រុស្ស៊ីបានបើកការវាយប្រហារយ៉ាងទូលំទូលាយដោយប្រើដ្រូននិងមីស៊ីលលើអ៊ុយក្រែនកាលពីថ្ងៃចន្ទ ដោយសម្លាប់មនុស្សយ៉ាងតិច ៣ នាក់ និងកាត់ផ្តាច់ចរន្តអគ្គិសនីនៅតាមតំបន់មួយចំនួនក្នុងក្រុងជាច្រើន។ នេះបើយោងតាមមន្ត្រីអ៊ុយក្រែន។
ប្រធានាធិបតីអ៊ុយក្រែនលោក Volodymyr Zelenskyy ថា រុស្ស៊ីបានប្រើមីស៊ីលជាង ១០០ គ្រាប់និងដ្រូនប្រមាណ ១០០ គ្រឿងនៅក្នុងការវាយប្រហារនេះ ដោយដៅលើ «ហេដ្ឋារចនាសម្ព័ន្ធស៊ីវិលសំខាន់ៗ»។
លោក Zelenskyy បានបញ្ជាក់តាមប្រព័ន្ធ Telegram ថា កងកម្លាំងអ៊ុយក្រែនមិនអាចរឹតត្បិតសមត្ថភាពរបស់ខ្លួនក្នុងការវាយប្រហារចម្ងាយឆ្ងាយបានទេ នៅពេលរុស្ស៊ីគ្មានការរឹតត្បិតបែបនេះ។
មន្ត្រីអ៊ុយក្រែនចង់ឱ្យប្រទេសដែលផ្ដល់អាវុធឱ្យខ្លួនផ្ដល់សេរីភាពទូលំទូលាយជាងនេះដល់ខ្លួនក្នុងការប្រើប្រាស់អាវុធទាំងនោះដើម្បីវាយប្រហារលើគោលដៅយោធាក្នុងប្រទេសរុស្ស៊ី។ រុស្ស៊ីបានប្រើគោលដៅយោធាទាំងនោះដើម្បីវាយប្រហារដោយដ្រូននិងមីស៊ីលលើអ៊ុយក្រែន។
លោក Zelenskyyថា៖ «សហរដ្ឋអាមេរិក ចក្រភពអង់គ្លេស បារាំង និងដៃគូដទៃទៀតរបស់យើងមានអំណាចជួយយើងក្នុងការបញ្ឈប់អំពើដ៏គួរឱ្យរន្ធត់នេះបាន។ ឥឡូវនេះគឺជាពេលដែលត្រូវសម្រេចចិត្តដាច់ណាត់លើរឿងនេះហើយ»។
យោងតាមមន្ត្រីអ៊ុយក្រែន ការវាយប្រហាររបស់រុស្ស៊ីបានសម្លាប់មនុស្សម្នាក់នៅក្នុងតំបន់ Dnipropetrovsk មនុស្សម្នាក់នៅក្នុងតំបន់ Zaporizhzhia និងមនុស្សម្នាក់ទៀតនៅក្នុងទីក្រុង Lutsk ភាគខាងលិច៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
