កងយោធាប្រទេសអ៊ុយក្រែននិយាយថា ទាហាន១១នាក់បានស្លាប់និង៤០នាក់រងរបួស នៅក្នុងការវាយប្រយុទ្ធគ្នានៅភាគខាងកើតប្រទេសអ៊ុយក្រែន ក្នុងពេលកន្លងទៅនេះ ទោះបីជាប្រទេសទាំង៤បានសម្រេចកិច្ចព្រមព្រៀងបទឈប់បាញ់គ្នាមួយកាលពីថ្ងៃព្រហស្បតិ៍ តែមិនទាន់បានចូលជាធរមានក៏ដោយ។
មន្រ្តីយោធានិយាយថា មានការវាយប្រយុទ្ធគ្នាយ៉ាងខ្លាំងជាពិសេសនៅក្នុងតំបន់ Debaltseve ដែលជាមជ្ឈមណ្ឌលដឹកជញ្ចូនដ៏សំខាន់មួយ ដែលមានការវាយប្រយុទ្ធគ្នាយ៉ាងសកម្មក្នុងពេលប៉ុន្មានថ្ងៃកន្លងទៅនេះ។
មេដឹកនាំប្រទេស អ៊ុយក្រែន រុស្ស៊ី អាឡឺម៉ង់ និងបារាំងបានចុះហត្ថលេខាលើកិច្ចព្រមព្រៀងមួយនៅរដ្ឋធានី Minsk នៃប្រទេស Belarus ក្រោយកិច្ចចរចាគ្នាអស់រយៈពេល១៦ម៉ោង ដែលបានប្រកាសអំពីការដកកម្លាំងទ័ពដែលប្រយុទ្ធគ្នានៅក្បែរព្រំដែនរុស្ស៊ី ការដោះដូរអ្នកទោស និងបទឈប់បាញ់គ្នាមួយដែលចាប់ចូលជាធរមាននៅថ្ងៃអាទិត្យខាងមុខ៕
