតំបន់ដើម្បីប្រយុទ្ធប្រឆាំងនឹងការជួញដូរកុមារ។
លោកស្រី Maud De Boer-Buquicchio អ្នករាយការណ៍ពិសេសអង្គការសហប្រជាជាតិទទួលបន្ទុកផ្នែកជួញដូរ និងការកេងប្រវ័ញ្ចផ្លូវភេទលើកុមារ បានអំពាវនាវដូចនេះ បន្ទាប់ពីបានធ្វើទស្សនកិច្ចផ្លូវការទៅកាន់ប្រទេសឡាវ ស្របពេលដែលរដ្ឋាភិបាលឡាវចាត់វិធានការផ្លូវច្បាប់ និងយុទ្ធនាការនានាដើម្បីដោះស្រាយបញ្ហារំលោភបំពាន និងការជួញដូរកុមារ។
លោកស្រីបានគាំទ្រវិធានការរបស់ក្រសួងការងារ និងសន្តិសុខសង្គមរបស់ប្រទេសឡាវ ដោយមានការគាំទ្រពីអង្គការ UNICEF និងអង្គការក្រៅរដ្ឋាភិបាលនានា ដើម្បីបង្កើតបណ្ដាញការពារកុមារនៅក្នុងភូមិ និងស្រុកនានា។ ប៉ុន្តែ លោកស្រីបាននិយាយថា បណ្ដាញទាំងនេះនៅរាយប៉ាយ និងពឹងផ្អែកលើអ្នកស្ម័គ្រចិត្តនៅឡើយ។
លោកស្រីបានអំពាវនាវឲ្យមានកិច្ចប្រឹងប្រែងបន្ថែមទៀត នៅក្នុងការកំណត់ និងរារាំងមិនឲ្យមានការកេងប្រវ័ញ្ចផ្លូវភេទកម្រិតខ្ពស់លើក្មេងស្រី និងការកេងប្រវ័ញ្ចកម្លាំងពលកម្មកម្រិតខ្ពស់លើក្មេងប្រុស។
ប្រទេសឡាវនៅតែស្ថិតនៅក្នុងកម្រិតទីពីរនៃបញ្ជីតាមដានរបស់សហរដ្ឋអាមេរិកដែលផ្ដោតលើការតាមដាន និងការប្រយុទ្ធប្រឆាំងការជួញដូរមនុស្ស។ ហើយពេលដែលរដ្ឋាភិបាលឡាវបរាជ័យក្នុងការសម្រេចឲ្យបាននូវកម្រិតអប្បបរមានៃការលុបបំបាត់ការជួញដូរមនុស្សនេះ គេឃើញមានកិច្ចប្រឹងប្រែងសំខាន់ៗនានាកំពុងតែធ្វើឡើងដើម្បីដោះស្រាយបញ្ហានេះ៕
