រដ្ឋមន្ត្រីការបរទេសអ៊ុយក្រែនលោក Dmytro Kuleba បានអំពាវនាវសម្ព័ន្ធមិត្តលោកខាងលិចឱ្យបង្កើនការផលិតប្រព័ន្ធការពារប្រទេសដើម្បីធ្វើឱ្យប្រាកដថាកងទ័ពអ៊ុយក្រែនមានអ្វីដែលខ្លួនត្រូវការដើម្បីប្រយុទ្ធនឹងការឈ្លានពានរបស់រុស្ស៊ី។
ថ្លែងមុនជំនួបរបស់រដ្ឋមន្ត្រីការបរទេសអង្គការអូតង់នៅក្នុងទីក្រុងព្រុចសែល លោក Kuleba បាននិយាយថា«មិនមានមូលហេតុដើម្បីជឿថាប្រទេសលោកខាងលិចខ្វះឆន្ទៈនយោបាយ»ដើម្បីពង្រីកសមត្ថភាពការផលិត ក៏ប៉ុន្តែ គឺថាមានការងារបច្ចេកទេសជាច្រើនដែលត្រូវបានធ្វើដើម្បីបំពេញគោលដៅនោះ។
លោក Kuleba បាននិយាយថាវាមិនមែនតែសន្តិសុខរបស់អ៊ុយក្រែនទេដែលស្ថិតក្នុងស្ថានភាពគ្រោះថ្នាក់នៅក្នុងសង្គ្រាមនោះ ក៏ប៉ុន្តែ សន្តិសុខនិងសុវត្ថិភាពនៃតំបន់អឺរ៉ុបអាត្លង់ទិកទាំងមូល។ លោកក៏បាននិយាយដែរថា«គ្មានអ្វីដែលនឹងបញ្ឈប់យើងទេ»នៅពេលដែលអ៊ុយក្រែននៅតែផ្តោតលើគោលដៅដើម្បីធ្វើឱ្យប្រាកដនូវបូរណភាពដែនដីរបស់យើង។
យោធាអ៊ុយក្រែនបាននិយាយនៅថ្ងៃពុធនេះថារុស្ស៊ីបានបាញ់បង្ហោះដ្រូន២១គ្រឿងនិងកាំជ្រួចមីស៊ីល៣គ្រាប់ក្នុងអំឡុងនៃការវាយប្រហាររយៈពេលមួយយប់។
យោធាអ៊ុយក្រែនបាននិយាយទៀតថាប្រព័ន្ធការពារដែនអាកាសអ៊ុយក្រែនបានបាញ់ទម្លាក់ដ្រូន Shahed ដែលផលិតនៅប្រទេសអ៊ីរ៉ង់ចំនួន២១គ្រឿងដែលបានហោះឆ្ពោះទៅកាន់តំបន់ Khmelnitskyi ក្នុងប្រទេសអ៊ុយក្រែនភាគខាងលិច។
កងទ័ពអ៊ុយក្រែនក៏បានបាញ់ទម្លាក់កាំជ្រួចមីស៊ីល៣គ្រាប់ ខណៈដែលកាំជ្រួចមីស៊ីលទី៣មិនបានទៅដល់គោលដៅរបស់ខ្លួន។
មិនមានសេចក្តីរាយការណ៍ពីការខូចខាតឬមនុស្សស្លាប់និងរងរបួសទេ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AFPនិង Reuters
