អង្គភាពការពារដែនអាកាសនៅជិតរដ្ឋធានីកៀវនៃប្រទេសអ៊ុយក្រែនបានវាយរុញច្រានការវាយប្រហារតាមអាកាសរបស់រុស្ស៊ីកាលពីថ្ងៃចន្ទ។ នេះបើតាមការបញ្ជាក់របស់មន្ត្រីយោធាអ៊ុយក្រែន។
ការវាយប្រហារតាមអាកាសនេះបានធ្វើឡើងបន្ទាប់ពីរុស្ស៊ីបានវាយប្រហារដោយគ្រាប់ផ្លោងមីស៊ីលកាលពីថ្ងៃអាទិត្យលើរដ្ឋធានីកៀវ។
លោក Serhiy Popkoប្រធានរដ្ឋបាលយោធារដ្ឋធានីកៀវ បានបញ្ជាក់នៅលើតេឡេក្រាមថា៖ «នេះជាការវាយប្រហារដោយគ្រាប់ផ្លោងមីស៊ីលលើកទី ៣ លើរដ្ឋធានីកៀវនៅក្នុងខែសីហានេះ ដោយចន្លោះនៃការវាយប្រហារនីមួយៗមានរយៈពេល ៦ ថ្ងៃ»។
មេបញ្ជាការកងទ័ពជើងអាកាសរបស់អ៊ុយក្រែនលោក Mykola Oleshchuk បាននិយាយថា រុស្ស៊ីបានបាញ់មីស៊ីល ៨ គ្រាប់កាលពីព្រឹកថ្ងៃអាទិត្យ ដែលក្នុងនោះមានមីស៊ីលផ្លោង ៣ គ្រាប់ មីស៊ីលស្វ័យនាំផ្លូវ ៣ គ្រាប់ និងមីស៊ីលបញ្ជាបាញ់យន្តហោះ ២ គ្រាប់។ លោកបាននិយាយទៀតថាអ៊ុយក្រែនបានបាញ់ទម្លាក់មីស៊ីល ៥ គ្រាប់ក្នុងចំណោមនោះ។
នៅក្នុងសុន្ទរកថាកាលពីយប់ថ្ងៃអាទិត្យ ប្រធានាធិបតីអ៊ុយក្រែនលោក Volodymyr Zelenskyyបានសរសើរការខំប្រឹងប្រែងរបស់យោធាអ៊ុយក្រែនដើម្បីរុញច្រានពួកអ្នកវាយប្រហារ។
លោកបាននិយាយថា៖ «ក្នុងរយៈពេលតែមួយថ្ងៃប៉ុណ្ណោះ មានការវាយប្រហាររាប់សិបដង ក៏ប៉ុន្តែ កងពលរបស់យើងធ្វើកិច្ចការគ្រប់បែបយ៉ាងដើម្បីទប់ទល់នឹងការវាយប្រហារទាំងនេះ»៕
វេទិកាបញ្ចេញមតិ