ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទីភ្នាក់ងារ​ផ្នែក​សិទ្ធិ​មនុស្ស​របស់​អ.ស.ប.​អំពាវនាវ​រក​ថវិកា​៣៧៥លាន​៥សែន​ដុល្លារ ដើម្បី​ពង្រឹង​សិទ្ធិ​មនុស្ស​នៅ​ទូទាំង​ពិភពលោក


រូប​ឯកសារ៖ ទាហាន​យាមត្បាត​នៅ​រោងចក្រ​ឥន្ធនៈ Senkata នៅ​ក្នុង​ក្រុង El Alto ប្រទេស​បូលីវី។

កាលពី​ឆ្នាំ​មុន ការិយាល័យ​នេះ​បាន​អំពាវនាវ​រក​ថវិកា​ចំនួន​៣២១លាន​៥សែន​ដុល្លារ​អាមេរិក ប៉ុន្តែ​ទទួល​បាន​ថវិកា​ស្ទើរតែ​មិន​បាន​កណ្តាល​ផង។ ការិយាល័យ​ឧត្តម​ស្នងការ​អង្គការ​សហ​ប្រជាជាតិ​សង្ឃឹម​ថា ការ​អំពាវនាវ​នៅ​ឆ្នាំ​នេះ នឹង​ទទួល​បាន​ការ​គាំទ្រ​ពី​សហគមន៍​អន្តរជាតិ​ប្រសើរ​ជាង​មុន។​​

ការិយាល័យ​ឧត្តមស្នងការ​អង្គការ​សហ​ប្រជាជាតិ​ទទួល​បន្ទុក​ផ្នែក​សិទ្ធិ​មនុស្ស កំពុង​អំពាវនាវ​រក​ថវិកា​ចំនួន​៣៧៥លាន​៥សែន​ដុល្លារ​អាមេរិក ដើម្បី​ជួយ​ទ្រទ្រង់​ដល់​កិច្ចប្រឹងប្រែង​របស់​ខ្លួន​ក្នុង​ការ​លើក​កម្ពស់ និង​ការពារ​សិទ្ធិ​មនុស្ស​នៅ​ក្នុង​ប្រទេស​រាប់សិប​ក្នុង​ពិភពលោក​ នៅ​ពេល​ដែល​មាន​ការ​បំពាន និង​ធ្លាក់​ចុះ​នៃ​សិទ្ធិ​ជា​មូលដ្ឋាន។

សិទ្ធិ​មនុស្ស​ជា​សសរ​ស្តម្ភ​មួយ​ក្នុង​ចំណោម​សសរ​ស្តម្ភ​សំខាន់ៗ​ទាំង​៣​របស់​អង្គការ​សហ​ប្រជាជាតិ ដែល​រួម​មាន សន្តិភាព​និង​សន្តិសុខ សិទ្ធិ​មនុស្ស និង​ការ​អភិវឌ្ឍ។ ប៉ុន្តែ​ការិយាល័យ​ដែល​ជា​ស្ថាប័ន​តាមដាន​ស្ថានភាព​សិទ្ធិ​មនុស្ស​នៅ​ជុំវិញ​ពិភពលោក​នេះ កំពុង​តែ​ខ្វះខាត​ប្រាក់​យ៉ាង​ខ្លាំង។

កាលពី​ឆ្នាំ​មុន ការិយាល័យ​នេះ​បាន​អំពាវនាវ​រក​ថវិកា​ចំនួន​៣២១លាន​៥សែន​ដុល្លារ​អាមេរិក ប៉ុន្តែ​ទទួល​បាន​ថវិកា​ស្ទើរតែ​មិន​បាន​កណ្តាល​ផង។ ការិយាល័យ​ឧត្តម​ស្នងការ​អង្គការ​សហ​ប្រជាជាតិ​សង្ឃឹម​ថា ការ​អំពាវនាវ​នៅ​ឆ្នាំ​នេះ នឹង​ទទួល​បាន​ការ​គាំទ្រ​ពី​សហគមន៍​អន្តរជាតិ​ប្រសើរ​ជាង​មុន។

លោក Jeremy Laurence អ្នក​នាំពាក្យ​របស់​ការិយាល័យ​ឧត្តម​ស្នងការ​សិទ្ធិ​មនុស្ស​និយាយ​ថា មាន​ការងារ​ជាច្រើន​ដែល​ត្រូវ​ធ្វើ​នៅ​ពេល​ខាង​មុខ។ ការងារ​ទាំង​នោះ​រួម​មាន​ការ​តាមដាន​មើល​ការគោរព​តាម​ច្បាប់​សិទ្ធិ​មនុស្ស​ដោយ​ប្រទេស​ជាតិ​នានា ការការពារ​ជន​មាន​ពិការភាព លើក​កម្ពស់​សិទ្ធិ​ស្ត្រី និង​យេនឌ័រ បង្ការ​មិន​ឱ្យ​មាន​ជម្លោះ ការ​ធ្វើ​ទុក្ខបុកម្នេញ និង​ការ​រើសអើង​គ្រប់​ទម្រង់។

លោក Jeremy Laurence បាន​និយាយ​ថា៖

«នៅ​ឆ្នាំ​នេះ យើង​មាន​បំណង​ពង្រឹង​កិច្ចប្រឹងប្រែង​ទៅ​លើ​បញ្ហា​សំខាន់ៗ​ទាំង​៥ ដែល​កំពុង​តែ​មាន​ផលប៉ះពាល់​កាន់តែ​ខ្លាំង​ឡើងៗ​ទៅ​លើ​សិទ្ធិ​មនុស្ស​ដ៏​សំខាន់​មួយ​នេះ។ បញ្ហា​ទាំង​នោះ​រួម​មាន បម្រែបម្រួល​អាកាសធាតុ បច្ចេកវិទ្យា​ឌីជីថល អសមភាព អំពើ​ពុករលួយ និង​ការ​ធ្វើចំណាកស្រុក»។

លោក Laurence បាន​ប្រាប់ VOA ថា កិច្ចការ​ដែល​ត្រូវ​ធ្វើ​នៅ​ឆ្នាំ​នេះ ភាគច្រើន​នឹង​ពាក់ព័ន្ធ​ជាមួយ​នឹង​ទ្វីប​អាហ្វ្រិក។ លោក​និយាយ​ថា ទីភ្នាក់ងារ​របស់​លោក​នឹង​ផ្គត់ផ្គង់​ធនធាន ជំនួយ​បច្ចេកទេស និង​ការគាំទ្រ​ផ្សេងៗ​ទៀត​ដើម្បី​ជួយ​ដល់​តំបន់​ងាយ​រងគ្រោះ ដើម្បី​ធ្វើ​ឱ្យ​ប្រជាជន​នៅ​ទីនោះ​ទទួល​បាន​សិទ្ធិ​មនុស្ស​កាន់​តែ​ប្រសើរ​ឡើង។

លោក Laurence បាន​និយាយ​ថា៖

«នៅ​ឆ្នាំ​នេះ យើង​នឹង​បង្កើត​ការិយាល័យ​ថ្មី​មួយ​នៅ​ក្នុង​ប្រទេស​ស៊ូដង់ ហើយ​យើង​នឹង​ព្យាយាម​ពង្រឹង​កម្មវិធី​របស់​យើង​នៅ​ក្នុង​ប្រទេស​អេត្យូពី។ យើង​ក៏​នឹង​ព្យាយាម​ធ្វើ​យ៉ាង​ណា​ឱ្យ​មាន​អត្ថប្រយោជន៍​សេដ្ឋកិច្ច និង​សង្គមកិច្ច​កាន់​តែ​ច្រើន​ កើត​ចេញ​ពី​ការ​ធ្វើ​អន្តរកាល​នយោបាយ​របស់​ប្រទេស​ទាំង​នោះ។ យើង​ក៏​នឹង​ពង្រីក​ការងារ​របស់​យើង​នៅ​ក្នុង​តំបន់ Sahel រួម​នឹង​ការិយាល័យ​របស់​យើង​នៅ​ប្រទេស​នីហ្សេ​ផងដែរ»។

លោក Laurence និយាយ​ថា នៅ​ទ្វីប​អាមេរិក ការិយាល័យ​ឧត្តម​ស្នងការ​នេះ នឹង​ពង្រឹង​កិច្ចសហការ​បច្ចេកទេស និង​ការការពារ​នៅ​ក្នុង​ប្រទេស​វ៉េណេស៊ុយអេឡា។ លោក​និយាយ​ថា គម្រោង​ធំ​មួយ​ទៀត នឹង​ជួយ​ធ្វើ​ឱ្យ​ស្ថានភាព​ក្នុង​ប្រទេស​បូលីវី​មាន​ភាព​ស្ងប់សុខ។ ប្រទេស​បូលីវី កំពុង​ជួប​ប្រទះ​នូវ​អស្ថិរភាព ដែល​បង្ក​ឡើង​ដោយ​លោក Evo Morales អតីត​ប្រធានាធិបតី ដែល​ត្រូវ​បាន​គេ​បណ្តេញ​ចេញ​ពី​តំណែង។

លោក​និយាយ​ថា មន្ត្រី​សិទ្ធិ​មនុស្ស​នឹង​ព្យាយាម​បង្កើត​នូវ​កិច្ចសន្ទនា​ពិតប្រាកដ​មួយ និង​រួម​បញ្ចូល​គ្រប់​ភាគី​ទាំង​រដ្ឋាភិបាល និង​សង្គម​ស៊ីវិល​ដើម្បី​បញ្ចប់​វិបត្តិ​នេះ៕

តួលេខនៃករណីឆ្លងជំងឺកូវីដ១៩

XS
SM
MD
LG