យោធាអ៊ុយក្រែននិយាយនៅថ្ងៃចន្ទនេះថា រុស្ស៊ីបានវាយប្រហារលើតំបន់រដ្ឋធានីកៀវ ដោយប្រើប្រាស់គ្រាប់មីស៊ីលបាលីស្ទីកចំនួន៨គ្រាប់កាលពីយប់មិញ នៅក្នុងរលកនៃការវាយប្រហារថ្មីៗបំផុតតាមអាកាស ដោយសំដៅលើរដ្ឋធានីកៀវរបស់ប្រទេសនេះ។
កងកម្លាំងការពារដែនអាកាសអ៊ុយក្រែននិយាយថា ប្រព័ន្ធការពារដែនអាកាសរបស់ខ្លួនបានបាញ់ទម្លាក់គ្រាប់មីស៊ីលទាំង៨គ្រាប់របស់រុស្ស៊ីដែលធ្វើការវាយប្រហារនោះ។
អភិបាលក្រុងកៀវលោក Vitali Klitschko និយាយថា មនុស្ស៤នាក់ទទួលការព្យាបាល ដោយសារដោយកម្ទេចកម្ទីគ្រាប់មីស៊ីលដែលត្រូវបាញ់ទម្លាក់នោះធ្លាក់ពីលើអាកាសនៅប៉ែកខាងកើតរដ្ឋធានីកៀវ។ អភិបាលក្រុងរូបនេះក៏បានរាយការណ៍ផងដែរ ពីបំណែកនៃគ្រាប់មីស៊ីលមួយចំនួនដែលធ្លាក់នៅកន្លែងឃ្លាំងសម្ភារៈមួយកន្លែង តែមិនមានការខូចខាតអ្វីឡើយ។
កងទាហានអ៊ុយក្រែននិយាយថា រុស្ស៊ីបានបង្ហោះដ្រូនចំនួន១៨គ្រឿងចេញពីទឹកដី ដែលខ្លួនកាន់កាប់ក្នុងតំបន់ Crimea ហើយប្រព័ន្ធការពារដែនអាកាសអ៊ុយក្រែនបានបាញ់ទម្លាក់ដ្រូនទាំងអស់នោះ នៅតំបន់ភាគខាងត្បូងប្រទេសរបស់ខ្លួន។
ទន្ទឹមនឹងនេះដែរ ប្រធានាធិបតីសហរដ្ឋអាមេរិក លោក Joe Biden នឹងទទួលជួបប្រធានាធិបតីអ៊ុយក្រែនលោក Volodymyr Zelenskyy នៅសេតវិមាននៅថ្ងៃអង្គារស្អែកនេះ ខណៈពេលដែលរដ្ឋបាលសហរដ្ឋអាមេរិក កំពុងជំរុញសភារបស់ខ្លួនឱ្យអនុម័តជំនួយបន្ថែមដល់អ៊ុយក្រែន។
សេតវិមានបាននិយាយនៅក្នុងសេចក្តីថ្លែងការណ៍កាលពីថ្ងៃអាទិត្យថា ទស្សនកិច្ចរបស់ប្រធានាធិបតីអ៊ុយក្រែននេះ គឺក្នុងបំណងបង្ហាញពីការតាំងចិត្តមិនងាករេរបស់សហរដ្ឋអាមេរិក ក្នុងការគាំទ្រដល់ប្រជាជនអ៊ុយក្រែន ដើម្បីការពារប្រឆាំងនឹងការឈ្លានពានដ៏ព្រៃផ្សៃរបស់រុស្ស៊ី។
ខុទ្ទកាល័យរបស់លោកZelenskyy បានបញ្ជាក់ថា លោក Zelenskyy បានទទួលយកការអញ្ជើញរបស់លោក Biden រួចហើយ។ លោកក៏ត្រូវបានអញ្ជើញឱ្យឡើងថ្លែងសុន្ទរកថាក្នុងកិច្ចប្រជុំជាមួយសមាជិកព្រឹទ្ធសភាទាំងអស់ផងដែរ។
លោក Biden បានស្នើដល់សភាអាមេរិកឱ្យអនុម័តកញ្ចប់ជំនួយថវិកា ដែលមានទឹកប្រាក់ចំនួន១១០ពាន់លានដុល្លារអាមេរិក សម្រាប់ប្រទេសអ៊ុយក្រែន អ៊ីស្រាអែល និងសម្រាប់អាទិភាពសន្តិសុខជាតិអាមេរិកដទៃផ្សេងៗទៀត ប៉ុន្តែក្រុមសមាជិកព្រឹទ្ធសភាអាមេរិកខាងគណបក្សសាធារណរដ្ឋកាលពីថ្ងៃពុធកន្លងទៅ បានបោះឆ្នោតប្រឆាំងនឹងសំណើនេះ ដោយនិយាយថា ការផ្លាស់ប្តូរក្នុងព្រំដែនដ៏សំខាន់របស់អាមេរិក មានការចាំបាច់ខ្លាំង៕
ព័ត៌មានខ្លះសម្រាប់សេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAP, AFPនិង Reuters.
