មេបញ្ជាការយោធាអ៊ុយក្រែនបានអះអាងកាលពីថ្ងៃអង្គារថាកងកម្លាំងរបស់រដ្ឋាភិបាលក្រុងកៀវបានត្រួតត្រាជិត១ពាន់៣រយគីឡូម៉ែត្រការ៉េនៃតំបន់ Kursk នៃប្រទេសរុស្ស៊ីក្នុងអំឡុងនៃការលុកលុយរយៈពេល៣សប្តាហ៍របស់ខ្លួនហើយបានចាប់ឈ្លើយសង្គ្រាមរុស្ស៊ី៥៩៤នាក់ដែលខ្លួនសង្ឃឹមថានឹងយកទៅដោះដូរជាមួយពលរដ្ឋអ៊ុយក្រែនដែលត្រូវរុស្ស៊ីឃុំឃាំង។
ឧត្តមសេនិយ៍ Oleksandr Syrskyiបាននិយាយថាការរុលទៅមុខរបស់អ៊ុយក្រែនបានទាក់ទាញកងទ័ពរុស្ស៊ីគ្រប់ទីកន្លែង ដោយការប៉ុនប៉ងរបស់រដ្ឋាភិបាលក្រុងមូស្គូ«ដើម្បីបង្កើតខ្សែក្រវាត់ការពារជុំវិញក្រុមកងទ័ពរបស់យើង និងដើម្បីធ្វើផែនការធ្វើសកម្មភាពវាយបកវិញ»។
មនុស្ស៥នាក់ត្រូវបានរាយការណ៍ថាបានត្រូវសម្លាប់ហើយ១៦នាក់ទៀតបានរងរបួសនៅក្នុងការវាយប្រហារថ្មី។
លោកប្រធានាធិបតីZelenskyyបានសរសេរនៅលើបណ្តាញសង្គមXថា«យើងនឹងឆ្លើយតបដោយគ្មានការមន្ទិលសង្ស័យដល់រុស្ស៊ីចំពោះការវាយប្រហារនេះនិងការវាយប្រហារទាំងអស់ផ្សេងទៀត។ ឧក្រិដ្ឋកម្មប្រឆាំងមនុស្សជាតិមិនអាចគ្មានទោសពៃរ៍បានទេ»។
កិច្ចប្រតិបត្តិការតំបន់ Kursk ដែលជាការលុកលុយដ៏ធំបំផុតចូលក្នុងប្រទេសរុស្ស៊ីចាប់ តាំងពីសង្គ្រាមលោកលើកទី២ បានបង្ខំពួកអ្នកស្រុក១សែន៣ម៉ឺននាក់ឱ្យជម្លៀសខ្លួនចេញពីផ្ទះសម្បែង។ រុស្ស៊ីបានបញ្ជូនកងទ័ពចូលក្នុងតំបន់នោះ ក៏ប៉ុន្តែ គេមិនទាន់ច្បាស់នៅឡើយថាតើការធ្វើបែបនេះអាចធ្វើឱ្យទីតាំងរបស់រុស្ស៊ីនៅក្នុងតំបន់ភាគខាងកើតអ៊ុយក្រែនជាទីកន្លែងដែលកងទ័ពរដ្ឋាភិបាលក្រុងមូស្គូកំពុងរុលទៅមុខនោះ ចុះខ្សោយដល់កំរិតណាទេ។
ក្រសួងការពារជាតិរបស់រុស្ស៊ីបានបញ្ជាក់កាលពីថ្ងៃអង្គារថាអ៊ុយក្រែនបានខូចខាតយ៉ាងដំណំនៅក្នុងតំបន់ Kursk ដែលមានកងទ័ពប្រហែល៦ពាន់៦រយនាក់ត្រូវបានសម្លាប់ឬរងរបួស ហើយថារថក្រោះជាង៧០គ្រឿងបានត្រូវកំទិច រួមជាមួយរថពាសដែកមួយចំនួនធំ។ តួលេខទាំងនេះមិនអាចបញ្ជាក់ដោយក្រុមឯករាជ្យបានទេ៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារព័ត៌មាន AP, AFP និង Reuters
