ពេទ្យព្យាបាលជំងឺវិកលចរិតនិងអ្នកចិត្តសាស្ត្រ៧នាក់មកពីអ៊ុយក្រែនបានឋិតនៅអូស្ត្រាលីជិតបីខែដើម្បីពិនិត្យមើលការព្យាបាលការប៉ះពាល់ផ្លូវចិត្តខ្លាំង ជាពិសេសសម្រាប់ជនភៀសខ្លួននិងការប្រើពេទ្យក្នុងសហគមន៍។
អូស្ត្រាលីបានផ្តល់ទិដ្ឋាការឱ្យជនភៀសខ្លួនប្រមាណ១៣.៧៥០នាក់រៀងរាល់ឆ្នាំ។ កាលពីឆ្នាំ២០២២ រដ្ឋាភិបាលក្រុងកង់បេរ៉ាបានប្រកាសយកជនចំណាកស្រុក១៦.៥០០នាក់ថែមទៀតពីប្រទេសអាហ្វហ្កានីស្ថានរហូតដល់ដំណាច់ឆ្នាំ២០២៦។
អ្នកគាំទ្រនិយាយថាអ៊ុយក្រែនមានប្រពៃណីនៃការអត់ធ្មត់ ជាពិសេសបុរសមិនចង់និយាយអំពីបញ្ហាពួកគេដោយចំហទេ។
ការព្យាបាលជំងឺវិកលចរិតក៏ប្រឈមនឹងការសង្ស័យដែរនៅអ៊ុយក្រែនដោយសារការប្រើវាដោយអតីតសហភាពសូវៀតដើម្បីចោទថាក្រុមប្រឆាំងជាមនុស្សឆ្កួតហើយដាក់គុកពួកគេ។ នៅអ៊ុយក្រែន ការព្យាបាលជំងឺវិកលចរិតមាននៅក្នុងមន្ទីរពេទ្យនិងគ្លីនិក មិនមែននៅក្នុងសហគមន៍ទេ។
តែយ៉ាងណាក៏ដោយ ក៏ការព្យាបាលជំងឺផ្លូវចិត្តបានផ្លាស់ប្តូរដោយមានជំនួយពីភរិយាប្រធានាធិបតីអ៊ុយក្រែនលោកស្រី Olena Zelenska។
លោកវេជ្ជបណ្ឌិត Dmytro Martsenkovskyi ជាពេទ្យជំងឺវិកលចរិតម្នាក់ក្នុងបណ្តាពួកអ្នកព្យាបាលជំងឺវិកលចរិតដែលបានមកពីអ៊ុយក្រែន។ លោកបាននិយាយប្រាប់វីអូអេថាលោកពេញចិត្តនឹងការព្យាបាលរបស់អូស្ត្រាលីដល់អ្នកនៅរស់ពីការប៉ះពាល់ផ្លូវចិត្តខ្លាំង។
«វាជាការលើកទឹកចិត្តខ្លាំងណាស់ដែលឃើញអូស្ត្រាលីជាប្រទេសមួយយកចិត្តទុកដាក់លើសុខភាពផ្លូវចិត្ត។ ការណ៍នេះប្រហែលទាក់ទិននឹងការពិតជាក់ស្តែងដែលជារៀងរាល់ឆ្នាំប្រទេសនេះទទួលយកជនភៀសខ្លួនរាប់ពាន់នាក់ ដែលច្រើននាក់ជាអ្នកនៅរស់ពីសង្គ្រាមនិងការប៉ះពាល់ផ្លូវចិត្តខ្លាំង។ ដូច្នេះ ការថែរក្សាសុខភាពផ្លូវចិត្តដ៏ត្រឹមត្រូវជាយុទ្ធសាស្ត្រជាតិមួយសម្រាប់អូស្ត្រាលី»។
លោក Martsenkovskyi ថ្លែងថាគេត្រូវការឱ្យមានការព្យាបាលជំងឺផ្លូវចិត្តស្រដៀងគ្នានេះនៅប្រទេសលោក។
«ការព្យាបាលស្រដៀងគ្នានេះត្រូវតែមាននៅពេលនេះនៅអ៊ុយក្រែន ជាពិសេសដោយសារមានអំពើហិង្សាខ្លាំងក្លា ជាពិសេសទៅលើប្រជារាស្ត្រស៊ីវិលនៅពេលមានសង្គ្រាមនេះ។ ជាអកុសល យើងមានមនុស្សច្រើននាក់ដែលរងគ្រោះដោយសារហេតុការណ៍ច្រើនទាក់ទិននឹងសង្គ្រាម។ យើងមានមនុស្សច្រើននាក់ដែលបានបាត់បង់មនុស្សជិតដិត ជាញាតិសន្តានឬជាមិត្តភ័ក្តិដោយសារសង្គ្រាមហើយការណ៍នេះមានផលប៉ះពាល់អវិជ្ជមានដល់សុខភាពផ្លូវចិត្តរបស់ពួកគេ»។
ទស្សនកិច្ចនេះបានទទួលប្រាក់ឧបត្ថម្ភពីក្រសួងការបរទេសនិងពាណិជ្ជកម្មអូស្ត្រាលីហើយមានទាក់ទិននឹងការធ្វើការងារជាមួយសេវារដ្ឋ New South Wales សម្រាប់ការព្យាបាលនិងការធ្វើឱ្យមានសុខភាពល្អឡើងវិញអ្នកនៅរស់ពីការធ្វើទារុណកម្មនិងការប៉ះពាល់ផ្លូវចិត្តខ្លាំង។
អ្នកជំនាញអ៊ុយក្រែនទាំងនេះក៏បានជួបដែរជាមួយរដ្ឋមន្ត្រីការបរទេសអូស្ត្រាលីលោកស្រី Penny Wong និងរដ្ឋមន្ត្រីខាងសុខភាពផ្លូវចិត្តនៃរដ្ឋ New South Wales លោកស្រី Rose Jackson។
អូស្ត្រាលីជាប្រទេសមួយក្នុងចំណោមប្រទេសមិនមែនជាសមាជិកអង្គការអូតង់ផ្តល់ជំនួយច្រើនដល់ការប្រឹងប្រែងធ្វើសង្គ្រាមរបស់អ៊ុយក្រែននៅក្រោយការលុកលុយរបស់រុស្ស៊ីកាលពីខែកុម្ភៈ ឆ្នាំ២០២២។ អូស្ត្រាលីបានបញ្ជូនមីស៊ីល រថពាសដែក យានយន្តសម្រាប់ប្រតិបត្តិការពិសេស ឡានដឹកទំនិញធំៗនិងរថយន្តសណ្តោងទៅឱ្យអ៊ុយក្រែន។
រដ្ឋាភិបាល ក្រុងកង់បេរ៉ាក៏បានដាក់ទណ្ឌកម្មលើអ្នកនយោបាយរុស្ស៊ីរាប់រយនាក់មានរួមប្រធានាធិបតីរុស្ស៊ីលោក Vladimir Putin ពួកមេបញ្ជាការយោធានិងពួកអ្នកធុរកិច្ចផងដែរ។ ទាំងនេះជាការដាក់ទណ្ឌកម្មច្រើនបំផុតដែលអូស្ត្រាលីបានដាក់លើប្រទេសមួយទៀត៕
ប្រែសម្រួលដោយលោកឈឹម សុមេធ
