ចាប់តាំងពីការឈ្លានពានរបស់រុស្ស៊ីលើអ៊ុយក្រែន កាលពីសប្ដាហ៍មុនមក បណ្ដាញសង្គមចិន ដែលជាទូទៅស្ថិតក្រោមការគ្រប់គ្រង មានពោរពេញទៅដោយការបញ្ចេញមតិផ្ទុយគ្នាអំពីបញ្ហានៅអ៊ុយក្រែន។ ស្ថាប័នត្រួតពិនិត្យការប្រើប្រាស់អ៊ីនធឺណិត បានលុបចោលការបង្ហោះសាររាប់ពាន់សារ ដែលមានខ្លឹមសារមិនសមរម្យ និងអាសអាភាសទៅលើស្ត្រីអ៊ុយក្រែន ហើយនិងសារចេញពីគណនីជាប្រភពដើមដែលពួកគេបង្កើតសារទាំងនោះដែរ។
ការបញ្ចេញមតិផ្សេងៗត្រូវបានបង្ហោះរៀងរាល់ម៉ោងនៅលើបណ្ដាញទំនាក់ទំនង WeChat កម្មវិធី Appបង្ហោះវីដេអូ Douyin ឬកម្មវិធីApp TikTok ជាភាសាចិន ក៏ដូចជានៅលើកម្មវិធី Weibo ដែលជាបណ្ដាញសង្គម Twitter បញ្ចេញទស្សនវិស័យចិន។
អ្នកប្រើប្រាស់បណ្ដាញសង្គមមួយចំនួន បានស្នើឲ្យរដ្ឋាភិបាលចិនឆ្លៀតឱកាសពីវិបត្តិនៅអ៊ុយក្រែន ដើម្បីរឹបអូសយកកោះតៃវ៉ាន់។ ចិនចាត់ទុកដែនកោះដែលមានការគ្រប់គ្រងដោយខ្លួនឯងនេះ ថាជាខេត្តផ្ដាច់ខ្លួនមួយរបស់ចិន បើទោះបីជាកោះនេះមានទង់ជាតិ រូបិយប័ណ្ណ យោធា និងស្ថាប័នប្រជាធិបតេយ្យ ដាច់ដោយឡែកក៏ដោយ។ រដ្ឋាភិបាលចិនបាននិយាយថា ពួកគេបានត្រៀមខ្លួនរួចរាល់ដើម្បីធ្វើការបង្រួបបង្រួមជាមួយកោះតៃវ៉ាន់ កុំថាឡើយ ត្រូវប្រើកម្លាំងទ័ព។
បណ្ដាញសង្គមចិនត្រូវបានគេមើលឃើញថា មានការបង្ហោះការគាំទ្ររុស្ស៊ីយ៉ាងភ្លូកទឹកភ្លូកដី និងការរិះគន់ទៅលើសហរដ្ឋអាមេរិក ច្រើនជាងការគាំទ្រអ៊ុយក្រែន។ មានមនុស្សតិចតួចប៉ុណ្ណោះដែលបានសួរសំនួរថាតើហេតុអ្វីបានជាប្រធានាធិបតីរុស្ស៊ី Vladimir Putin ព្យាយាមជ្រៀតជ្រែកកិច្ចការប្រទេសដទៃ តាមរយៈការលើកទឹកចិត្តឲ្យពលរដ្ឋនិយាយភាសារុស្ស៊ីនៅអ៊ុយក្រែនងើបបះបោរប្រឆាំងនឹងរដ្ឋាភិបាលក្នុងស្រុករបស់ពួកគេ។
តែអ្វីដែលសំខាន់ជាងនេះគឺថា អ្នកបញ្ចេញមតិខ្លះបានសួរថា តើហេតុអ្វីបានជារដ្ឋាភិបាលចិនមិនឈរនៅខាងរុស្ស៊ី ដែលជាសម្ពន្ធមិត្តរបស់ខ្លួន ក្នុងពេលមានការបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិលើសេចក្ដីសម្រេចថ្កោលទោសការវាយប្រហាររបស់រុស្ស៊ីលើអ៊ុយក្រែន។ ចិន ឥណ្ឌា និង អេមីរ៉ាតអារ៉ាប់រួម បានសម្រេចចិត្តបោះឆ្នោតអនុបវាទ ដែលជាជំហរអព្យាក្រឹត។
អ្នកបញ្ចេញមតិខ្លះក៏បាននិយាយចំអកដល់អ៊ុយក្រែន ដោយអះអាងថា ប្រទេសនេះបានអនុញ្ញាតឲ្យសហរដ្ឋអាមេរិកធ្វើការសម្រេចចិត្តជំនួសពួកគេ។
ចម្ងល់ទៅលើការសម្រេចចិត្តរបស់ចិន
ជាមួយនឹងការបង្ហោះសារដែលមានខ្លឹមសារមិនសមរម្យ និងការកោតសរសើរដល់អំពីហិង្សា ស្ថានប័នចិនដែលមានកាតព្វកិច្ចរឹតត្បិតការបញ្ចេញមតិ បានលុបចោលមតិដែលមានទស្សនៈប្រឆាំងនឹងសង្គ្រាម រួមមានទាំងលិខិតចំហមួយដែលត្រូវបានចែករំលែកដោយក្រុមបញ្ញាវន្តដែលបានស្នើឲ្យបញ្ចប់សង្គ្រាមនេះ។
សាស្ត្រាចារ្យសាកលវិទ្យាល័យជនជាជាតិចិនម្នាក់ដែលសុំមិនបញ្ចេញឈ្មោះបានថ្លែងថា៖ «វាមិនមែនជាស្ថានការណ៍ងាយស្រួលសម្រាប់រដ្ឋាភិបាលនោះទេ។ រដ្ឋាភិបាលមិនអាចគាំទ្រសង្គ្រាមទេ។ ប៉ុន្តែ វាក៏មិនងាយស្រួលក្នុងការសម្តែងទស្សនៈប្រឆាំងនឹងសង្គ្រាមយ៉ាងគគ្រឹកគគ្រេងបែបនេះទេ ពីព្រោះការធ្វើដូច្នេះ វាពាក់ព័ន្ធទៅនឹងស្ថានការណ៍នយោបាយនៅកោះតៃវ៉ាន់ តំបន់ទីបេ និងក្រុងហុងកុង។
សារព័ត៌មានគ្រប់គ្រងដោយរដ្ឋចិន Global Times បានលើកឡើងនៅក្នុងការផ្សាយជាភាសាចិនថា ក្រុមផ្ដាច់ខ្លួចបំបែករដ្ឋ ដែលប្រឆាំងនឹងទីក្រុងប៉េកាំង គឺជាក្រុមដែលស្ថិតនៅពីក្រោយការបង្ហោះសារមួយចំនួនប្រឆាំងនឹងសង្គ្រាម។
លោក Sun Jiashan អ្នកស្រាវជ្រាវនៅបណ្ឌិត្យសភាសិល្បៈចិន បានសរសេរថា៖ «មនុស្សខ្លះសន្និដ្ឋានថា ក្រុមលាក់មុខដែលចង់បំបែករដ្ឋតៃវ៉ាន់ ក្រុមចង់បំបែករដ្ឋហុងកុង និងកម្លាំងដទៃទៀត គឺជាអ្នកបង្កើតរលកនៃការបញ្ចេញមតិសារធារណៈ និង ការពិភាក្សានានាអំពីស្ថានការណ៍នៅអ៊ុយក្រែន»។
ប៉ុន្តែ ក្រុមអ្នកត្រួតពិនិត្យការប្រើប្រាស់អ៊ីនធឺណិតនៃប្រទេសនេះ ដែលមានឈ្មោះថា «រដ្ឋបាលគ្រប់គ្រងប្រព័ន្ធអ៊ីនធឺណិតចិន Cyberspace Administration of China » កាលពីដំបូងឡើយ មិនបានធ្វើសកម្មភាពអ្វីទៅលើការពិភាក្សាទាំងនោះទេ ដោយពួកគេអនុញ្ញាតឲ្យមានការបង្ហោះសារចោទសួរទៅលើគោលនយោបាយរបស់ទីក្រុងមូស្កូ បន្តមាននៅលើបណ្ដាញសង្គមទាំងនោះ។ ការធ្វើដូច្នេះ វាជះត្រឡប់មកវិញ នូវការលំបាកកាន់តែធំឡើងសម្រាប់អាជ្ញាធរចិន ដោយសារតែសម្ពន្ធមិត្តរបស់ខ្លួន គឺរុស្ស៊ី ទ្រទ្រង់ និងគាំទ្រចលនាបំបែករដ្ឋនៅភាគខាងកើតនៃប្រទេសអ៊ុយក្រែន នៅពេលដែលរុស្ស៊ីកំពុងតែវាយប្រហារដោយគ្មានហេតុផលទៅលើប្រទេសជិតខាងរបស់ខ្លួន។
លោក Francesco Sisci អ្នកសិក្សាស្រាជ្រាវជាន់ខ្ពស់នៅសាកលវិទ្យាល័យ Renmin នៃប្រទេសចិន ក្នុងទីក្រុងប៉េកាំងបានថ្លែងថា៖ «ចិន ជាទូទៅ កំពុងតាមដានព្រឹត្តិការណ៍នានា ប៉ុន្តែមិនបង្ហាញជំហរច្បាស់លាស់នោះទេ។ តើចិនត្រូវបង្ហាញជំហរដើម្បីអ្វី? សម្រាប់ចិន សង្គ្រាមនេះ គឺជាសង្គ្រាម ចាញ់-ចាញ់»។
លោកថ្លែងប្រាប់វីអូអេ បន្តថា៖ «ប្រសិនបើរុស្ស៊ី ឈ្នះសង្គ្រាមនេះ រុស្ស៊ីនឹងកាន់តែខ្លាំងជាងមុន ហើយចិននឹងទទួលរងសម្ពាធពីអ្នកជិតខាងនៅភាគខាងជើងមួយនេះ។ ប៉ុន្តែ បើរុស្ស៊ីចាញ់វិញ ចិននឹងកាន់តែមានភាពឯកោ។ លើសពីនេះទៀត ចិនពុំមានទំនុកចិត្តលើរុស្ស៊ីទេ។ ប៉ុន្តែ ជំហរផ្លូវការរបស់ចិនគឺប្រឆាំងនឹងអាមេរិក ហើយក្រុងប៉េកាំងមើលឃើញសង្គ្រាមនេះថាជា សង្គ្រាមដែលរៀបចំឡើងដោយសហរដ្ឋអាមេរិក ដែលបានបង្ខំរុស្ស៊ីឲ្យធ្វើដូច្នេះ»។
យ៉ាងណាក៏ដោយ រដ្ឋបាលគ្រប់គ្រងប្រព័ន្ធអ៊ីនធឺណិតចិន និងបណ្ដាញសង្គមនានាបានលុបចោលការបង្ហោះសារ និង វីដេអូ រាប់ពាន់សារ ដែលមានខ្លឹមសារមិនសមរម្យ។ ទីភ្នាក់ងារនេះនិយាយថា ពួកគេកំពុងបង្ក្រាបទៅលើអ្វីដែលពួកគេហៅថា «បណ្ដាញផ្សព្វផ្សាយបុគ្គល» នោះគឺគណនីបណ្ដាញសង្គមប្រើប្រាស់ដោយអ្នកផលិតព័ត៌មាន ដែលបង្ហោះទស្សនៈនយោបាយដោយគ្មានការទទួលខុសត្រូវ។ ទីភ្នាក់ងារនេះបាននិយាយដែរថា ពួកគេចង់គ្រប់គ្រងការចែកចាយព័ត៌មាននៅគ្រប់បណ្ដាញអ៊ីនធឺណិតទាំងអស់ ដើម្បីបញ្ចប់ការរំខានទៅលើសណ្ដាប់ធ្នាប់នៃការផ្សព្វផ្សាយតាមអ៊ីនធឺណិត។
ក្រុមហ៊ុនបណ្ដាញសង្គម Douyin និយាយថា ពួកគេបានលុបចោលវីដេអូចំនួន ៣.៥០០ និង ការបញ្ចេញមតិចំនួន ១២.១០០ ទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ ក្រុមហ៊ុននេះក៏កំពុងស៊ើបអង្កេតទៅលើការបង្ហោះសារដែលមានខ្លឹមសារមិនសមរម្យ ដូចជាសារដែលអំពាវនាវឲ្យចាប់ខ្លួនស្ត្រីអ៊ុយក្រែនស្អាតៗ ការផ្សព្វផ្សាយអំពីតម្លៃមិនសមរម្យ និងសារដែលធ្វើឲ្យប៉ះពាល់ដល់បរិយាកាសនៃបណ្ដាញសង្គមមួយនេះ។
ប្រតិកម្មលើអ្វីដែលកើតឡើងនៅអ៊ុយក្រែន
មានការបង្ហោះសារដែលមានខ្លឹមសារថា ជំហររបស់រដ្ឋាភិបាលចិនបែបនេះ បង្កឲ្យមានការខឹងសម្បាទៅលើនិស្សិតចិនដែលកំពុងសិក្សានៅអ៊ុយក្រែន។ សារខ្លះបានយោងទៅលើអរិភាពបង្កដោយអ្នកស្រុកនៅអ៊ុយក្រែន និងបានបង្ហាញពីក្ដីបារម្ភលើសុវត្ថិភាពរបស់ពួកគេ។
ស្ថានទូតចិនប្រចាំរដ្ឋធានីកៀវ កាលពីដំបូងឡើយ បានអំពាវនាវឲ្យពលរដ្ឋរបស់ខ្លួន បង្ហាញអត្តសញ្ញាណរបស់ពួកគេឲ្យបានច្បាស់នៅពេលធ្វើដំណើរនៅក្នុងប្រទេសអ៊ុយក្រែន។ ប៉ុន្តែ ក្រោយមក ស្ថានទូតបានប្ដូរបទបញ្ជា ដោយនិយាយថា ពលរដ្ឋរបស់ខ្លួនគួរស្ថិតនៅក្នុងផ្ទះ ហើយមិនគួរបង្ហាញអត្តសញ្ញាណរបស់ពួកគេទេ រហូតដល់មានការជូនដំណឹងជាថ្មី។
ស្ថានទូតចិនបានប្រាប់ពលរដ្ឋរបស់ខ្លួននៅអ៊ុយក្រែនថា៖ «ពលរដ្ឋអ៊ុយក្រែនកំពុងឆ្លងកាត់ការលំបាក។ យើងត្រូវតែយល់ដល់ពួកគេ និងមិនត្រូវបង្កហេតុអ្វីជាមួយពួកគេទេ»។
ទីភ្នាក់ងារព័ត៌មានផ្លូវការចិន Xinhua News Agency ក៏បានចូលរួមជាមួយរដ្ឋាភិបាលក្នុងការអំពាវនាវឲ្យអ្នកប្រើប្រាស់បណ្ដាញសង្គម ត្រូវធ្វើការពិភាក្សា និង បង្ហាញការយល់ឃើញរបស់ពួកគេដោយមានហេតុផល ព្រមទាំងបានរិះគន់អ្នកដែលប្រើពាក្យពេចន៍មិនសមរម្យដែរ៕
