កាលពីថ្ងៃច័ន្ទ លោក Staffan de Mistura ប្រេសិតអ.ស.ប.បានខិតខំព្យាយាមធ្វើឱ្យកិច្ចចរចាសន្តិភាពនៅក្នុងក្រុងហ្ស៊ឺណែវ (Geneve) ឋិតនៅគង់វង្ស ដែលនៅទីនោះក្រុមអ្នកតំណាងរដ្ឋាភិបាលស៊ីរីនិងក្រុមអ្នកតំណាងក្រុមប្រឆាំងមានវត្តមាន ក៏ប៉ុន្តែមិនទាន់ទាក់ទិនទាំងស្រុងជាមួយនឹងកិច្ចចរចាគ្នាដោយមិនផ្ទាល់នេះទេ។
ក្រុមមន្ត្រីអ.ស.ប.បាននិយាយថា កិច្ចចរចាដែលត្រូវបានកំណត់ធ្វើរវាងប្រេសិតអ.ស.ប.និងគណៈប្រតិភូរដ្ឋាភិបាលស៊ីរីនៅពេលថ្ងៃត្រង់នៅថ្ងៃច័ន្ទត្រូវបានពន្យាពេលលើកទៅធ្វើនៅពេលក្រោយហើយ។
អ្នកនាំពាក្យមា្នក់នៃក្រុមប្រឆាំងធំជាងគេបាននិយាយកាលពីថ្ងៃច័ន្ទថា លោកបានទទួល«ការឆ្លើយតបវិជ្ជមាន»មួយពីលោក de Mistura អំពីការទាមទាររបស់ក្រុមប្រឆាំងដែលសុំឱ្យមានការបញ្ឈប់ការទម្លាក់គ្រាប់បែកនិងអនុញ្ញាតឱ្យមានលំហូរជំនួយមនុស្សធម៌ទៅកាន់តំបន់កាន់កាប់ដោយពួកឧទ្ទាម។
ក៏ប៉ុន្តែក្រុមប្រឆាំងបាននិយាយថា ការបង្កើនអំពើហិង្សាអាចបង្អាក់ដំណើរការដែលមិនមាំទាំហើយនោះ។
លោក Bob Corker សមាជិកព្រឹទ្ធសភាស.រ.អា.និងជាប្រធាននៃគណៈកម្មាធិការខាងទំនាក់ទំនងបរទេសនៃព្រឹទ្ធសភាអាមេរិកាំងបានពិភាក្សាអំពីកិច្ចចរចាសន្តិភាពស៊ីរីជាមួយ VOAកាលពីថ្ងៃច័ន្ទ ដោយលោកបានមានប្រសាសន៍ថា លោកយល់ថាកិច្ចចរចាគ្នានេះបានចាប់ផ្តើមធ្វើពីបញ្ហាពិបាកមួយ។
លោកបាននិយាយថា «ខ្ញុំយល់ថាក្រុមប្រឆាំងខ្លះដែលយើងបានទាក់ទងជាមួយកាលពីសប្តាហ៍មុនបានស្ថិតនៅក្នុងស្ថានភាពពិបាកណាស់។ សំណើខាងមនុស្សធម៌ដែលពួកគេបានសុំឱ្យបំពេញនោះមិនទាន់បានសម្រេចទេ។»
លោកបាននិយាយថា «ខ្ញុំគាំទ្រកិច្ចចរចាខាងការទូតដូចដែលអ្នកឯទៀតគាំទ្រដែរ ក៏ប៉ុន្តែចំណុចសំខាន់ៗនៅពេលនេះបង្ហាញថាក្រុមប្រឆាំងកំពុងមានបញ្ហាពិបាកៗ។»
កងកម្លាំងរដ្ឋាភិបាលស៊ីរីដោយមានជំនួយពីប្រទេសរុស្ស៊ីបានបង្កើនការវាយប្រហារ ហើយកាលពីថ្ងៃច័ន្ទបានបើកធ្វើការវាយលុកមួយនៅខាងជើងក្រុងAleppo។
ក្រុមប្រឆាំងបាននិយាយថាការវាយប្រហារតាមអាកាសដោយរដ្ឋាភិបាលបានសម្លាប់ជនស៊ីវិល៕
