ប្រទេសចិននិងវៀតណាមបានចុះហត្ថលេខាលើកិច្ចព្រមព្រៀងចំនួន ១៤ កាលពីថ្ងៃចន្ទ ដែលក្នុងនោះមានដូចជាកិច្ចព្រមព្រៀងផ្លូវរថភ្លើងឆ្លងព្រំដែននិងកិច្ចព្រមព្រៀងនាំចេញសត្វក្រពើជាដើម បន្ទាប់ពីប្រធានាធិបតីចិនលោក Xi Jinpingបានជួបជាមួយមេដឹកនាំថ្មីរបស់វៀតណាមលោកTo Lam នៅក្នុងទីក្រុងប៉េកាំង ប្រទេសចិនមក។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មានReuters។
ដំណើរទស្សនកិច្ចរបស់លោក Lam ទៅកាន់ទីក្រុងប៉េកាំង ដែលជាដំណើរទស្សនកិច្ចលើកទីមួយរបស់លោកទៅកាន់បរទេសចាប់តាំងពីលោកត្រូវបានតែងតាំងជាប្រធានបក្សនៅដើមខែនេះមក គឺជាសញ្ញានៃបំណងប្រាថ្នារវាងប្រទេសទាំងពីរដើម្បីពង្រឹងទំនាក់ទំនងនៅពេលដែលពាណិជ្ជកម្មនិងការវិនិយោគកើនឡើង ថ្វីបើមានការប៉ះទង្គិចគ្នាម្តងម្កាលអំពីព្រំដែននៅសមុទ្រចិនខាងត្បូងក៏ដោយ។
លោក Xi បាននិយាយដោយសង្កត់ធ្ងន់អំពីការបង្កើតទំនាក់ទំនងការងារល្អនិងមិត្តភាពផ្ទាល់ខ្លួនជាមួយលោក Lam ថា៖ «ចិនជានិច្ចកាលចាត់ទុកវៀតណាមថាជាអាទិភាពនៅក្នុងវិស័យការទូតប្រទេសជិតខាងរបស់ខ្លួន ហើយគាំទ្រវៀតណាមនៅក្នុងប្រកាន់ខ្ជាប់តាមថ្នាក់ដឹកនាំរបស់គណបក្ស ប្រកាន់តាមមាគ៌ាសង្គមនិយមដែលសមស្របទៅតាមស្ថានភាពជាតិរបស់ខ្លួន និងពង្រឹងឱ្យបានជ្រាលជ្រៅដល់បុព្វហេតុនៃកំណែទម្រង់និងទំនើបកម្មសង្គមនិយម»។
លោក Lam បានហៅចំណងទាក់ទងទ្វេភាគីនេះថាជា «អាទិភាពកំពូលនៅក្នុងគោលនយោបាយការបរទេសរបស់វៀតណាម» និងបានហៅដំណើរទស្សនកិច្ចរបស់លោកទៅកាន់ប្រទេសចិនថាជា «ការបញ្ជាក់របស់គណបក្សនិងរដ្ឋាភិបាលវៀតណាមចំពោះគុណតម្លៃនៃទំនាក់ទំនងជាមួយចិន»។
ប្រទេសទាំងពីរបានចុះហត្ថលេខាលើកិច្ចព្រមព្រៀងស្តីពីការសិក្សាលើការរៀបចំផែនការនិងភាពដែលអាចធ្វើបានសម្រាប់ផ្លូវរថភ្លើងតាមលក្ខណៈស្ដង់ដារ។ នេះទំនងជាជំហានថ្មីមួយឆ្ពោះទៅកាន់ការធ្វើឱ្យប្រសើឡើងនូវការភ្ជាប់ផ្លូវរថភ្លើងឆ្លងកាត់ព្រំដែន បន្ទាប់ពីកិច្ចព្រមព្រៀងលើកដំបូងអំពីបញ្ហានេះត្រូវបានចុះហត្ថលេខាកាលពីខែធ្នូឆ្នាំមុនក្នុងអំឡុងនៃដំណើរទស្សនកិច្ចផ្លូវរដ្ឋរបស់លោក Xi ទៅកាន់ទីក្រុងហាណូយ ប្រទេសវៀតណាមមក៕
