ពួកអ្នកវិភាគនិយាយថាដំណើរទស្សនកិច្ចនៅសប្តាហ៍នេះទៅកាន់រដ្ឋធានីវ៉ាស៊ីនតោនដោយរដ្ឋមន្ត្រីការពារជាតិវៀតណាមលោកPhan Van Giang បង្ហាញពីការជឿនលឿននៅក្នុងកិច្ច សហប្រតិបត្តិការរវាងប្រទេសទាំង២ ថ្វីបើ ការកើនឡើងនូវគំនិតជាតិនិយមវៀតណាមដែលអាចចង្អុលបង្ហាញពីការកើនឡើងនូវមនោសញ្ចេតនាប្រឆាំងនឹងអាមេរិកាំងនៅក្នុងប្រទេសវៀតណាមក៏ដោយ។
អ្នកវិភាគម្នាក់ដែលមានទីតាំងនៅក្នុងសហរដ្ឋអាមេរិកបានប្រាប់វីអូអេកាលពីថ្ងៃព្រហស្បតិ៍ ទី១២ ខែកញ្ញានេះថាដំណើរទស្សនកិច្ចរបស់លោកGiang ជាការចាប់ផ្តើមរបស់រដ្ឋាភិបាលក្រុងហាណូយដើម្បីទិញយន្តហោះយោធាសម្រាប់ដឹកជញ្ជូនពីសហរដ្ឋអាមេរិកនៅឆ្នាំនេះ។
លោក Giang បានជួបជាមួយរដ្ឋមន្ត្រីការពារជាតិសហរដ្ឋអាមេរិកលោក Lloyd Austin នៅឯក្រសួងការពារជាតិអាមេរិកកាលពីថ្ងៃចន្ទ។
កាលពីថ្ងៃទី៩ ខែកុម្ភៈ មេដឹកនាំទាំង២«បានបញ្ជាក់ឡើងវិញពីសារៈសំខាន់នៃភាពជាដៃគូរវាងសហរដ្ឋអាមេរិកនិងវៀតណាម»។ នេះបើតាមសេចក្តីថ្លែងការណ៍របស់ក្រសួងការពារជាតិអាមេរិក ហើយបានកត់សម្គាល់ពីខួប១ឆ្នាំនៃការដំឡើងចំណងទាក់ទងរបស់ប្រទេសទាំង២ទៅដល់ភាពជាដៃគូយុទ្ធសាស្ត្រគ្រប់ជ្រុងជ្រោយដែលជាចំណងទាក់ទងខ្ពស់បំផុតនៅក្នុងឋានានុក្រមការទូតរបស់រដ្ឋាភិបាលក្រុងហាណូយ។
ពួកមេដឹកនាំក៏បានសង្កត់ពីសារៈសំខាន់នៃការធ្វើការជាមួយគ្នាដើម្បីដោះស្រាយផលប៉ះ ពាល់យូរអង្វែងនៃសង្គ្រាមរវាងសហរដ្ឋអាមេរិកនិងវៀតណាម។ លោក Austinបានប្រកាសថាអាមេរិក នឹងផ្តល់ថវិកា៦៥លានដុល្លារក្នុងរយៈពេល៥ឆ្នាំបន្ទាប់ដើម្បីបោសសម្អាតសារធាតុគ្រោះថ្នាក់Dioxin នៅមូលដ្ឋានទ័ពអាកាសBien Hoa ដោយធ្វើចំនួនថវិកាសរុបមកពីក្រសួងការពារជាតិអាមេរិកឡើងទៅដល់២១៥លានដុល្លារ។ មូលដ្ឋានទ័ពអាកាសនោះជាទីកន្លែងស្តុកទុកដ៏ចំបងសម្រាប់សារធាតុពុលគីមី Agent Orange ក្នុងអំឡុងសង្គ្រាមរវាងសហរដ្ឋអាមេរិកនិងវៀតណាមហើយនៅតែមានការគ្រោះថ្នាក់ដល់បរិដ្ឋាននិងសុខភាពសាធារណៈសម្រាប់មនុស្សដែលរស់នៅក្បែរនោះ។
លោកAndrew Wells-Dangដែលដឹកនាំកិច្ចផ្តួចផ្តើមនៃកេរដំណែលនិងការផ្សះផ្សារសង្គ្រាមវៀតណាមនៅឯវិទ្យាស្ថានសហរដ្ឋអាមេរិកដើម្បីសន្តិភាពបានប្រាប់វីអូអេតាមទូរស័ព្ទកាលពីថ្ងៃទី៥ ខែកញ្ញានេះថាដំណើរទស្សនកិច្ចការទូតនេះជាគន្លឹះដ៏សំខាន់មួយដើម្បីធ្វើឱ្យជឿន លឿនកិច្ចប្រឹងប្រែងនៃការដោះស្រាយសង្គ្រាម រួមមានការស្វែងរកនិងការកំណត់អត្ត សញ្ញាណអដ្ឋិធាតុនៃទាហានដែលបានបាត់ខ្លួន។ លោកបាននិយាយទៀតថា រួមជាមួយនឹងដំណើរទស្សនកិច្ចរបស់អនុរដ្ឋមន្ត្រីការពារជាតិវៀតណាមលោក Vo Minh Luongកាលពីខែកក្កដា ដំណើរទស្សនកិច្ចមកពីពួកអាជ្ញាធរផ្តល់«ឱកាសសម្រាប់ពួកគេដើម្បីឱ្យមានការគាំទ្រកម្រិតខ្ពស់»៕
