១៩:២៨
២១.៣.២០២២
ថ្ងៃចន្ទ ទី២១ ខែមីនា៖
- ប្រធានាធិបតីសហរដ្ឋអាមេរិកលោក Joe Biden បាននិយាយទូរស័ព្ទជាមួយនឹងមេដឹកនាំនៃសម្ព័ន្ធមិត្តអឺរ៉ុបសំខាន់ៗរបស់សហរដ្ឋអាមេរិកនៅថ្ងៃចន្ទនេះ នៅមុនពេលលោកចូលរួមកិច្ចប្រជុំកំពូលរបស់អង្គការអូតង់ (NATO) និងរបស់សហភាពអឺរ៉ុប។ នេះគឺជាសប្ដាហ៍សំខាន់បំផុតសម្រាប់ការឆ្លើយតបរបស់ក្រុមបស្ចិមប្រទេសចំពោះការឈ្លានពានរបស់រុស្ស៊ីលើអ៊ុយក្រែន។ សេតវិមានបានបញ្ជាក់ថា លោក Biden បានទទួលពិភាក្សាតាមទូរស័ព្ទជាមួយនឹងប្រធានាធិបតីបារាំងលោក Emmanuel Macron អធិការបតីអាល្លឺម៉ង់លោក Olaf Scholz នាយករដ្ឋមន្ត្រីអ៊ីតាលីលោក Mario Draghi និងនាយករដ្ឋមន្ត្រីចក្រភពអង់គ្លេសលោក Boris Johnson «ដើម្បីពិភាក្សាអំពីការឆ្លើយតបដែលមានការសម្របសម្រួលចំពោះការវាយប្រហារទទឹងទិសនិងគ្មានហេតុផលត្រឹមត្រូវរបស់រុស្ស៊ីលើអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃចន្ទនេះ បានអំពាវនាវឱ្យប្រទេសចិនដើរ «តួនាទីសំខាន់» មួយនៅក្នុងកិច្ចប្រឹងប្រែងដើម្បីដោះស្រាយជម្លោះរបស់អ៊ុយក្រែនជាមួយនឹងរុស្ស៊ី។ លោក Kuleba បានសរសេរនៅលើ Twitter ថា៖ «យើងគាំទ្រគោលជំហររបស់រដ្ឋាភិបាលចិនអំពីភាពចាំបាច់នៅក្នុងការស្វែងរកដំណោះស្រាយនយោបាយសម្រាប់សង្គ្រាម [របស់រុស្ស៊ី] ប្រឆាំងនឹងអ៊ុយក្រែន និងអំពាវនាវឱ្យចិនក្នុងនាមជាមហាអំណាចពិភពលោកមួយឱ្យដើរតួនាទីសំខាន់នៅក្នុងកិច្ចប្រឹងប្រែងនេះ»។ នេះបើយោងតាមទីភ្នាក់ងារព័ត៌មាន AFP។
- នៅថ្ងៃចន្ទនេះ រុស្ស៊ីបានកោះហៅឯកអគ្គរដ្ឋទូតសហរដ្ឋអាមេរិកប្រចាំប្រទេសរុស្ស៊ី បន្ទាប់ពីប្រធានាធិបតីអាមេរិកលោក Joe Biden បានហៅមេដឹកនាំរុស្ស៊ីលោក Vladimir Putin ថាជា «ឧក្រិដ្ឋជនសង្គ្រាម»។ ក្រសួងការបរទេសរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយថា៖ «ការលើកឡើងដូចនេះរបស់ប្រធានាធិបតីអាមេរិក ដែលគ្មានតម្លៃក្នុងនាមជាមេដឹកនាំរបស់ប្រទេសមួយ បានធ្វើឱ្យទំនាក់ទំនងរវាងរុស្ស៊ីនិងអាមេរិកជិតឈានទៅដល់ចំណុចប្រេះស្រាំ»។ នេះបើយោងតាមទីភ្នាក់ងារព័ត៌មាន AFP។
- អង្គការអន្តរជាតិទេសន្តរប្រវេសន៍ (IOM) របស់អង្គការសហប្រជាជាតិ បានបញ្ជាក់នៅថ្ងៃចន្ទនេះថា មនុស្សជិត ៦ លាន ៥ សែននាក់ បានបង្ខំចាកចេញពីផ្ទះសម្បែងនៅក្នុងប្រទេសអ៊ុយក្រែន ដោយសារតែសង្គ្រាម។ ទីភ្នាក់ងារនេះបានបញ្ជាក់ដូច្នេះ ដោយយោងទៅលើការសិក្សាស្រាវជ្រាវមួយដែលខ្លួនបានធ្វើឡើងរវាងពីថ្ងៃទី ៩ ដល់ថ្ងៃទី ១៦ ខែមីនា។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសនៃបណ្ដាប្រទេសសមាជិកសហភាពអឺរ៉ុបបានព្រមាននៅថ្ងៃចន្ទនេះថា សង្គ្រាមរបស់រុស្ស៊ីនៅអ៊ុយក្រែនអាចបណ្ដាលឱ្យមានគ្រោះទុរភិក្សកើតឡើងនៅតាមផ្នែកមួយចំនួននៃពិភពលោក ដោយសារតែប្រទេសរុស្ស៊ីនិងអ៊ុយក្រែនគឺជាប្រទេសនាំចេញទំនិញកសិកម្មចម្បងបំផុត។ រដ្ឋមន្ត្រីការបរទេសបារាំងលោក Jean-Yves Le Drian បាននិយាយថា សង្គ្រាមនេះ «នឹងបង្កជាហានិភ័យនៃគ្រោះទុរភិក្សក្នុងពេលឆាប់ៗខាងមុខនេះ» ដោយប៉ះពាល់ដល់សន្តិសុខស្បៀងអាហារមិនត្រឹមតែនៅក្នុងទ្វីបអឺរ៉ុបប៉ុណ្ណោះទេ ប៉ុន្តែថែមទាំងនៅលើពិភពលោកទាំងមូលផងដែរ»។ នេះបើយោងតាមទីភ្នាក់ងារព័ត៌មាន AFP។
- ក្រសួងវិទ្យាសាស្ត្រនិងឧត្តមសិក្សានៃប្រទេសរុស្ស៊ីបានបញ្ជាក់នៅថ្ងៃចន្ទនេះថា រដ្ឋាភិបាលរុស្ស៊ីបានប្រាប់អ្នកសិក្សាស្រាវជ្រាវនានារបស់ខ្លួនឱ្យចៀសពីការចូលរួមនៅក្នុងសន្និសីទផ្នែកវិទ្យាសាស្ត្រផ្សេងៗនៅបរទេសនៅក្នុងឆ្នាំនេះ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការពារជាតិអាល្លឺម៉ង់អ្នកស្រី Christine Lambrecht បាននិយាយនៅថ្ងៃចន្ទនេះថា ប្រទេសអាល្លឺម៉ង់ត្រៀមខ្លួនរួចរាល់នៅក្នុងការផ្ដល់ផ្នែកស្នូលនៃកងកម្លាំងប្រតិកម្មរហ័សថ្មីរបស់សហភាពអឺរ៉ុបនៅឆ្នាំ ២០២៥ ខាងមុខ។ នេះបើយោងតាមទីភ្នាក់ងារព័ត៌មាន Reuters។
- ថ្លែងនៅក្នុងពិធីសម្ពោធមន្ទីរពេទ្យមិត្តភាពកម្ពុជា-ចិនព្រះកុសុមៈនៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានអំពាវនាវឱ្យពលរដ្ឋខ្មែរដែលកំពុងរស់នៅក្នុងប្រទេសអ៊ុយក្រែន ឱ្យបន្តរស់នៅទីនោះ ដើម្បីរួមសុខរួមទុក្ខជាមួយប្រជាពលរដ្ឋអ៊ុយក្រែន។ លោកបានថ្លែងដូច្នេះថា៖ «ពលរដ្ឋកម្ពុជាយើងកំពុងរស់នៅអ៊ុយក្រែនគឺមាន ២៣ គ្រួសារ។ ខ្ញុំមិនឱ្យបញ្ជាណាមួយឱ្យបងប្អូនខ្មែរយើងនៅទីនោះនាំគ្នារត់ចោលប្រជាជនអ៊ុយក្រែនទេ។...ប្រជាជនអ៊ុយក្រែនគាត់រស់នៅយ៉ាងម៉េចបាន យើងរស់នៅជាមួយពួកគាត់ទៅ។ កុំរត់ចោទគ្នា»។
- ទីភ្នាក់ងារសន្តិសុខជាតិរបស់រដ្ឋាភិបាលរុស្ស៊ីបានស្នើតុលាការនៅថ្ងៃចន្ទនេះឱ្យរារាំងក្រុមហ៊ុនបច្ចេកវិទ្យា Meta របស់សហរដ្ឋអាមេរិក «ជាបន្ទាន់» ដោយបានចោទប្រកាន់ក្រុមហ៊ុននេះថាបានធ្វើកិច្ចការដែលប្រឆាំងនឹងផលប្រយោជន៍របស់រដ្ឋាភិបាលរុស្ស៊ីក្នុងអំឡុងពេល «ប្រតិបត្តិការយោធាពិសេស» របស់រុស្ស៊ីនៅអ៊ុយក្រែន។ ឥឡូវនេះ តុលាការរុស្ស៊ីកំពុងពិចារណាលើសំណើរបស់រដ្ឋអាជ្ញាដែលមានបំណងចាត់ទុកក្រុមហ៊ុន Meta ដែលជាក្រុមហ៊ុនមេរបស់ក្រុមហ៊ុន Facebook, Instagram និង WhatsApp ថាជាអង្គការ «ជ្រុលនិយម» និងរារាំងក្រុមហ៊ុននេះ។ នេះបើយោងតាមទីភ្នាក់ងារព័ត៌មាន AFP។
- សហភាពអឺរ៉ុបគ្រោងនឹងអនុម័តនៅថ្ងៃចន្ទនេះលើយុទ្ធសាស្ត្រការពារថ្មីមួយ ដែលមានបំណងបង្កើនសមត្ថភាពរបស់ខ្លួននៅក្នុងការចាត់វិធានការ ដែលក្នុងនោះរួមមានទាំងការបង្កើតកងកម្លាំងប្រតិកម្មរហ័សចំនួន ៥.០០០ នាក់ផងដែរ។ គម្រោងដែលបាននៅរង់ចាំអស់រយៈពេល ២ ឆ្នាំមកហើយនេះ ត្រូវបានតាក់តែងឡើងវិញនៅនាទីចុងក្រោយដើម្បីបង្កើនការផ្ដោតលើការគំរាមកំហែងពីរុស្ស៊ី បន្ទាប់ពីរុស្ស៊ីបានឈ្លានពានអ៊ុយក្រែន។ ប្រធានផ្នែកគោលនយោបាយការបរទេសនៃសហភាពអឺរ៉ុបលោក Josep Borrell បាននិយាយថា៖ «គម្រោងនេះមិនមែនជាចម្លើយសម្រាប់សង្គ្រាមនៅអ៊ុយក្រែនទេ ប៉ុន្តែវាជាផ្នែកមួយនៃចម្លើយនេះ»។ នេះបើយោងតាមទីភ្នាក់ងារព័ត៌មាន AFP។
- ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស (OHCHR) បានបញ្ជាក់នៅថ្ងៃចន្ទនេះថា ជនស៊ីវិលចំនួន ៩២៥ នាក់ បានស្លាប់ និង ១.៤៩៦ នាក់បានរងរបួសនៅក្នុងប្រទេសអ៊ុយក្រែន គិតតាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈរហូតមកដល់ថ្ងៃទី ២០ ខែមីនា។ នេះបើយោងតាមទីភ្នាក់ងារព័ត៌មាន Reuters។អង្គការសហប្រជាជាតិបានបញ្ជាក់នៅថ្ងៃចន្ទនេះថា ឥឡូវនេះ ពលរដ្ឋអ៊ុយក្រែនជិត ៣ លាន ៥ សែននាក់បានភៀសខ្លួនចេញពីប្រទេស បន្ទាប់ពីរុស្ស៊ីបានឈ្លានពាន។ អង្គការសហប្រជាជាតិបានសរសើរបណ្ដាប្រទេសជិតខាងអ៊ុយក្រែនថាបានជួយជនភៀសខ្លួនអ៊ុយក្រែនទាំងនោះឱ្យរួចផុតពី «ស្ថានភាពលំបាកវេទនាខ្លាំងក្លា»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសតួកគីលោក Mevlut Cavusoglu បានបញ្ជាក់នៅលើ Twitter នៅថ្ងៃចន្ទនេះថា លោកបានពិភាក្សាអំពីស្ថានការណ៍វិវត្តន៍ក្នុងប្រទេសអ៊ុយក្រែនជាមួយនឹងរដ្ឋមន្ត្រីការបរទេសអេមីរ៉ាតអារ៉ាប់រួមលោក Sheikh Abdullah bin Zayed Al Nahyan នៅក្នុងរាជធានីអាប៊ុយដាប៊ី ប្រទេសអេមីរ៉ាតអារ៉ាប់រួម។ នេះបើយោងតាមទីភ្នាក់ងារព័ត៌មាន Reuters។
- ក្រសួងសេដ្ឋកិច្ចអាល្លឺម៉ង់បានបញ្ជាក់នៅថ្ងៃចន្ទនេះថា ក្រុមហ៊ុនអាល្លឺម៉ង់មួយចំនួនបានចុះហត្ថលេខាជាមួយក្រុមហ៊ុននៅប្រទេសអេមីរ៉ាតអារ៉ាប់រួម ដើម្បីកសាងសង្វាក់ផ្គត់ផ្គង់អ៊ីដ្រូសែន ស្របពេលរដ្ឋាភិបាលអាល្លឺម៉ង់ចង់កាត់បន្ថយការបញ្ចេញឧស្ម័នកាបូននិងកាត់បន្ថយការពឹងផ្អែករបស់ខ្លួនលើថាមពលរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន TASS របស់រុស្ស៊ីបានរាយការណ៍ថា ឧបនាយករដ្ឋមន្ត្រីរុស្ស៊ីលោក Alexander Novak បាននិយាយនៅថ្ងៃចន្ទនេះថា តម្លៃប្រេងឥន្ធនៈអាចកើនដល់ ៣០០ ដុល្លារក្នុងមួយបារែល ប្រសិនបើក្រុមបស្ចិមប្រទេសឈប់ទិញប្រេងឆៅរបស់រុស្ស៊ី។ លោកបានបន្ថែមថា ទ្វីបអឺរ៉ុបមិនអាចបដិសេធប្រេងឥន្ធនៈនិងឧស្ម័នរបស់រុស្ស៊ីបានទេនៅពេលនេះ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃចន្ទនេះឱ្យបណ្ដាមេដឹកនាំនានានៅទ្វីបអឺរ៉ុបបញ្ឈប់រាល់ការធ្វើពាណិជ្ជកម្មទាំងអស់ជាមួយនឹងប្រទេសរុស្ស៊ី ដើម្បីដាក់សម្ពាធលើរដ្ឋាភិបាលរុស្ស៊ីឱ្យបញ្ឈប់ការឈ្លានពានរបស់ខ្លួនលើអ៊ុយក្រែន។ លោក Zelenskyy បានថ្លែងនៅក្នុងសុន្ទរកថាជាវីដេអូមួយថា៖ «សូមកុំជួយគាំទ្រសព្វាវុធធ្វើសង្គ្រាមរបស់ប្រទេសរុស្ស៊ី។ មិនត្រូវឱ្យអ្នកឈ្លានពានកាន់កាប់បានប្រាក់ពីអឺរ៉ុបនោះឡើយ។ សូមបិទកំពង់ផែទាំងអស់របស់អ្នក។ សូមកុំនាំទំនិញទៅលក់នៅរុស្ស៊ី។ សូមបដិសេធធនធានថាមពលនានា [របស់រុស្ស៊ី]។ សូមជំរុញឱ្យរុស្ស៊ីចាកចេញពីអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទនេះថា ការដាក់ទណ្ឌកម្មលើការនាំចូលប្រេងឥន្ធនៈពីរុស្ស៊ី ដែលប្រទេសមួយចំនួននៅទ្វីបអឺរ៉ុបបានធ្វើទាក់ទិននឹងសកម្មភាពរបស់រុស្ស៊ីនៅអ៊ុយក្រែន នឹងមានផលប៉ះពាល់ផ្ទាល់លើប្រទេសទាំងអស់។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានបញ្ជាក់ថា៖ «ទណ្ឌកម្មបែបនេះនឹងមានផលប៉ះពាល់ធ្ងន់ធ្ងរបំផុតដល់ទីផ្សារថាមពលពិភពលោក។ វានឹងមានផលប៉ះពាល់អវិជ្ជមានធ្ងន់ធ្ងរបំផុតដល់តុល្យភាពថាមពលរបស់ទ្វីបអឺរ៉ុប»។ នេះបើយោងតាមទីភ្នាក់ងារព័ត៌មាន AFP។
- លោក Vitali Klitschko អភិបាលរដ្ឋធានីកៀវ នៃប្រទេសអ៊ុយក្រែន បានប្រកាសបម្រាមគោចរថ្មីសម្រាប់ទីក្រុងកៀវចាប់ពីល្ងាចថ្ងៃចន្ទនេះរហូតដល់ព្រឹកថ្ងៃពុធ។ លោកបានសរសេរនៅលើ Telegram ថា បម្រាមគោចរនេះ «នឹងចាប់ផ្ដើមនៅម៉ោង ៨ យប់ និងបន្តរហូតដល់ម៉ោង ៧ ព្រឹក ថ្ងៃទី ២៣ ខែមីនា»។ នេះបើយោងតាមទីភ្នាក់ងារព័ត៌មាន AFP។
- នៅក្នុងសុន្ទរកថាជាវីដេអូមួយកាលពីព្រឹកថ្ងៃចន្ទនេះ ប្រធានាធិបតីអ៊ុយក្រែនលោក Volodymyr Zelenskyy បានថ្កោលទោសការទម្លាក់គ្រាប់បែករបស់រុស្ស៊ីលើសាលាសិល្បៈមួយនៅក្នុងទីក្រុង Mariupol ដែលនៅទីនោះ មនុស្សប្រហែល ៤០០ នាក់កំពុងជ្រកកោន។ លោកថ្លែងដូច្នេះថា៖ «ពួកគេកំពុងស្ថិតក្រោមគំនរបាក់បែក។ យើងមិនដឹងថាពួកគេប៉ុន្មាននាក់នៅរស់នោះទេ។ ប៉ុន្តែ យើងដឹងថា យើងនឹងប្រាកដជាបាញ់ទម្លាក់អ្នកបើកយន្តហោះទម្លាក់គ្រាប់បែកនោះ ដូចទៅនឹងឃាតករ ១០០ នាក់ផ្សេងទៀតដែលសម្លាប់មនុស្សទ្រង់ទ្រាយធំដូចនេះដែរ ដែលយើងបានបាញ់ទម្លាក់រួចហើយ»។
- លោកនាយឧត្តមសេនីយ៍ Mikhail Mizintsev ប្រធានមជ្ឈមណ្ឌលជាតិរុស្ស៊ីសម្រាប់ការគ្រប់គ្រងផ្នែកការពារជាតិ (Russian National Center for Defense Management) បានអំពាវនាវដល់កងកម្លាំងអ៊ុយក្រែនឱ្យ «ទម្លាក់អាវុធចុះ» នៅក្នុងទីក្រុង Mariupol ដែលជាទីក្រុងកំពង់ផែនៅភាគខាងកើតប្រទេសអ៊ុយក្រែន។ រដ្ឋាភិបាលរុស្ស៊ីបានបញ្ជាក់ថា «មហន្តរាយមនុស្សធម៌ដ៏អាក្រក់បំផុត» កំពុងកើតឡើងនៅក្នុងទីក្រុងនោះ។ នេះបើយោងតាមទីភ្នាក់ងារព័ត៌មាន Reuters។
- ឧបនាយករដ្ឋមន្ត្រីអ៊ុយក្រែនអ្នកស្រី Iryna Vereshchuk បាននិយាយថា ប្រទេសអ៊ុយក្រែនគ្រោងបញ្ជូនរថយន្តក្រុងជិត ៥០ គ្រឿង នៅថ្ងៃចន្ទនេះទៅជម្លៀសមនុស្សពីតំបន់ទីក្រុង Mariupol។ អ្នកស្រីក៏បានបញ្ជាក់ផងដែរថា មនុស្ស ៧.២៩៥ នាក់ ត្រូវបានជម្លៀសចេញពីទីក្រុងនានារបស់អ៊ុយក្រែនតាមរយៈច្រករបៀបមនុស្សធម៌កាលពីថ្ងៃអាទិត្យ ដោយក្នុងនោះមានតែច្រករបៀបចំនួន ៤ ក្នុងចំណោមច្រករបៀបគ្រោងទុកចំនួន ៧ តែប៉ុណ្ណោះ ដែលដំណើរការ។ នេះបើយោងតាមទីភ្នាក់ងារព័ត៌មាន Reuters។
- ប្រធានផ្នែកគោលនយោបាយការបរទេសរបស់សហភាពអឺរ៉ុបលោក Josep Borrell បានហៅការវាយប្រហាររបស់រុស្ស៊ីលើទីក្រុង Mariupol ប្រទេសអ៊ុយក្រែន ថាជា «ឧក្រិដ្ឋកម្មសង្គ្រាមដ៏ធំធេងមួយ» ស្របពេលរដ្ឋមន្ត្រីការបរទេសនៃបណ្ដាប្រទេសជាសមាជិកសហភាពអឺរ៉ុបជួបប្រជុំគ្នាដើម្បីពិភាក្សាអំពីការដាក់ទណ្ឌកម្មបន្ថែមទៀតលើរដ្ឋាភិបាលរុស្ស៊ី។ នេះបើយោងតាមទីភ្នាក់ងារព័ត៌មាន AFP។
- អ៊ុយក្រែនបានច្រានចោលឱសានវាទរបស់រុស្ស៊ីដែលចង់ឱ្យខ្លួនចុះចាញ់និងប្រគល់ការគ្រប់គ្រងទីក្រុង Mariupol ទៅឱ្យរុស្ស៊ីនៅថ្ងៃចន្ទនេះ។ ឧបនាយករដ្ឋមន្ត្រីអ៊ុយក្រែនអ្នកស្រី Iryna Vereshchuk បានទាត់ចោលការទាមទាររបស់រុស្ស៊ីនេះ និងបាននិយាយថា រុស្ស៊ីគួរតែបើកច្រករបៀងមនុស្សធម៌ដើម្បីឱ្យប្រជាពលរដ្ឋអាចចាកចេញពីទីក្រុង Mariupol បាន។ អ្នកស្រីបានបញ្ជាក់ប្រាប់ប្រព័ន្ធផ្សព្វផ្សាយព័ត៌មាន Pravda របស់អ៊ុយក្រែនថា៖ «មិនអាចមានការពិភាក្សាអំពីការចុះចាញ់ ឬការទម្លាក់អាវុធចុះណាមួយទេ។ យើងបានប្រាប់ភាគីរុស្ស៊ីរួចហើយអំពីរឿងនេះ»។
- ឯកអគ្គរដ្ឋទូតចិនប្រចាំសហរដ្ឋអាមេរិកលោក Qin Gang បានបញ្ជាក់កាលពីថ្ងៃអាទិត្យម្សិលមិញថា ប្រទេសចិននឹងមិនបញ្ជូនសព្វាវុធទៅកាន់ប្រទេសរុស្ស៊ីដើម្បីប្រើនៅក្នុងប្រទេសអ៊ុយក្រែននោះទេ ប៉ុន្តែលោកមិនបានច្រានចោលនូវលទ្ធភាពដែលរដ្ឋាភិបាលចិនអាចធ្វើដូច្នេះនៅពេលអនាគតនោះឡើយ។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីសហរដ្ឋអាមេរិកលោក Joe Biden នឹងធ្វើទស្សនកិច្ចទៅកាន់ប្រទេសប៉ូឡូញនៅថ្ងៃសៅរ៍ ដើម្បីជួបពិភាក្សាទ្វេភាគីជាមួយនឹងប្រធានាធិបតីប៉ូឡូញលោក Andrzej Duda។ អ្នកនាំពាក្យសេតវិមានអ្នកស្រី Jen Psaki បានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃអាទិត្យថា នៅក្នុងជំនួបទ្វេភាគីនោះ «លោកប្រធានាធិបតី [Biden] នឹងពិភាក្សាអំពីវិធីដែលសហរដ្ឋអាមេរិករួមជាមួយនឹងសម្ព័ន្ធមិត្តនិងដៃគូរបស់ខ្លួន ឆ្លើយតបទៅនឹងវិបត្តិមនុស្សធម៌និងសិទ្ធិមនុស្ស ដែលបានកើតឡើងដោយសារសង្គ្រាមទទឹងទិសនិងគ្មានហេតុផលត្រឹមត្រូវរបស់រុស្ស៊ីលើអ៊ុយក្រែន»។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងសុន្ទរកថាតាមវីដេអូទៅកាន់សភាប្រទេសអ៊ីស្រាអែលកាលពីថ្ងៃអាទិត្យ ដោយអំពាវនាវឱ្យប្រទេសអ៊ីស្រាអែលប្រកាន់ជំហរខ្លាំងក្លាជាងមុនប្រឆាំងនឹងរុស្ស៊ី។ ទីភ្នាក់ងារព័ត៌មាន AP បានរាយការណ៍ថា លោក Zelenskyy បានចោទប្រកាន់ប្រធានាធិបតីរុស្ស៊ីលោក Vladimir Putin ថាបានព្យាយាមអនុវត្ត «ដំណោះស្រាយអចិន្ត្រៃយ៍» មួយប្រឆាំងនឹងអ៊ុយក្រែន។ ពាក្យ «ដំណោះស្រាយអចិន្ត្រៃយ៍» នេះ គឺជាពាក្យដែលរបបណាហ្ស៊ីអាល្លឺម៉ង់បានប្រើសម្រាប់ការប្រព្រឹត្តិអំពើប្រល័យពូជសាសន៍របស់ខ្លួនលើជាតិសាសន៍ជ្វីហ្វប្រហែល ៦ លាននាក់។
១៨:៥៤
២២.៣.២០២២
ថ្ងៃអង្គារ ទី ២២ ខែមីនា
- ទីភ្នាក់ងារទទួលបន្ទុកកិច្ចការជនភៀសខ្លួនរបស់អង្គការសហប្រជាជាតិ និយាយថា មនុស្សជាង ៣លាន ៥សែននាក់ បានរត់គេចខ្លួនពីអ៊ុយក្រែន ចាប់តាំងពីមានការលុកលុយរបស់រុស្ស៊ីដែលកំពុងស្ថិតក្នុងសភាពគួរឲ្យព្រួយបារម្ភខ្លាំងនិងបង្កឱ្យមានវិបត្តិជនភៀសខ្លួនដ៏អាក្រក់បំផុតតាំងពីសង្គ្រាមលោកលើកទីពីរមក។ ទីភ្នាក់ងារ UNHCR បានរាយការណ៍ថាមានមនុស្ស ៣ លាន ៥ សែន៦ ម៉ឺននាក់ បានចាកចេញពីអ៊ុយក្រែនដោយក្នុងនោះ ជាង ២លាន ១សែននាក់ បានទៅប្រទេសប៉ូឡូញជាង ៥សែន ៤ម៉ឺននាក់ ទៅប្រទេសរូម៉ានី និងជាង ៣សែន ៦ម៉ឺន ៧ពាន់នាក់ទៅប្រទេសម៉ុលដូវ៉ា។ នេះបើតាមទីភ្នាក់ងារព័ត៌មាន AP។
- អ្នកកាសែតរុស្ស៊ីលោក Dmitry Muratov មានប្រសាសន៍ថាលោកចង់លក់ដេញថ្លៃរង្វាន់ណូបែលសន្តិភាពឆ្នាំ ២០២១ របស់លោកដើម្បីអង្គាសប្រាក់ជួយក្រុមជនភៀសខ្លួនអ៊ុយក្រែន។ នេះបើតាមទីភ្នាក់ងារព័ត៌មាន AP។
- លោកប្រធានាធិបតី Joe Biden នឹងអរគុណប្រធានាធិបតីប្រទេសប៉ូឡូញអំពីកិច្ចប្រឹងប្រែងរបស់ប្រទេសលោកដែលបានផ្តល់ទីជម្រកដល់ក្រុមជនភៀសខ្លួនអ៊ុយក្រែន នៅពេលដែលលោក Biden បំពេញទស្សនកិច្ចរបស់លោកនៅអឺរ៉ុបក្នុងសប្តាហ៍នេះ គ្រាដែលកងកម្លាំងរុស្ស៊ីបាននិងកំពុងលុកលុយអ៊ុយក្រែនជិតមួយខែហើយ។ នេះបើតាមទីភ្នាក់ងារព័ត៌មាន AP។
- អាជ្ញាធរអ៊ុយក្រែនបានប្រកាសនៅថ្ងៃអង្គារនេះអំពីកិច្ចប្រឹងប្រែងជួយសង្គ្រោះជនស៊ីវិលពីទីក្រុង Mariupol។ មនុស្សជាង ២ សែននាក់បានជាប់គាំងនៅក្នុងទីក្រុងកំពង់ផែនេះ ដែលកំពុងស្ថិតក្រោមការគ្រប់គ្រងរបស់ទាហានរុស្ស៊ី។ នេះបើយោងតាមទីភ្នាក់ងារសារព័ត៌មាន AFP។
- ក្រុមសកម្មជនតវ៉ាប្រឆាំងនឹងការលុកលុយរបស់រុស្សីក្នុងអ៊ុយក្រែនរារាំងឡានកាមីញ៉ុងដឹកទំនិញនៅព្រំដែនប៉ូឡូញ-បេឡារុស។ ចរាចរណ៍កកស្ទះមានច្រើនគីឡូម៉ែត្រនៅទីតាំងត្រួតពិនិត្យ Kukuryki ក្នុងប្រទេសប៉ូឡូញកាលពីបីបួនថ្ងៃមុននេះ។ ក្រុមបាតុករបានរាំងខ្ទប់សកម្មភាពធ្វើពាណិជ្ជកម្មរយៈពេលពីរសប្តាហ៍មកហើយពីព្រោះប្រទេសបេឡារុសបានអនុញ្ញាតឱ្យកងកម្លាំងរុស្ស៊ីប្រើតំបន់ភូមិសាស្ត្ររបស់ខ្លួនដើម្បីបើកការវាយលុកលើប្រទេសអ៊ុយក្រែន។ នេះបើតាមការផ្សាយនៃវីទ្យុអឺរ៉ុបសេរី/វិទ្យុសេរីភាព។
- ទីភ្នាក់ងារព័ត៌មាន The Associate Press បានរាយការណ៍ថា លោក Ruslan Strelets រដ្ឋមន្ត្រីធនធានធម្មជាតិអ៊ុយក្រែនបាននិយាយនៅថ្ងៃអង្គារថាភ្លើងឆេះព្រៃត្រូវបានពន្លត់ហើយនៅក្នុងតំបន់រោងចក្រនុយក្លេអ៊ែរ Chernobyl ដែលស្ថិតក្រោមការត្រួតត្រារបស់កងកម្លាំងរុស្ស៊ី។ អគ្គិភ័យនេះបាននាំឱ្យមានកង្វល់អំពីលទ្ធភាពនៃការលេចវិទ្យុសកម្មពីរោងចក្រនោះ តែរដ្ឋមន្ត្រីរូបនេះបានថ្លែងថាកម្រិតវិទ្យសកម្មនៅក្នុងតំបន់នោះស្ថិតក្នុងបទដ្ឋានធម្មតា។ កាលមុននេះ ពួកមន្ត្រីអ៊ុយក្រែនបានចោទប្រកាន់កងកម្លាំងរុស្ស៊ីថាធ្វើឱ្យមានអគ្គិភ័យនោះដោយចេតនាឬបានធ្វើឱ្យមានអគ្គិភ័យនោះដោយការបាញ់ផ្តក់គ្រាប់កាំភ្លើងធំ។
ទិដ្ឋភាពទីក្រុង Kharkiv ក្នុងប្រទេសអ៊ុយក្រែនដែលរងការបំផ្លិចបំផ្លាញដោយសារការឈ្លានពានរបស់រុស្ស៊ី ថ្ងៃទី ២២ ខែមីនា ឆ្នាំ ២០២២។
- អ៊ុយក្រែនអំពាវនាវដល់ក្រុមហ៊ុនចិនផលិតដ្រូនស៊ីវិលមួយឱ្យរារាំងអ្វីដែលរដ្ឋាភិបាលអ៊ុយក្រែនហៅថាការប្រើប្រាស់ដ្រូនទាំងនេះដោយកងទ័ពរុស្ស៊ីដើម្បីយកការវាយប្រហារមីស៊ីលជាទីដៅ។ ការអំពាវនាវរបស់លោកឧបនាយករដ្ឋមន្ត្រី Mykhailo Federov ដល់ក្រុមហ៊ុន DJI Technology Co. ត្រូវផ្សាយតាម Twitter គូសបញ្ជាក់ភាពតានតឹងរបស់អ៊ុយក្រែនជាមួយក្រុមហ៊ុនចិន។ រដ្ឋមន្ត្រីការបរទេសចិន Wang Yi បាននិយាយនៅខែនេះថា រដ្ឋាភិបាលម៉ូស្គូជា«ដៃគូយុទ្ធសាស្ត្រសំខាន់បំផុត»របស់រដ្ឋាភិបាលប៉េកាំង នៅពេលក្រុមហ៊ុនបច្ចេកវិទ្យាបស្ចិមប្រទេសនិងក្រុមហ៊ុនឯទៀតៗ បានដកថយពីរុស្ស៊ីដោយសារការលុកលុយរបស់ប្រទេសនេះក្នុងអ៊ុយក្រែនកាលពីថ្ងៃទី២៤ ខែកុម្ភៈមក។
- កាសែត The Washington Post បានរាយការណ៍ថា ផ្ទៃដីយ៉ាងតិចណាស់ ៨ម៉ឺន ២ពាន់ ៥រយ ២៥គីឡូម៉ែត្រក្រឡានៃប្រទេសអ៊ុយក្រែនមានផ្ទុកគ្រឿងផ្ទុះនាំឱ្យមានគ្រោះថ្នាក់។ នេះបើតាមសមាគម Ukrainian Sappers’ Association ដែលជាអង្គការមិនគិតកម្រៃខាងសម្អាតមីន។
- កាសែត The Washington Post បានរាយការណ៍ថា នៅក្នុងទស្សនកិច្ចរបស់លោកទៅអឺរ៉ុប លោកប្រធានាធិបតីអាមេរិក Joe Biden នឹងស្វះស្វែងបង្រួបបង្រួមសម្ព័ន្ធភាពបស្ចិមប្រទេសដែលចាប់ផ្តើមមានការប្រេះឆា។ លោកនឹងបង្ហាញខ្លួនជានិមិត្តរូបនៅប៉ូឡូញដែលក្រុមមេដឹកនាំប្រទេសនេះបារម្ភថា ប្រទេសពួកគេអាចជាទីដៅអនាគតនៃអំពើឈ្លានពានរបស់រុស្ស៊ី។
- នៅពេលដែលការលុកលុយតាមជើងគោករបស់រុស្សីភាគច្រើនជាប់គាំងនិងរអាក់រអួល មានទស្សនៈមួយក្នុងចំណោមក្រុមអ្នកតាមឃ្លាំមើលវិមានក្រឹមឡាំងថា មេដឹកនាំរុស្ស៊ី Vladimir Putin នឹងអស់អំណាច។ លោក Jamie Dettmer នៃវីអូអេរាយការណ៍អំពីឱកាសនៃការមានរដ្ឋប្រហារក្នុងជួររដ្ឋាភិបាលរុស្ស៊ី។
- នៅថ្ងៃអង្គារ អគ្គលេខាធិការនៃអង្គការសហប្រជាជាតិលោក António Guterres បានពណ៌នាសង្គ្រាមក្នុងអ៊ុយក្រែនថា«មិនអាចមានអ្នកឈ្នះបាននោះទេ» ដោយលោកបានអំពាវនាវឱ្យមានការបញ្ឈប់ការប្រយុទ្ធគ្នានិងការចរចាគ្នាដោយម៉ត់ចត់នៅឯ«តុសន្តិភាព»។ នេះបើតាមកាសែត The Washington Post។
- អង្គការសុខភាពពិភពលោកបាននិយាយកាលពីថ្ងៃអង្គារថា មណ្ឌលថែទាំសុខភាពយ៉ាងតិចណាស់ ៦២ កន្លែងត្រូវបានវាយប្រហារនៅអ៊ុយក្រែនចាប់ពីថ្ងៃទី ១៨ ខែមីនាមក។ អង្គការនេះបានថ្លែងថាមានមនុស្ស ១៥ នាក់ ត្រូវបានសម្លាប់និង ៣៧ នាក់ទៀតត្រូវរបួសក្នុងការវាយប្រហារទាំងនោះ ដែលបានកើតឡើងតាំងពីការលុកលុយរបស់រុស្ស៊ីកាលពីថ្ងៃទី២ ៤ ខែកុម្ភៈមក។
- នាយករដ្ឋមន្ត្រីអង់គ្លេស Boris Johnson និងលោក Narendra Modi នាយករដ្ឋមន្ត្រីឥណ្ឌាបាននិយាយគ្នាតាមទូរសព្ទនៅថ្ងៃអង្គារថា រុស្ស៊ីត្រូវតែធ្វើតាមធម្មនុញ្ញរបស់អង្គការសហប្រជាជាតិ។ នេះបើតាមការប្រាប់ឱ្យដឹងដោយការិយាល័យលោក Johnson។ សេចក្តីថ្លែងការណ៍មួយចេញផ្សាយដោយការិយាល័យលោក Johson នៅក្រោយការនិយាយទូរសព្ទនេះចែងថា៖ «នាយករដ្ឋមន្ត្រីទាំងពីរនាក់យល់ស្របគ្នាថាអធិបតេយ្យភាពនិងបូរណភាពដែនដីអ៊ុយក្រែនត្រូវតែគោរព»។ នេះបើតាមទីភា្នក់ងារព័ត៌មាន Reuters។
- ចំនួនជនភៀសខ្លួនពីប្រទេសអ៊ុយក្រែនបានកើនលើស៣លាន ៥សែននាក់ ចាប់តាំងពីរុស្ស៊ីបានឈ្លានពានលើអ៊ុយក្រែន។ នេះបើយោងតាមទីភ្នាក់ងារទទួលបន្ទុកកិច្ចការជនភៀសខ្លួនប្រចាំអង្គការសហប្រជាជាតិ។ ក្នុងចំណោមជនភៀសខ្លួនទាំងនោះ មនុស្សជាង ២ លាន ១សែននាក់ បានភៀសខ្លួនទៅប្រទេសប៉ូឡូញ ៥៤៣.០០០នាក់ ទៅប្រទេសរ៉ូម៉ានី ៣៦៨.០០០នាក់ទៅប្រទេសម៉ូលដូវ៉ា ហើយ ៣១៨.០០០នាក់ទៅប្រទេសហុងគ្រី។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងនៅថ្ងៃអង្គារថា លោកបានសន្ទនាជាមួយសម្តេចប៉ាប Pope Francis។ លោកបានសរសេរនៅលើបណ្តាញ Twitter ថា៖ «តួនាទីសម្របសម្រួលពីតុលាការសាសនាដើម្បីបញ្ចប់ទុក្ខវេទនារបស់មនុស្ស ត្រូវបានឲ្យតម្លៃ»។
- ប្រទេសអ៊ុយក្រែនបានឲ្យដឹងថា ខ្លួនបានវាយយកបានមកវិញនូវតំបន់ជាយក្រុងយុទ្ធសាស្ត្រសំខាន់មួយនៃក្រុង Kyiv កាលពីព្រឹកថ្ងៃអង្គារ នៅពេលដែលកងកម្លាំងរុស្ស៊ីវាយប្រហារខ្លាំងលើតំបន់ឯទៀតៗ នៅជិតរដ្ឋធានី ហើយការវាយប្រហាររបស់រុស្ស៊ីលើក្រុងកំពង់ផែ Mariupol នាប៉ែកខាងត្បូងប្រទេសមិនចុះថមថយទេ នេះបើតាមទីភ្នាក់ងារព័ត៌មាន AP។
- ទីភ្នាក់ងារព័ត៌មាន Reuters រាយការណ៍ថា នៅថ្ងៃអង្គារកងយោធាអ៊ុយក្រែនបានព្រមានសាធារណជនអំពីការបាញ់ផ្តក់ដោយចេតនាច្រើនជាងមុនរបស់រុស្ស៊ីលើហេដ្ឋារចនាសម្ព័ន្ធសំខាន់ៗ នៅពេលលោកប្រធានាធិបតីសហរដ្ឋអាមេរិកJoe Biden បានព្រមានខ្លាំងបំផុតថារុស្ស៊ីកំពុងពិចារណាប្រើអាវុធគីមី។
ប្រធានាធិបតីសហរដ្ឋអាមេរិក លោក Joe Biden ថ្លែងសុន្ទរកថា នៅឯកិច្ចប្រជុំ Business Roundtable's CEO ប្រចាំត្រីមាស ក្នុងរដ្ឋធានីវ៉ាស៊ីនតោន ថ្ងៃទី២១ ខែមីនា ឆ្នាំ២០២២។
- អ្នកនាំពាក្យវិមានក្រឹមឡាំង Dmitry Peskov បានច្រានចោលការព្រមានរបស់លោកប្រធានាធិបតីJoe Biden ដែលថារុស្ស៊ីប្រហែលគ្រោងវាយប្រហារលើប្រព័ន្ធអ៊ីនធឺណិតប្រឆាំងនឹងសហរដ្ឋអាមេរិក។ នៅពេលសួរអំពីអត្ថាធិប្បាយរបស់លោក Biden អ្នកនាំពាក្យរុស្ស៊ីរូបនេះបាននិយាយនៅថ្ងៃអង្គារថា «សហព័ន្ធរុស្ស៊ី មិនដូចជាប្រទេសជាច្រើនក្នុងលោកខាងលិចទេ មិនធ្វើចោរកម្មកម្រិតរដ្ឋឡើយ»។ នេះបើតាមទីភ្នាក់ងារព័ត៌មាន AP។
- ទីភ្នាក់ងារព័ត៌មាន AP រាយការណ៍ថាលោកប្រធានាធិបតីអ៊ុយក្រែន Volodymyr Zelenskyy បានសុំប្រទេសអ៊ីតាលីឱ្យបង្កើនការដាក់ទណ្ឌកម្មប្រឆាំងនឹងរុស្ស៊ីហើយរឹបអូសធនធានថែមទៀតពីប្រធានាធិបតី Vladimir Putin និងក្រុមសម្ព័ន្ធមិត្តរបស់លោក Putinដើម្បីជាវិធីមួយដើម្បីដាក់សម្ពាធលើរដ្ឋាភិបាលម៉ូស្គូឱ្យធ្វើការចរចាបញ្ចប់សង្គ្រាម។
- លោក Viktor Lyashko រដ្ឋមន្ត្រីសុខាភិបាលអ៊ុយក្រែនបាននិយាយនៅថ្ងៃអង្គារថាមន្ទីរពេទ្យ ១០ត្រូវបានបំផ្លាញទាំងស្រុងចាប់តាំងពីរុស្ស៊ីចូលលុកលុយអ៊ុយក្រែនហើយមន្ទីរពេទ្យឯទៀតៗមិនអាចស្តុកឱសថនិងឧបករណ៍វេជ្ជសាស្ត្របានទេដោយសារតែមានការប្រយុទ្ធគ្នានៅជិតទីកន្លែងទាំងនោះ។ នេះបើតាមទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន AP រាយការណ៍ថាលោកប្រធានាធិបតីអ៊ុយក្រែន Volodymyr Zelenskyy បានមានប្រសាសន៍កាលពីយប់ថ្ងៃចន្ទថាលោកប្រុងប្រៀបពិភាក្សាអំពីជំហរមួយរបស់អ៊ុយក្រែនដែលមិនសុំចូលជាសមាជិកអង្គការអូតង់ដើម្បីជាថ្នូរនឹងការឈប់បាញ់ ការដកទ័ពរុស្ស៊ីចេញពីអ៊ុយក្រែន និងការធានារ៉ាប់រងសន្តិសុខដល់ប្រទេសអ៊ុយក្រែន។
- ទីភ្នាក់ងារព័ត៌មាន Reuters រាយការណ៍ថា នៅថ្ងៃអង្គារវិមានក្រឹមឡាំងបានថ្លែងថាខ្លួនចង់ឱ្យកិច្ចចរចាដែលកំពុងធ្វើឡើងរវាងរុស្ស៊ីនិងអ៊ុយក្រែនមានភាពសកម្មនិងនាំមកនូវលទ្ធផលជាងមុន នៅពេលការប្រយុទ្ធគ្នារវាងកងកម្លាំងរុស្ស៊ីនិងអ៊ុយក្រែននៅតែបន្តធ្វើឡើង។ អ្នកនាំពាក្យវិមានក្រឹមឡាំង Dmitry Peskov បាននិយាយថារុស្ស៊ីមិនមានបំណងប្រកាសជាសាធារណៈអំពីការទាមទារដ៏លម្អិតរបស់ខ្លួនពីអ៊ុយក្រែននោះទេ។
- ទីភ្នាក់ងារទទួលបន្ទុកកិច្ចការជនភៀសខ្លួនរបស់អង្គការសហប្រជាជាតិ និយាយថា មនុស្សជាង ៣លាន ៥សែននាក់ បានរត់គេចខ្លួនពីអ៊ុយក្រែន ចាប់តាំងពីមានការលុកលុយរបស់រុស្ស៊ីដែលកំពុងស្ថិតក្នុងសភាពគួរឲ្យព្រួយបារម្ភខ្លាំងនិងបង្កឱ្យមានវិបត្តិជនភៀសខ្លួនដ៏អាក្រក់បំផុតតាំងពីសង្គ្រាមលោកលើកទីពីរមក។ ទីភ្នាក់ងារ UNHCRបានរាយការណ៍ថាមានមនុស្ស ៣ លាន ៥ សែន៦ ម៉ឺននាក់ បានចាកចេញពីអ៊ុយក្រែនដោយក្នុងនោះ ជាង ២លាន១សែននាក់ បានទៅប្រទេសប៉ូឡូញជាង ៥សែន ៤ម៉ឺននាក់ទៅប្រទេសរូម៉ានី និងជាង ៣សែន ៦ម៉ឺន ៧ពាន់នាក់ទៅប្រទេសម៉ុលដូវ៉ា។ នេះបើតាមទីភ្នាក់ងារព័ត៌មាន AP។
- អ្នកកាសែតរុស្ស៊ីលោក Dmitry Muratov មានប្រសាសន៍ថាលោកចង់លក់ដេញថ្លៃរង្វាន់ណូបែលសន្តិភាពឆ្នាំ ២០២១ របស់លោកដើម្បីអង្គាសប្រាក់ជួយក្រុមជនភៀសខ្លួនអ៊ុយក្រែន។ នេះបើតាមទីភ្នាក់ងារព័ត៌មាន AP។
- លោកប្រធានាធិបតី Joe Biden នឹងអរគុណប្រធានាធិបតីប្រទេសប៉ូឡូញអំពីកិច្ចប្រឹងប្រែងរបស់ប្រទេសលោកដែលបានផ្តល់ទីជម្រកដល់ក្រុមជនភៀសខ្លួនអ៊ុយក្រែន នៅពេលដែលលោក Biden បំពេញទស្សនកិច្ចរបស់លោកនៅអឺរ៉ុបក្នុងសប្តាហ៍នេះ គ្រាដែលកងកម្លាំងរុស្ស៊ីបាននិងកំពុងលុកលុយអ៊ុយក្រែនជិតមួយខែហើយ។ នេះបើតាមទីភ្នាក់ងារព័ត៌មាន AP។
២១:៥៥
២៣.៣.២០២២
ថ្ងៃពុធ ទី ២៣ ខែមីនា៖
- ទីភ្នាក់ងារសារព័ត៌មាន AP រាយការណ៍ថា មន្ត្រីយោធាអូតង់ជាន់ខ្ពស់ម្នាក់ ថ្លែងថា ប្រទេសជាសម្ព័ន្ធមិត្តអូតង់បានសន្និដ្ឋានថា កងទ័ពរុស្ស៊ីក្នុងចន្លោះប្រមាណ ៣ម៉ឺនទៅ ៤ម៉ឺននាក់ បានរងគ្រោះនៅសមរភូមិក្នុងប្រទេសអ៊ុយក្រែន ក្នុងរយៈពេលមួយខែក្រោយការឈ្លានពានរបស់រុស្ស៊ីលើអ៊ុយក្រែន។ ក្នុងនោះ ទាហានរុស្ស៊ីប្រមាណ ៧ពាន់នាក់ ទៅ ១ម៉ឺន ៥ពាន់នាក់ ត្រូវបានសម្លាប់។ នេះគឺជាការសន្និដ្ឋានជាសាធារណៈលើកដំបូងរបស់អង្គការអូតង់ លើការរងគ្រោះរបស់កងកម្លាំងរុស្ស៊ីចាប់តាំងពីរុស្ស៊ីបានចាប់ផ្តើមលុកលុយអ៊ុយក្រែនកាលពីថ្ងៃទី ២៤ ខែកុម្ភៈមក។
- រដ្ឋមន្ត្រីការបរទេសសហរដ្ឋអាមេរិកលោក Antony Blinken ថ្លែងថា រដ្ឋបាលប្រធានាធិបតីលោក Joe Biden បានសម្រេចធ្វើការកំណត់ជាផ្លូវការមួយថា ទាហានរុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែន។
- បើតាមសេចក្តីរាយការណ៍ព័ត៌មានរបស់ Reuters អគ្គលេខាធិការអង្គការអូតង់លោក Jens Stoltenberg បានថ្លែងនៅថ្ងៃពុធ ថា លោករំពឹងថាសមាជិកទាំងអស់នៃសម្ព័ន្ធមិត្តអូតង់នឹងសម្រេចបង្កើនកម្លាំងយោធារបស់ខ្លួននៅភាគខាងកើតអឺរ៉ុប។ ស្របពេលជាមួយគ្នានោះ លោកក៏បានព្រមានរុស្ស៊ីអំពីការប្រើប្រាស់អាវុធនុយក្លេអ៊ែរនៅក្រោយរុស្ស៊ីបានលុកលុយអ៊ុយក្រែនកាលពីថ្ងៃទី ២៤ ខែកុម្ភៈមក។
- ក្រុមមេដឹកនាំអង្គការអូតង់នឹងជួបពិភាក្សាគ្នានៅថ្ងៃព្រហស្បតិ៍នៅក្នុងជំនួបកំពូលដ៏កម្រមួយអំពីការឈ្លានពានរបស់រុស្ស៊ីលើអ៊ុយក្រែន។ លោក Henry Ridgwell អ្នករាយការណ៍ឲ្យវីអូអេពីទីស្នាក់ការអង្គការអូតង់ឲ្យដឹងថា មានការអំពាវនាវកាន់តែច្រើនឡើងដែលជំរុញឲ្យបណ្តាប្រទេសលោកខាងលិចចាត់វិធានការយោធាខ្លាំងក្លាជាងមុនដើម្បីគាំទ្រដល់អ៊ុយក្រែន។
សមាជិកនៃក្រុមដែលគាំទ្រទាហានរុស្ស៊ីកំពុងប្រតិបត្តិការយោធានៅក្នុងទីក្រុង Mariupol ដែលទាហានរុស្ស៊ីបានគ្រប់គ្រង កាលពីថ្ងៃទី ២០ ខែមីនា ឆ្នាំ ២០២២។ - កាសែត The Washington Post រាយការណ៍ថា អគ្គលេខាធិការអង្គការអូតង់លោក Jens Stoltenberg ថ្លែងថា ក្រុមយោធាប្រយុទ្ធថ្មីអាចនឹងត្រូវបញ្ជូនទៅកាន់តំបន់នានាបន្ថែមទៀត ជាការឆ្លើយតបនឹងការឈ្លានពានដ៏ឃោរឃៅឡើងរបស់រុស្ស៊ីលើប្រទេសអ៊ុយក្រែន។ លោក Jens Stoltenberg បានប្រាប់ក្រុមអ្នកសារព័ត៌មាននៅទីក្រុងBrussels ថា ទាហានអូតង់នឹងត្រូវបញ្ជូនទៅប៊ុលហ្គារី ហុងគ្រី រ៉ូម៉ានី និងស្លូវ៉ាគី។ លោកបានថ្លែងដូច្នេះមុនកិច្ចប្រជុំកំពូលរបស់អង្គការអូតង់ដែលនឹងធ្វើឡើងនៅថ្ងៃព្រហស្បតិ៍។
- ចាប់តាំងពីការឈ្លានពានរបស់រុស្ស៊ីលើប្រទេសអ៊ុយក្រែនកាលពីថ្ងៃទី ២៤ ខែកុម្ភៈមក អ្នកសារព័ត៌មាន៤ នាក់ហើយ ត្រូវបានសម្លាប់ហើយមួយចំនួនទៀតបានរងរបួស។ អ្នកសារព័ត៌មានឯទៀតក៏បានរៀបរាប់ពីដំណើរគេចខ្លួនរកទីសុវត្ថិភាពដែលស្ទើរតែទៅមិនរួច។ នៅចំពោះមុខហានិភ័យកាន់តែខ្លាំងឡើង ក្រុមអ្នកសារព័ត៌មាននិងអង្គការអន្តរជាតិកំពុងធ្វើកិច្ចការផ្តោតបន្ថែមលើសុវត្ថិភាពដល់អ្នកសារព័ត៌មាន ហើយបានបង្ហាញការព្រមាននានាដើម្បីក្រើនរំលឹកដល់ភាគីទាំងអស់ក្នុងជម្លាះនៅអ៊ុយក្រែនថា អ្នកសារព័ត៌មានគឺជាជនស៊ីវិល មិនមែនជាគោលដៅនៃការវាយប្រហារ។ នេះបើតាមសេចក្តីរាយការណ៍របស់អ្នកនាង Sirwan Kajio នៃវីអូអេ។
- សហភាពអឺរ៉ុបបានប្រកាសនៅថ្ងៃពុធអំពីចំណាត់ការរបស់ខ្លួន ដើម្បីជួយដល់ប្រទេសជាសមាជិកទាំងអស់ក្នុងការជួយដល់ជនភៀសខ្លួនរាប់លាននាក់ដែលបានភៀសខ្លួនចេញពីប្រទេសអ៊ុយក្រែនដោយសារតែការឈ្លានពានរបស់រុស្ស៊ី ដើម្បីជួយឲ្យកុមារអ៊ុយក្រែនទទួលបានឱកាសចូលរៀន និងជួយឲ្យជនភៀសខ្លួនទាំងអស់ទទួលបានសេវាថែទាំសុខភាព ទីកន្លែងស្នាក់នៅ និងឱកាសធ្វើការងារជាដើម។
- លោកស្រី Annalena Baerbock រដ្ឋមន្ត្រីការបរទេសអាល្លឺម៉ង់បានមានប្រសាសន៍នៅថ្ងៃពុធថាក្រោយពីពន្យាពេលបញ្ជូនមីស៊ីលStrela ថែមទៀតដែលមានក្នុងបញ្ជីសារពើភ័ណ្ឌនៃអតីតយោធាអាល្លឺម៉ង់ខាងកើតកុម្មុយនិស្តមួយរយៈក្រោយមក មីស៊ីលនេះត្រូវបានបញ្ជូនទៅអ៊ុយក្រែនហើយ។ ការលុកលុយរបស់រុស្ស៊ីក្នុងអ៊ុយក្រែនបាននាំឱ្យអាល្លឺម៉ង់ផ្លាស់ប្តូរគោលនយោបាយខ្លួនជាប្រវត្តិសាស្ត្រដែលមិនបញ្ជូនអាវុធទៅតំបន់មានសង្គ្រាម តែរដ្ឋាភិបាលអ៊ុយក្រែនស្រងាកចិត្តនឹងការពន្យាពេលនេះ។ នេះបើតាមទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន AP រាយការណ៍ថា ឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិសុំដល់ប្រទេសជាតិទាំងអស់ ឱ្យប្រឆាំងនឹងការលុកលុយរបស់រុស្ស៊ីដោយបោះឆ្នោតគាំទ្រសេចក្តីសម្រេចមួយរបស់អ.ស.ប. ស្តីពីផលវិបាកខាងមនុស្សធម៌នៃការលុកលុយនេះដោយលោកបាននិយាយថាការធ្វើដូច្នេះនឹងបញ្ជូនសារខ្លាំងមួយជួយប្រជារាស្ត្រជាប់គាំងក្នុងសង្គ្រាមនេះនិងបញ្ឈប់សកម្មភាពយោធារបស់រដ្ឋាភិបាលក្រុងម៉ូស្គូ។
- មន្ត្រីបស្ចិមប្រទេសម្នាក់បានថ្លែងនៅថ្ងៃពុធថា ការលាលែងពីតំណែងរបស់ប្រេសិតវិមានក្រឹមឡាំងលោក Anatoly Chubais ដោយសារការលុកលុយរបស់រុស្ស៊ីជាការលើកទឹកចិត្តតែវាមិនទំនងជានឹងធ្វើឱ្យរង្គោះរង្គើដល់ការក្តាប់អំណាចរបស់ Putin ទេ។ នេះបើតាមការប្រាប់ឱ្យដឹងដោយទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន Reuters រាយការណ៍ថា លោកស្រី Ursula von der Leyen ប្រធានគណៈកម្មការអឺរ៉ុបបាននិយាយជាថ្មីទៀតនៅថ្ងៃពុធអំពីការគាំទ្រដល់អ៊ុយក្រែន ហើយថាបើសេរីភាពមានឈ្មោះមួយវាគួរមានឈ្មោះហៅថា «អ៊ុយក្រែន»។ ថ្លែងនៅក្នុងសុន្ទរកថាមួយទៅកាន់សភាអឺរ៉ុបមុនសន្និសីទកំពូលនៃក្រុមមេដឹកនាំសហភាពអឺរ៉ុបដែលចាប់ផ្តើមនៅថ្ងៃព្រហស្បតិ៍ លោកស្រី von der Leyen បានមានប្រសាសន៍ថា លោកស្រីមានបំណងសម្រេចឲ្យមានការសន្យាមួយពីសហរដ្ឋអាមេរិកសម្រាប់ការផ្គត់ផ្គង់ឧស្ម័នធម្មជាតិបន្ថែមសម្រាប់រដូវធ្លាក់ទឹកកកនាពេលខាងមុខនៅក្នុងកិច្ចចរចាជាមួយលោកប្រធានាធិបតី Joe Biden ក្នុងក្រុង Brussels។
ប្រធានាធិបតីរុស្ស៊ីលោក Vladimir Putin ចូលរួមកិច្ចប្រជុំរដ្ឋាភិបាលរុស្ស៊ីដែលធ្វើឡើងតាមប្រព័ន្ធអនឡាញ នៅវិមានប្រធានាធិបតី Novo-Ogaryovo នៅជាយក្រុងមូស្គូ រុស្ស៊ី ថ្ងៃទី ២៣ ខែមីនា ឆ្នាំ ២០២២។
- បើតាម Politico.com.រដ្ឋមន្ត្រីការបរទេសរុស្ស៊ី Sergey Lavrov បាននិយាយនៅថ្ងៃពុធថា «គ្មាននរណាម្នាក់អាចទស្សន៍ទាយ» អំពីការដាក់ទណ្ឌកម្មរបស់ក្រុមបស្ចិមប្រទេសលើធនាគារកណ្តាលរុស្ស៊ី នៅក្នុងការទទួលស្គាល់ធំជាដំបូងដោយវិមានក្រឹមឡាំងថារដ្ឋាភិបាលម៉ូស្គូមិនបានដឹងមុនអំពីការឆ្លើយតបឆ្លងកាត់មហាសមុទ្រអាត្លង់ទិកដល់ការសម្រេចរបស់ Vladimir Putin ក្នុងការឈ្លានពានលើអ៊ុយក្រែននោះទេ។
- សមាជិកព្រឹទ្ធសភានៃក្រុម hunger caucusមកពីគណបក្សទាំងពីរបាននិយាយថាសហរដ្ឋអាមេរិកត្រូវបង្កើនជំនួយអាហារដើម្បីបញ្ចៀសកុំឱ្យមនុស្សរាប់លាននាក់ដាច់ពោះស្លាប់ពីព្រោះការលុកលុយរបស់រុស្ស៊ីគំរាមកំហែងការផ្គត់ផ្គង់គ្រាប់ធញ្ញជាតិ។ នេះបើតាមទីភ្នាក់ងារសារព័ត៌មាន AP។
- ប្រធានាធិបតីសហរដ្ឋអាមេរិកលោក Joe Biden ធ្វើដំណើរទៅកាន់ទីក្រុង Brussels នៃប្រទេសប៊ែលហ្សិក នៅថ្ងៃពុធនេះ ដើម្បីពិភាក្សាជាមួយប្រទេសជាសម្ព័ន្ធមិត្តសំខាន់ៗ អំពីកិច្ចប្រឹងប្រែងព្យាយាមបញ្ចប់សង្គ្រាមនៅក្នុងប្រទេសអ៊ុយក្រែនដែលបង្កឡើងដោយការឈ្លានពានរបស់រុស្ស៊ី។ នេះបើតាមទីភ្នាក់ងារ AP។ លោក Biden ត្រូវបានគេរំពឹងថានឹង ប្រកាសចាត់វិធានការដាក់ទណ្ឌកម្មថ្មីទៀតលើរុស្ស៊ី និងសម្របសម្រួលឲ្យមានជំនួយយោធាបន្ថែមដល់ប្រទេសអ៊ុយក្រែន។ ជាមួយគ្នានោះ លោកក៏កំពុងជំរុញឲ្យមានកិច្ចប្រឹងប្រែងវែងឆ្ងាយដើម្បីពង្រឹងយុទ្ធសាស្ត្រយោធានៅអឺរ៉ុបខាងកើត និងជួយតំបន់នេះឲ្យមានជម្រើសមិនប្រើប្រាស់ប្រេងនិងឧស្ម័នរបស់រុស្ស៊ី។ នេះបើតាមការលើកឡើងរបស់សេតវិមាន។
- ទីភ្នាក់ងារសារព័ត៌មាន AP បានរាយការណ៍ថា រដ្ឋធានីកៀវរបស់ប្រទេសអ៊ុយក្រែនបន្តរងការប្រយុទ្ធដ៏ខ្លាំងក្លារវាងទាហានរុស្ស៊ីនិងអ៊ុយក្រែន។ នៅថ្ងៃពុធនេះ មានការបាញ់គ្រាប់ផ្តក់ជាច្រើនសន្ធឹកសន្ធាប់លើរដ្ឋធានីនេះ ដោយគ្រាប់រុក្កែតបានបាញ់កម្ទេចហាងពាណិជ្ជកម្មធំមួយ និងសំណង់អគារខ្ពស់ៗនៅក្នុងសង្កាត់ Sviatoshynskyi និងសង្កាត់ Shevchenkivskyi។ ហើយអគ្គិភ័យដែលបង្កឡើងដោយការបាញ់ទាំងអស់នេះបានបណ្តាលឲ្យពលរដ្ឋបួននាក់ក្នុងសង្កាត់រងរបួស។ នេះបើតាមការលើកឡើងរបស់មន្ត្រីមូលដ្ឋានអ៊ុយក្រែន។
- ប្រធានាធិបតីអ៊ុយក្រែនលោក Volodymyr Zelenskiy បានថ្លែងនៅថ្ងៃពុធនេះថា កិច្ចចរចាគ្នារវាងអ៊ុយក្រែននិងរុស្ស៊ីមានសភាពតានតឹង ប៉ុន្តែនាំមកនូវលទ្ធផលទៅមុខ ខណៈបណ្តាប្រទេសលោកខាងលិចគ្រោងប្រកាសវិធានការដាក់ទណ្ឌកម្មលើរដ្ឋាភិបាលរុស្ស៊ីបន្ថែមទៀត ស្របពេលដែលវិបត្តិមនុស្សធម៌ដោយសារការឈ្លានពានរបស់រុស្ស៊ីលើអ៊ុយក្រែនកាន់តែមានស្ថានភាពអាក្រក់ឡើង។ នេះបើយោងតាមសេចក្តីរាយការណ៍ព័ត៌មានរបស់ Reuters។
- លោក Vitali Klitschko អភិបាលក្រុងកៀវ បានប្រាប់អ្នកសារព័ត៌មាននៅថ្ងៃពុធនេះថា ជនស៊ីវិល ២៦៤ នាក់ ត្រូវបានសម្លាប់ដោយសារការវាយប្រហាររបស់ទាហានរុស្ស៊ី ហើយថា ទាហានអ៊ុយក្រែនបានដណ្តើមកាន់កាប់ទីក្រុង Makariv និងក្រុង Irpin មកវិញពីទាហានរុស្ស៊ី។ នេះបើតាមសេចក្តីរាយការណ៍ព័ត៌មានរបស់ Reuters។
លោកប្រធានាធិបតីអាមេរិក Joe Biden កំពុងឡើងយន្តហោះធ្វើដំណើរទៅកាន់អឺរ៉ុប ដើម្បីពិភាក្សាដោយផ្ទាល់ជាមួយសម្ព័ន្ធមិត្តអំពីវិបត្តិអ៊ុយក្រែន នៅរដ្ឋ Maryland ថ្ងៃទី ២៣ ខែមីនា ឆ្នាំ ២០២២។
- ទីភ្នាក់ងារសារព័ត៌មាន Reuters បានរាយការណ៍នៅថ្ងៃពុធនេះថា រុស្ស៊ីបានធ្វើការវាយប្រហារតាមផ្លូវអកាសយ៉ាងសកម្មលើទីក្រុង Mariupol ដែលខ្លួនកំពុងគ្រប់គ្រង។ ក្រុមប្រឹក្សាក្រុងនេះបានឲ្យដឹងកាលពីថ្ងៃអង្គារថា ទីក្រុងកំពង់ផែដ៏សំខាន់មួយនេះពោរពេញដោយ«ផេះផង់និងដីដែលត្រូវបានបំផ្លិចបំផ្លាញចោល» ខណៈមានការបាញ់ប្រយុទ្ធគ្នានៅតាមដងផ្លូវនានាក្នុងក្រុងរវាងទាហានអ៊ុយក្រែននិងទាហានរុស្ស៊ី។ មនុស្សរាប់ពាន់នាក់ត្រូវបានគេជឿថាជាប់គាំងនៅក្នុងអគារនិងទីលំនៅដ្ឋានដោយគ្មានស្បៀងអាហារ ទឹក អគ្គិសនី និងថាមពលកម្តៅប្រើប្រាស់។ អភិបាលតំបន់លោក Pavlo Kyrylenko បានថ្លែងថា ទាំងជនស៊ីវិលអ៊ុយក្រែននិងទាហានអ៊ុយក្រែនកំពុងរងការវាយប្រហារពីទាហានរុស្ស៊ី។ បើតាមទីភ្នាក់ងារសារព័ត៌មាន RIA របស់រុស្ស៊ី ទាហានរុស្ស៊ីនិងក្រុមផ្តាច់ខ្លួននៅអ៊ុយក្រែនដែលគាំទ្រដោយរដ្ឋាភិបាលរុស្ស៊ី បានកាន់កាប់ពាក់កណ្តាលនៃទីក្រុងកំពង់ផែ Mariupol ដែលមានមនុស្សសរុបជាង ៤សែននាក់រស់នៅ។
- ទីភ្នាក់ងារសារព័ត៌មាន Reuters រាយការណ៍ថា មន្ត្រីរដ្ឋាភិបាលជើងចាស់របស់រុស្ស៊ីលោកAnatoly Chubais បានលាលែងពីតំណែងជាតំណាងពិសេសឲ្យប្រធានាធិបតីរុស្ស៊ីលោក Vladimir Putin សម្រាប់ទំនាក់ទំនងជាមួយអង្គការអន្តរជាតិ។ នេះបើយោងតាមប្រភពដែលបានប្រាប់សារព័ត៌មាន Reuters ដោយមិនបញ្ចេញអត្តសញ្ញាណ។ លោក Anatoly Chubais ថាលោកបានចាកចេញពីប្រទេសរុស្ស៊ីហើយគ្មានបំណងវិលត្រឡប់ចូលប្រទេសវិញទេ។
- ទីភ្នាក់ងារសារព័ត៌មាន Reuters រាយការណ៍ថា លោក Putin ថា រុស្ស៊ីនឹងចាប់ផ្តើមលើឧស្ម័នរបស់ខ្លួនដល់«បណ្តាប្រទេសដែលមិនសិ្នទ្ធនឹងរុស្ស៊ី» ជារូបិយបណ្ណរូប៊ល (roubles)។
- ទាហានរុស្ស៊ីបានវាយប្រហារដោយគ្រាប់បែកលើទីក្រុង Chernihiv ដែលជាទីក្រុងបុរាណរបស់ប្រទេសអ៊ុយក្រែន ស្ថិតនៅភាគខាងជើងអ៊ុយក្រែន ដោយបានបំផ្លាញស្ពានដ៏សំខាន់មួយសម្រាប់ការជម្លៀសពលរដ្ឋនិងដល់ការផ្គត់ផ្គង់ជំនួយដល់ក្រុងនេះ។ នេះបើតាមការលើកឡើងរបស់អភិបាលក្រុងនៅថ្ងៃពុធនេះ។ មន្ត្រីក្រុងឲ្យដឹងថា ពលរដ្ឋនៅក្រុង Chernihiv កំពុងរស់នៅដោយគ្មានទឹកស្អាតនិងថាមពលប្រើប្រាស់ដើម្បីចម្អិនអាហារនិងកម្តៅ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP។
- ទីភ្នាក់ងារសារព័ត៌មាន AP បានរាយការណ៍ថា សហរដ្ឋអាមេរិកបានសន្និដ្ឋានថា រុស្ស៊ីបានបាត់បង់សមាសធាតុយោធា១០ភាគរយ ក្នុងនោះរួមមានចំនួនទាហាន រថក្រោះ និងសម្ភារៈយោធា។ មន្ទីរបញ្ចកោណរបស់អាមេរិក ឲ្យដឹងថា កងកម្លាំងអ៊ុយក្រែនបានចាប់ផ្តើមពង្រឹងយុទ្ធសាស្ត្រប្រយុទ្ធការពាររបស់ខ្លួន នៅតាមតំបន់នានាក្នុងប្រទេស ដូចជាទីក្រុង Kherson ភាគខាងត្បូងប្រទេសដែលត្រូវបានកាន់កាប់ដោយទាហានរុស្ស៊ីពេលរុស្ស៊ីចាប់ផ្តើមការឈ្លានពានរបស់ខ្លួនជាលើកដំបូង។
- នាវាចម្បាំងរបស់រុស្ស៊ីកំពុងបង្កើនសកម្មភាពវាយប្រហារថែមទៀតលើទីក្រុងកំពង់ផែ Mariupol របស់អ៊ុយក្រែននៅថ្ងៃពុធនេះ។ នេះបើយោងតាមមន្ត្រីស៊ើបការណ៍សម្ងាត់របស់ប្រទេសលោកខាងលិចដែលឃ្លាំមើលស្ថានភាពនៅក្នុងក្រុងនេះ។ ការកាន់កាប់ទីក្រុងនេះអាចផ្តល់ច្រកតាមផ្លូវគោកមួយដល់រុស្ស៊ីភ្ជាប់ទៅនឹងតំបន់គ្រីម៉ា (Crimea) ដែលរុស្ស៊ីបានប្រកាសថាជាផ្នែកមួយនៃប្រទេសរុស្ស៊ីកាលពី៨ ឆ្នាំមុន។ នេះបើតាមសេចក្តីរាយការណ៍ព័ត៌មានរបស់ AP។
អ្នកពន្លត់អគ្គិភ័យម្នាក់កំពុងព្យាយាមពន្លត់អគ្គិភ័យដែលបានឆាបឆេះសំណង់អគារលំនៅដ្ឋានរបស់ពលរដ្ឋ ដោយសារតែការបាញ់ផ្តក់របស់ទាហានរុស្ស៊ីនៅទីក្រុងកៀវ ប្រទេសអ៊ុយក្រែន ថ្ងៃទី ២៣ ខែមីនា ឆ្នាំ ២០២២។
- ទីភ្នាក់ងារព័ត៌មាន AP បានរាយការណ៍ថា ការស៊ើបអង្កេតអន្តរជាតិអំពីឧក្រិដ្ឋកម្មសង្គ្រាមនិងការរំលោភបំពានផ្សេងៗទៀតដែលត្រូវបានប្រព្រឹត្តឡើងនៅក្នុងការឈ្លានពានរបស់រុស្ស៊ីលើអ៊ុយក្រែន កំពុងដំណើរការ។ មេធាវីជនជាតិស្វីសនៃការិយាល័យស៊ើបអង្កេតអន្តរជាតិ ថ្លែងថា ការិយាល័យនេះបានចាប់ផ្តើមប្រមូលភស្តុតាងពីជនភៀសខ្លួនអ៊ុយក្រែនក្នុងកិច្ចប្រឹងប្រែងដើម្បីលាតត្រដាងឧក្រិដ្ឋកម្មដែលអាចកើតមាន និងការរំលោភបំពានលើការដាក់ទណ្ឌកម្មដែលកើតឡើងដោយសារការឈ្លានពានរបស់រុស្ស៊ីលើអ៊ុយក្រែន។
- ក្រុមមន្ត្រីសន្តិសុខនៅប្រទេសប៉ូឡូញបានឲ្យដឹងថា ពួកគកំពុងធ្វើកិច្ចការឲ្យមានការបណ្តេញមន្ត្រីសន្តិសុខសម្ងាត់រុស្ស៊ីចំនួន ៤៥ នាក់និងក្រុមកាងាររបស់ពួកគេ ចេញពីប្រទេសដែលបន្តទទួលបានការការពារខ្លួនតាមផ្លូវការទូតក្នុងប្រទេសប៉ូឡូញ។ នេះបើតាមសេចក្តីរាយការណ៍របស់ AP។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងទៅកាន់សភាជប៉ុនតាមប្រព័ន្ធអនឡាញនៅថ្ងៃពុធនេះ ដោយអំពាវនាវឲ្យមន្ត្រីតាក់តែងច្បាប់ជប៉ុនបន្តដាក់ទណ្ឌកម្មលើរុស្ស៊ី ដោយសារតែការឈ្លានពានរបស់រុស្ស៊ីលើប្រទេសអ៊ុយក្រែនដើម្បីដាក់សម្ពាធលើរដ្ឋាភិបាលរុស្ស៊ីឲ្យចរចារកសន្តិភាពវិញ។ លោក Zelenskyy បានសរសើររដ្ឋាភិបាលជប៉ុនដែលបានក្លាយជាប្រទេសក្នុងតំបន់អាស៊ីដំបូងគេដែលបានដាក់ទណ្ឌកម្មលើរុស្ស៊ី ហើយបានស្នើឲ្យជប៉ុនចាត់វិធានការនានាបន្តទៀត។ លោកក៏បានថ្លែងថា ទំនាក់ទំនងពាណិជ្ជកម្មជាមួយរុស្ស៊ីគួរតែត្រូវកាត់ផ្តាច់ ហើយថាក្រុមហ៊ុនបរទេសគួរតែដកខ្លួនចេញពីទីផ្សារសេដ្ឋកិច្ចអ៊ុយក្រែនដើម្បីធានាថារាល់ការវិនិយោគទុនរបស់ក្រុមហ៊ុនទាំងនេះ មិនផ្តល់ផលចំណេញដល់រុស្ស៊ី។ នេះបើយោងតាមទីភ្នាក់ងារសារព័ត៌មាន AP។
- លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានបញ្ជាក់ជាថ្មីថា ជំហររបស់កម្ពុជា គឺត្រូវចូលរួមបោះឆ្នោត មិនមែនធ្វើអនុបវាទឡើយ នៅក្នុងវេទិកាអន្តរជាតិនានាដែលត្រូវបង្ហាញការសម្រេចចិត្តលើសង្រ្គាមនៅអ៊ុយក្រែន។
២០:៥៨
២៤.៣.២០២២
ថ្ងៃព្រហស្បតិ៍ ទី ២៤ ខែមីនា៖
- ប្រធានាធិបតីសហរដ្ឋអាមេរិកលោក Joe Biden បានថ្លែងថា លោកយល់ថា រុស្ស៊ីគួរតែត្រូវបានដកចេញពីក្រុមប្រទេសមានសេដ្ឋកិច្ចធំៗ G-20 ហើយថា បញ្ហានេះ ត្រូវបានលើកយកមកពិភាក្សានៅក្នុងកិច្ចប្រជុំរបស់លោកជាមួយមេដឹកនាំនានានៃអង្គការអូតង់ នៅទីក្រុងព្រុចសែល ប្រទេសបែលហ្ស៊ិក កាលពីព្រឹកថ្ងៃព្រហស្បតិ៍។ នៅពេលលោកត្រូវបានចោទសួរថាតើរុស្ស៊ីគួរត្រូវបានដកចេញពី G-20 ដែរឬទេនោះ លោក Biden បានឆ្លើយថា៖ «ចម្លើយរបស់ខ្ញុំគឺថា គួរតែដកចេញ តែវាអាស្រ័យលើសមាជិក G-20 ទាំងអស់»។ លោក Biden ក៏បានថ្លែងថា បើសិនប្រទេសជាសមាជិកទាំងអស់ដូចជាឥណ្ឌូណេស៊ី និងប្រទេសឯទៀត មិនយល់ស្របគ្នាចំពោះការដករុស្ស៊ីចេញនោះលោកយល់ថា អ៊ុយក្រែនគួរតែត្រូវបានអនុញ្ញាតឲ្យចូលរួមកិច្ចប្រជុំនានា [របស់ G-20]។ នេះបើតាមទីភ្នាក់ងារព័ត៌មាន Reuters។
- នៅក្នុងសន្និសីទសារព័ត៌មានរបស់លោកនៅទីក្រុងព្រុចសែល កាលពីថ្ងៃព្រហស្បតិ៍ លោកប្រធានាធិបតី Biden បានថ្លែងថា ការឆ្លើយតបរបស់អូតង់បើសិនជារុស្ស៊ីប្រើអាវុធសារធាតុគីមីនៅក្នុងការឈ្លានពានរបស់ខ្លួនលើអ៊ុយក្រែន «នឹងអាស្រ័យលើកាលៈទេសៈនៃការប្រើប្រាស់ [អាវុធ]»។ លោកបានថ្លែងថា៖ យើងអាចឆ្លើយតប។ យើងអាចឆ្លើយតប។ បើ [Putin] ប្រើអាវុធបែបនេះ វិធីនៃការឆ្លើយតប«នឹងអាស្រ័យទៅលើកាលៈទេសៈនៃការប្រើប្រាស់អាវុធ»។ នេះបើតាមសេចក្តីរាយការណ៍របស់កាសែត The Washington Post។
- នៅទីក្រុងព្រុចសែល លោកប្រធានាធិបតីសហរដ្ឋអាមេរិក Joe Biden បានប្រាប់ក្រុមអ្នកសារព័ត៌មានក្នុងសន្និសីទសារព័ត៌មានមួយកាលពីថ្ងៃព្រហស្បតិ៍នៅក្នុងកិច្ចប្រជុំកំពូលអូតង់ថា លោកជឿថា វាអាស្រ័យលើប្រទេសអ៊ុយក្រែនក្នុងការសម្រេចថាតើគួរប្រគល់ដែនដីរបស់ខ្លួនទៅឲ្យរុស្ស៊ី ដើម្បីជាថ្នូរបញ្ឈប់ការឈ្លានពាននេះឬយ៉ាងណា។ លោកបានថ្លែងថា៖ «នេះគឺជាសេចក្តីសម្រេចចិត្តទាំងស្រុងរបស់ប្រទេសអ៊ុយក្រែន។ កិច្ចការដែលពាក់ព័ន្ធនឹងអ៊ុយក្រែនត្រូវតែធ្វើឡើងដោយអ៊ុយក្រែន។ ខ្ញុំមិនជឿថា អ៊ុយក្រែននឹងប្រគល់ដែនដីទៅឲ្យរុស្ស៊ីនោះទេ»។ នេះបើតាមសេចក្តីរាយការណ៍របស់កាសែត The Washington Post។
- កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិកលោក Joe Biden បានថ្លែងថា ចិនយល់ថាអនាគតសេដ្ឋកិច្ចរបស់ចិនគឺពាក់ព័ន្ធច្រើនជាមួយបណ្តាប្រទេសលោកខាងលិចច្រើនជាងជាមួយប្រទេសរុស្ស៊ី បន្ទាប់ពីលោកបានព្រមានចិនអំពីផលលំបាកដែលចិននឹងទទួល បើសិនចិនជួយរដ្ឋាភិបាលរុស្ស៊ីក្នុងការធ្វើសង្គ្រាមក្នុងប្រទេសអ៊ុយក្រែន។ លោកបានថ្លែងអំពីកិច្ចសន្ទនាដែលលោកបានធ្វើឡើងជាមួយមេដឹកនាំចិនគឺលោក ស៊ី ជីនពីង ថា៖ «ខ្ញុំមិនបានគំរាមទេ ប៉ុន្តែខ្ញុំបានបញ្ជាក់យ៉ាងច្បាស់ជាមួយគាត់ [លោក ស៊ី ជីនពីង]» ធានាថាលោកបានយល់អំពីផលលំបាកដែលកើតចេញពីការជួយដល់រុស្ស៊ី។ នេះបើតាមសេចក្តីរាយការណ៍របស់ Reuters។
លោកប្រធានាធិបតីអាមេរិក Joe Biden ថ្លែងនៅក្នុងសន្និសីទសារព័ត៌មានមួយនៅទីស្នាក់ការកណ្តាលរបស់អង្គការអូតង់ ក្នងុទីក្រុងព្រុចសែល ប្រទេសបែលហ្ស៊ិក ថ្ងៃទី ២៤ ខែមីនា ឆ្នាំ ២០២២។ - លោក Karim Khan ប្រធានរដ្ឋអាជ្ញានៃតុលាការឧក្រិដ្ឋកម្មអន្តរជាតិ (ICC) នៅថ្ងៃព្រហស្បតិ៍នេះបានស្នើបណ្ដាប្រទេសដែលជាសម្ព័ន្ធភាពមួយឱ្យគាំទ្រការស៊ើបអង្កេតរបស់លោកអំពីឧក្រិដ្ឋម្មសង្គ្រាមនៅក្នុងប្រទេសអ៊ុយក្រែន ដោយលោកបាននិយាយថា៖ «ស្ថានការណ៍អាចកាន់តែអាក្រក់ជាងនេះទៀត» ប្រសិនបើសហគមន៍អន្តរជាតិមិនចាត់វិធានការនៅពេលឥឡូវនេះទេ។ នេះបើយោងតាមទីភ្នាក់ងារព័ត៌មាន Reuters។ លោក Khan បានបើកការស៊ើបអង្កេតផ្លូវការលើឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិនៅក្នុងប្រទេសអ៊ុយក្រែនកាលពីថ្ងៃទី ២៨ ខែកុម្ភៈកន្លងទៅនេះ គឺក្នុងពេល ៤ ថ្ងៃក្រោយមក បន្ទាប់ពីរុស្ស៊ីបានឈ្លានពានអ៊ុយក្រែន។
- សម្ដេចសង្ឈកាតូលិក Francis នៅថ្ងៃព្រហស្បតិ៍នេះ បានរិះគន់លើការបង្កើនការចំណាយផ្នែកយោធារបស់បណ្ដាបស្ចិមប្រទេសបន្ទាប់ពីរុស្ស៊ីបានឈ្លានពានលើអ៊ុយក្រែនថាជា «អំពើឆ្កួតលីលា» និងបានមានសង្ឃដីកាថា គេត្រូវតែរកវិធីថ្មីដើម្បីធ្វើឱ្យអំណាចនៅលើពិភពលោកមានតុល្យភាព។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសសហរដ្ឋអាមេរិកលោក Antony Blinken បានសរសេរនៅលើ Twitter នៅថ្ងៃព្រហស្បតិ៍នេះអំពីទណ្ឌកម្មថ្មីដែលសហរដ្ឋអាមេរិកដាក់លើប្រទេសរុស្ស៊ី ដោយសារតែរុស្ស៊ីនៅតែបន្តធ្វើសង្គ្រាមនៅក្នុងប្រទេសអ៊ុយក្រែន។ លោកបានបញ្ជាក់ដូច្នេះថា៖ «នៅថ្ងៃនេះ សហរដ្ឋអាមេរិកបានកំណត់ដាក់ទណ្ឌកម្មលើបុគ្គល ៣២៨ នាក់នៃរដ្ឋសភារុស្ស៊ី បុគ្គលមួយចំនួនទៀតនៃក្រុមហ៊ុននានារបស់រុស្ស៊ីដែលផ្ដោតលើផ្នែកការពារ និងប្រធានធនាគារ Sberbank ដែលជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ីលោក Vladimir Putin។ សហរដ្ឋអាមេរិកនឹងបន្តដាក់ទណ្ឌកម្មលើលោក Putin សម្រាប់សង្គ្រាមដែលលោកបានធ្វើលើអ៊ុយក្រែន»។
- មហាសន្និបាតអង្គការសហប្រជាជាតិបានបោះឆ្នោតនៅថ្ងៃព្រហស្បតិ៍នេះលើសេចក្ដីសម្រេចមួយ ដែលមានការគាំទ្រពីប្រទេសជាង ៩០ ដោយថ្កោលទោសប្រទេសរុស្ស៊ីថាបានធ្វើឱ្យវិបត្តិមនុស្សធម៌កាន់តែរីករាលដាលឡើងនៅក្នុងប្រទេសអ៊ុយក្រែន និងបានទាមទារឱ្យរុស្ស៊ីបញ្ឈប់ការបង្កសង្គ្រាមជាបន្ទាន់ ជាពិសេសការវាយប្រហារលើជនស៊ីវិល ផ្ទះសម្បែង សាលារៀន និងមន្ទីរពេទ្យ។ នេះបើយោងតាមទីភ្នាក់ងារព័ត៌មាន AP។ រុស្ស៊ីបានច្រានចោលសេចក្ដីសម្រេចនេះថាមានលក្ខណៈ «ប្រឆាំងនឹងរុស្ស៊ី»។
លោកប្រធានាធិបតី Joe Biden និងក្រុមមេដឹកនាំបណ្តាប្រទេសជាសមាជិកអង្គការអូតង់ ថតរូបផ្លូវការរួមគ្នានៅទីស្នាក់ការកណ្តាលរបស់អូតង់ ក្នុងទីក្រុងព្រុចសែល ប្រទេសបែលហ្ស៊ិក ថ្ងៃទី ២៤ ខែមីនា ឆ្នាំ ២០២២។ - ប្រធានាធិបតីសហរដ្ឋអាមេរិកលោក Joe Biden បានចេញសេចក្ដីថ្លែងការណ៍មួយ បន្ទាប់ពីកិច្ចប្រជុំវិសាមញ្ញរបស់អង្គការអូតង់ (NATO) បានបញ្ចប់ទៅនៅថ្ងៃព្រហស្បតិ៍នេះ។ លោកបញ្ជាក់នៅក្នុងសេចក្ដីថ្លែងការណ៍នោះថា៖ «ខ្ញុំស្វាគមន៍វិធានការនានារបស់សម្ព័ន្ធមិត្តផ្សេងៗជាច្រើននៅក្នុងការផ្ដល់ការគាំទ្រផ្នែកការពារដល់ប្រទេសអ៊ុយក្រែន ហើយយើងរួមគ្នាប្ដេជ្ញាកំណត់អំពីឧបករណ៍បន្ថែមទៀត ដែលរួមមានទាំងប្រព័ន្ធការពារដែនអាកាសផងដែរ ដើម្បីជួយអ៊ុយក្រែន»។ លោកបានបន្ថែមថា៖ «យើងក៏បានពិភាក្សាគ្នាផងដែរអំពីកិច្ចការរបស់យើងនៅក្នុងការពង្រឹងការការពាររួមរបស់អង្គការអូតង់ ជាពិសេសការការពារសមាជិករបស់អូតង់នៅតំបន់ភាគខាងកើតនៃទ្វីបអឺរ៉ុប។ សេចក្ដីថ្លែងការណ៍រួមរបស់យើងនៅថ្ងៃនេះបង្ហាញយ៉ាងច្បាស់ថា អង្គការអូតង់នៅតែមានភាពខ្លាំងក្លានិងមានការរួបរួមដូចពេលកន្លងមកដូច្នេះដែរ»។
- ជនភៀសខ្លួនអ៊ុយក្រែននៅក្នុងប្រទេសប៉ូឡូញបានជំរុញនៅថ្ងៃព្រហស្បតិ៍នេះឱ្យមហាអំណាចបស្ចិមប្រទេសនានាធ្វើកិច្ចការបន្ថែមទៀតដើម្បីការពារប្រទេសអ៊ុយក្រែនពីការឈ្លានពានរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។ ពួកគេធ្វើការអំពាវនាវដូចនេះ ស្របពេលដែលមេដឹកនាំនានាជួបពិភាក្សាគ្នានៅក្នុងទីក្រុងព្រុចសែល ប្រទេសបែលហ្ស៊ិក នៅក្នុងសន្និសីទកំពូលរបស់អង្គការអូតង់ (NATO) របស់ក្រុមប្រទេស G-7 និងរបស់សហភាពអឺរ៉ុប។
- បណ្ដាមេដឹកនាំនៃប្រទេសជាសមាជិកអង្គការអូតង់ (NATO) បានឯកភាពគ្នាពន្យារអាណត្តិដឹកនាំមួយឆ្នាំឱ្យលោកអគ្គលេខាធិការ Jens Stoltenberg ដើម្បីជួយដឹកនាំអង្គការអូតង់ដែលមានប្រទេស ៣០ ជាសមាជិក ឆ្លងកាត់វិបត្តិសន្តិសុខដែលបង្កឡើងដោយសារសង្គ្រាមរបស់រុស្ស៊ីលើអ៊ុយក្រែន។ លោក Stoltenberg បានសរសេរនៅលើ Twitter នៅថ្ងៃព្រហស្បតិ៍នេះថា លោកមាន «កិត្តិយស» ដែលបណ្ដាមេដឹកនាំនៃប្រទេសជាសមាជិកអង្គការអូតង់សម្រេច «ពន្យារអណត្តិ» ឱ្យលោកធ្វើជា «អគ្គលេខាធិការរហូតដល់ថ្ងៃទី ៣០ ខែកញ្ញា ឆ្នាំ ២០២៣»។ នេះបើយោងតាមទីភ្នាក់ងារព័ត៌មាន AP។
- អង្គការអូតង់ (NATO) បានចេញសេចក្ដីថ្លែងការណ៍មួយ បន្ទាប់ពីកិច្ចប្រជុំវិសាមញ្ញរបស់បណ្ដាមេដឹកនាំនៃប្រទេសជាសមាជិករបស់អង្គការនេះបានបញ្ចប់ទៅនៅថ្ងៃព្រហស្បតិ៍នេះនៅក្នុងទីក្រុងព្រុចសែល ប្រទេសបែលហ្ស៊ិក។ បណ្ដាមេដឹកនាំដែលបានចូលរួមប្រជុំបានឯកភាពគ្នាពង្រឹងសមត្ថភាពរបស់ប្រទេសជាសមាជិកមួយចំនួនរបស់ខ្លួននៅតំបន់អឺរុបខាងកើត នៅចំពេលប្រឈមជាមួយនឹងស្ថានការណ៍សង្គ្រាមរបស់រុស្ស៊ីនៅអ៊ុយក្រែន។ បណ្ដាមេដឹកនាំទាំងនេះក៏បានព្រមានរុស្ស៊ីផងដែរមិនឱ្យប្រើអាវុធគីមី។ សេចក្ដីថ្លែងការណ៍រួមនៃកិច្ចប្រជុំរបស់អង្គការនេះបានបញ្ជាក់ថា៖ «យើងនៅតែរួបរួមគ្នាជាធ្លុងមួយនិងតាំងចិត្តយ៉ាងមុតមាំនៅក្នុងការប្រឆាំងនឹងការឈ្លានពានរបស់រុស្ស៊ី [លើអ៊ុយក្រែន] ជួយរដ្ឋាភិបាលនិងប្រជាពលរដ្ឋអ៊ុយក្រែន និងការពារសន្តិសុខរបស់ប្រទេសជាសម្ព័ន្ធមិត្តទាំងអស់»។
- ក្រសួងការបរទេសរុស្ស៊ីបានចោទប្រកាន់ប្រទេសប៉ូឡូញនៅថ្ងៃព្រហស្បតិ៍នេះថាបានធ្វើឱ្យស្ថានការណ៍តានតឹងនៅតំបន់អឺរ៉ុបខាងកើតកាន់តែរីករាលដាលឡើង ដោយសារប៉ូឡូញបានបណ្ដេញមន្ត្រីការទូតរុស្ស៊ី ៤៥ នាក់ ចេញពីប្រទេស ក្រោមបទចោទប្រកាន់ថាបានប្រព្រឹត្តិអំពើចារកម្ម។ នេះបើយោងតាមទីភ្នាក់ងារព័ត៌មាន AFP។
- លោក Oleg Nikolenko អ្នកនាំពាក្យក្រសួងការបរទេសអ៊ុយក្រែន នៅថ្ងៃព្រហស្បតិ៍នេះ បានថ្កោលទោសរដ្ឋាភិបាលរុស្ស៊ីថាបានចាប់បញ្ជូនពលរដ្ឋនៃទីក្រុង Mariupol របស់ប្រទេសអ៊ុយក្រែនដោយបង្ខំទៅកាន់ប្រទេសរុស្ស៊ី។
បុរសម្នាក់បានប្រមូលសម្លៀកបំពាក់ចេញពីផ្ទះដែលត្រូវបានបំផ្លាញនៅទីក្រុង Zhytomyr នៅភាគខាងជើងអ៊ុយក្រែន កាលពីថ្ងៃទី ២៣ ខែមីនា ឆ្នាំ ២០២២។ - រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍នេះថា នាយករដ្ឋមន្ត្រីចក្រភពអង់គ្លេសលោក Boris Johnson គឺជាមេដឹកនាំដ៏សកម្មបំផុតនៅក្នុងការប្រឆាំងនឹងរុស្ស៊ី ប៉ុន្តែថា វិធានការរបស់រដ្ឋាភិបាលចក្រភពអង់គ្លេសនោះនឹងឈានទៅដល់ចំណុចទាល់ច្រក។ ទីភ្នាក់ងារព័ត៌មាន RIA របស់រុស្ស៊ីបានដកស្រង់សម្ដីរបស់អ្នកនាំពាក្យរដ្ឋាភិបាលរុស្ស៊ីលោក Dmitry Peskov ដែលថា៖ «សម្រាប់លោក Johnson យើងយល់ថា លោកគឺជាជនដ៏សកម្មបំផុតម្នាក់ដែលចូលរួមនៅក្នុងការប្រឆាំងនឹងរុស្ស៊ី។ គោលនយោបាយការបរទេសនេះនឹងឈានទៅដល់ចំណុចទាល់ច្រក»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden និងបណ្ដាមេដឹកនាំបស្ចិមប្រទេសដែលជាសម្ព័ន្ធមិត្ត បានចាប់ផ្តើមកិច្ចប្រជុំកំពូលនៅទីស្នាក់ការកណ្តាលរបស់អង្គការអូតង់ (NATO) នៅថ្ងៃព្រហស្បតិ៍នេះ ដើម្បីដាក់សម្ពាធបន្ថែមលើប្រធានាធិបតីរុស្ស៊ីលោកVladimir Putin ចំពោះការឈ្លានពានរបស់រុស្ស៊ីលើប្រទេសអ៊ុយក្រែន និងដើម្បីរកដំណោះស្រាយទប់ទល់នឹងបញ្ហាប្រឈមផ្នែកសន្តិសុខនិងសេដ្ឋកិច្ចដែលកំពុងរីករាលដាលនៅទ្វីបអឺរ៉ុបនិងនៅជុំវិញពិភពលោក។ នេះបើយោងតាមទីភ្នាក់ងារព័ត៌មាន AP។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវឲ្យមនុស្សនៅជុំវិញពិភពលោកប្រមូលផ្តុំគ្នាជាសាធារណៈនៅថ្ងៃព្រហស្បតិ៍នេះ ដើម្បីបង្ហាញការគាំទ្រដល់ប្រទេសរបស់លោកដែលកំពុងទប់ទល់នឹងការឈ្លានពានរបស់រុស្ស៊ី ខណៈប្រធានាធិបតីសហរដ្ឋអាមេរិកលោក Joe Biden និងបណ្ដាមេដឹកនាំបស្ចិមប្រទេសកំពុងជួបពិភាក្សាគ្នាអំពីការដាក់សម្ពាធលើរុស្ស៊ីឲ្យបញ្ឈប់ការឈ្លានពានរបស់ខ្លួនលើប្រទេសអ៊ុយក្រែន។ លោក Zelenskyy បានថ្លែងជាភាសាអង់គ្លេសក្នុងវីដេអូមួយកាលពីយប់ថ្ងៃពុធថា៖ «សូមចេញមកជួបជុំគ្នានៅតាមទីលាននិងដងផ្លូវនានា។ សូមបង្ហាញខ្លួនអ្នកនិងសំឡេងរបស់អ្នក។ សូមនិយាយថា ប្រជាពលរដ្ឋមានសារៈសំខាន់ សេរីភាពមានសារៈសំខាន់ សន្តិភាពមានសារៈសំខាន់ អ៊ុយក្រែនមានសារៈសំខាន់»។ នេះបើយោងតាមទីភ្នាក់ងារព័ត៌មាន AP។
- បណ្តាប្រទេសជាសមាជិកនៃសហភាពអឺរ៉ុបបានចុះហត្ថលេខាលើកញ្ចប់ជំនួយយោធាមួយទៀតដែលមានទឹកប្រាក់ប្រមាណ ៥៥០ លានដុល្លារអាមេរិកសម្រាប់ប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AP។
បាវខ្សាច់ត្រូវបានដាក់គរលើគ្នាដើម្បីធ្វើជារនាំងការពារការវាយប្រហាររបស់ទាហានរុស្ស៊ី នៅមុខមហោស្រពអូប៉េរ៉ានិងរបាំបាឡេនៃបណ្ឌិតសភាជាតិអ៊ុយក្រែន នៅក្នុងទីក្រុង Odesa ប្រទេសអ៊ុយក្រែន ថ្ងៃទី ២៤ ខែមីនា ឆ្នាំ ២០២២។
- រូបភាពដែលត្រូវបានចែកចាយនៅលើបណ្តាញសង្គមអនឡាញកាលពីពេលថ្មីៗនេះបានបង្ហាញឱ្យឃើញ ដ្រូនរាងដូចយន្តហោះមួយប្រវែងប្រមាណជាងមួយម៉ែត្របានធ្លាក់ពីលើអកាសនៅក្នុងតំបន់វាលខ្សាច់មួយក្នុងទីក្រុងកៀវ ប្រទេសអ៊ុយក្រែន។ ដ្រូននេះមិនបានផ្ទុះពេលធ្លាក់លើដីនោះទេ។ រូបភាពដែលត្រូវបានផ្ទៀងផ្ទាត់ដោយកាសែត The Washington Post នេះបានផ្តល់នូវភស្តុតាងថ្មីជាលើកដំបូងដែលថា រុស្ស៊ីកំពុងប្រើប្រាស់អាវុធថ្មីដ៏សាហាវនៅក្នុងការឈ្លានពានរបស់ខ្លួនលើប្រទេសអ៊ុយក្រែន។ អាវុធនោះគឺដ្រូនពិឃាតដែលអាចទម្លាក់គ្រាប់បែកចំគោលដៅបានដោយស្ទើរតែមិនឱ្យដឹងខ្លួនជាមុន។
- អធិការបតីអាល្លឺម៉ង់លោក Olaf Scholz បានច្រានចោលការអំពាវនាវឲ្យមានការធ្វើពហិការលើសេវាផ្គត់ផ្គង់ថាមពលរបស់រុស្ស៊ី ដោយថ្លែងថា ការធ្វើដូច្នេះអាចបង្កឲ្យមានការខូចខាតយ៉ាងខ្លាំងដល់ប្រទេសអាល្លឺម៉ង់។ លោក Scholz កំពុងប្រឈមនឹងសម្ពាធពីក្រុមសកម្មជនបរិស្ថានឲ្យចាត់វិធានការភ្លាមៗដើម្បីឲ្យអាល្លឺម៉ង់ឈប់ប្រើប្រាស់ថាមពលដែលផ្គត់ផ្គង់ដោយរុស្ស៊ី ក៏ប៉ុន្តែលោកថា ការចាត់វិធានការបែបនេះគឺត្រូវការពេលវេលា។ នេះបើយោងតាមទីភ្នាក់ងារព័ត៌មាន AP។
- ក្រុមប្រយុទ្ធថ្មីចំនួន ៤ របស់អង្គការអូតង់ (NATO) ដែលជាទូទៅមានទាហានក្នុងចន្លោះពី ១.០០០ ទៅ ១.៥០០ នាក់ កំពុងត្រូវបានបង្កើតឡើងនៅប្រទេសហុងគ្រី ស្លូវ៉ាគី រ៉ូម៉ានី និងប៊ុលហ្គារី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
- មន្ត្រីរដ្ឋាភិបាលសហរដ្ឋអាមេរិកជាន់ខ្ពស់ពីររូបដែលថ្លែងក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា នៅថ្ងៃព្រហស្បតិ៍នេះ ប្រធានាធិបតីអាមេរិកលោក Joe Biden គ្រោងនឹងប្រកាសអំពីផែនការរបស់សហរដ្ឋអាមេរិកដើម្បីទទួលយកក្នុងចំនួនប្រមាណ ១ សែននាក់នូវជនភៀសខ្លួនអ៊ុយក្រែននិងជនភៀសខ្លួនដទៃទៀតដែលរត់ភៀសខ្លួនពីសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។ នេះបើយោងតាមកាសែត The Washington Post។
- ក្រុមមេដឹកនាំនៃអង្គការអូតង់ (NATO) បានបញ្ជាក់ថា ខ្លួនមិនទាត់ចោលជម្រើសប្រឆាំងតបតនឹងរុស្ស៊ីនោះទេ ប្រសិនបើរុស្ស៊ីប្រើអាវុធគីមីវាយប្រហារលើអ៊ុយក្រែន។ នេះបើយោងតាមទីភ្នាក់ងារព័ត៌មាន AP។
- កងទ័ពជើងទឹករបស់អ៊ុយក្រែនបានបញ្ជាក់នៅថ្ងៃព្រហស្បតិ៍នេះថា ខ្លួនបានបំផ្លាញនាវាសំចតដ៏ធំមួយរបស់រុស្ស៊ីឈ្មោះ Orsk នៅក្បែរទីក្រុងកំពង់ផែ Berdyansk។ នេះគឺជាសេចក្តីថ្លែងការណ៍ខ្លីមួយដែលបង្ហោះនៅលើបណ្តាញសង្គម Facebook ដោយមានភ្ជាប់ជាមួយនឹងរូបភាពនិងវីដេអូដែលបង្ហាញអំពីទិដ្ឋភាពឆាបឆេះនិងផ្សែងខ្មួលខ្មាញ់នៅកំពង់ផែក្រុង Berdyansk។ យោធារុស្ស៊ីមិនទាន់បានបញ្ជាក់អំពីអ្វីដែលបានកើតឡើងចំពោះនាវានោះនៅឡើយទេ។ នេះបើយោងតាមទីភ្នាក់ងារព័ត៌មាន AP។
- ក្រសួងការបរទេសអាមេរិកថា រុស្ស៊ីបានចាត់ផ្តើមដំណើរការបណ្តេញមន្ត្រីការទូតអាមេរិកមួយចំនួនជាបន្តបន្ទាប់ទៀតចេញពីស្ថានទូតអាមេរិកប្រចាំទីក្រុងមូស្គូ។ នេះបើយោងតាមទីភ្នាក់ងារព័ត៌មាន AP។
- គណៈកម្មាធិការអន្តរជាតិកាកបាទក្រហម (ICRC) បានបញ្ជាក់នៅថ្ងៃព្រហស្បតិ៍នេះថា កិច្ចព្រមព្រៀងរវាងទាហានរុស្ស៊ីនិងទាហានអ៊ុយក្រែនគឺត្រូវការជាចំបាច់ មុនពេលជនស៊ីវិលអាចត្រូវបានជម្លៀសចេញពីប្រទេសអ៊ុយក្រែនឲ្យបានត្រឹមត្រូវ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់ប្រាប់សមាជិកសភាស៊ុយអែតនៅថ្ងៃព្រហស្បតិ៍នេះថា រុស្ស៊ីនឹង «បំផ្លាញសេរីភាព» នៅអឺរ៉ុប ហើយនឹងបន្តឈ្លានពានប្រទេសជិតខាងរបស់ខ្លួន។ លោកបានថ្លែងនៅក្នុងសុន្ទរកថាជាវីដេអូមួយ ដែលទទួលបានការសាទរពីសមាជិកសភាស៊ុយអែតថា៖ «ប្រសិនបើអ៊ុយក្រែនមិនតស៊ូក្រាញននាលនិងការពារខ្លួនឯងនោះទេ នោះមានន័យថា...ប្រទេសជិតខាងរុស្ស៊ីទាំងអស់ស្ថិតក្នុងគ្រោះថ្នាក់ចាប់ពីពេលនេះតទៅ»។ លោកបានបន្ថែមថា៖ «រុស្ស៊ីធ្វើសង្គ្រាមប្រឆាំងអ៊ុយក្រែន ដោយសារតែរុស្ស៊ីចង់រុលទៅមុខបន្ថែមទៀតទៅទ្វីបអឺរ៉ុប។ រុស្ស៊ីចង់បំផ្លាញសេរីភាពនៅអឺរ៉ុប»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានចោទប្រកាន់ប្រទេសរុស្ស៊ីនៅថ្ងៃព្រហស្បតិ៍នេះថាបានប្រើអាវុធគីមីផូស្វ័រនៅក្នុងប្រទេសអ៊ុយក្រែន។ លោកបានថ្លែងនៅក្នុងសារជាវីដេអូទៅកាន់អង្គការអូតង់ (NATO) ដូច្នេះថា៖ «នៅព្រឹកនេះ [រុស្ស៊ី] បានប្រើគ្រាប់បែកគីមីផូស្វ័រ។ មនុស្សពេញវ័យនិងកុមារត្រូវបានសម្លាប់ទៀតហើយ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានជំរុញអង្គការអូតង់ (NATO) នៅថ្ងៃព្រហស្បតិ៍នេះឱ្យផ្ដល់ជំនួយយោធាដោយគ្មានការដាក់កំហិតដល់រដ្ឋាភិបាលអ៊ុយក្រែន។ លោកបានថ្លែងប្រាប់ក្រុមអ្នកតំណាងអង្គការអូតង់តាមវីដេអូថា៖ «ដើម្បីជួយសង្គ្រោះប្រជាពលរដ្ឋនិងទីក្រុងនានារបស់អ៊ុយក្រែន អ៊ុយក្រែនត្រូវការជំនួយយោធាដោយគ្មានការដាក់កំហិត គឺដូចទៅនឹងវិធីដែលរុស្ស៊ីបានប្រើសព្វាវុធគ្រប់យ៉ាងរបស់ខ្លួនលើអ៊ុយក្រែនដោយគ្មានការដាក់កំហិតដូច្នេះដែរ»។ នេះបើយោងតាមទីភ្នាក់ងារព័ត៌មាន AFP។
រូបពីវីដេអូដោយការិយាល័យសារព័ត៌មានរបស់ប្រធានាធិបតីអ៊ុយក្រែន លោក Volodymyr Zelenskyy ថ្លែងសុន្ទរកថានៅទីក្រុងកៀវ ប្រទេសអ៊ុយក្រែន ថ្ងៃទី ២៤ ខែមីនា ឆ្នាំ ២០២២។
- អង្គការសហប្រជាជាតិបានបញ្ជាក់នៅថ្ងៃព្រហស្បតិ៍នេះថា កុមារជាងពាក់កណ្ដាលក្នុងចំណោមកុមារនៅអ៊ុយក្រែនទាំងអស់បានភៀសខ្លួនចេញពីផ្ទះសម្បែង តាំងពីពេលដែលរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។ អង្គការយូនីសេហ្វ (UNICEF) បានលើកឡើងថា៖ «សង្គ្រាមរយៈពេលមួយខែកន្លងមកនេះនៅអ៊ុយក្រែនបានធ្វើឱ្យកុមារ ៤ លាន ៣ សែននាក់ភៀសខ្លួន។ ចំនួននេះស្មើនឹងជាងពាក់កណ្ដាលនៃកុមារសរុបប្រហែល ៧ លាន ៥ សែននាក់នៅអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
- ក្រុមហ៊ុនថាមពល Gazprom របស់រុស្ស៊ីបានបញ្ជាក់នៅថ្ងៃព្រហស្បតិ៍នេះថា ខ្លួននៅបន្តផ្គត់ផ្គង់ឧស្ម័នធម្មជាតិទៅឱ្យទ្វីបអឺរ៉ុបតាមរយៈប្រទេសអ៊ុយក្រែន ស្របតាមសំណើរបស់អតិថិជិននៅអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃព្រហស្បតិ៍នេះឱ្យមានសាមគ្គីភាពជាសាកលមួយនៅចំខួបមួយខែនៃការឈ្លានពានរបស់រុស្ស៊ីលើអ៊ុយក្រែន ដោយលោកបានជំរុញប្រជាពលរដ្ឋនៅជុំវិញពិភពលោកឱ្យចេញអំពាវនាវតាមដងផ្លូវឱ្យមេដឹកនាំនានាដែលជួបប្រជុំគ្នានៅអឺរ៉ុបបង្កើនវិធានការប្រឆាំងនឹងរុស្ស៊ី។ លោក Zelenskyy បានបញ្ជាក់នៅក្នុងសុន្ទរកថាជាវីដេអូមួយថា៖ «សូមចេញពីការិយាល័យរបស់អ្នក ផ្ទះរបស់អ្នក សាលារៀននិងសាកលវិទ្យាល័យរបស់អ្នក សូមចេញមកក្នុងនាមសន្តិភាព សូមចេញមកដោយមាននិមិត្តសញ្ញាអ៊ុយក្រែនដើម្បីគាំទ្រអ៊ុយក្រែន សេរីភាព និងជីវិត»។ នេះបើយោងតាមទីភ្នាក់ងារព័ត៌មាន Reuters។
- ឧបនាយករដ្ឋមន្ត្រីអ៊ុយក្រែនអ្នកស្រី Iryna Vereshchuk បាននិយាយថា កិច្ចព្រមព្រៀងត្រូវបានធ្វើឡើងនៅថ្ងៃព្រហស្បតិ៍នេះដើម្បីបង្កើតច្រករបៀងមនុស្សធម៌ចំនួន ៧ ដើម្បីជម្លៀសជនស៊ីវិលចេញពីប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- នាយករដ្ឋមន្ត្រីចក្រភពអង់គ្លេសលោក Boris Johnson បាននិយាយនៅថ្ងៃព្រហស្បតិ៍នេះថា ចក្រភពអង់គ្លេសនិងបណ្ដាសម្ព័ន្ធមិត្តបស្ចិមប្រទេសរបស់ខ្លួននឹងបង្កើនការដាក់សម្ពាធសេដ្ឋកិច្ចលើប្រទេសរុស្ស៊ី និងកំពុងពិចារណាថាតើអាចធ្វើអ្វីបន្ថែមទៀតដើម្បីរារាំងប្រធានាធិបតីរុស្ស៊ីលោក Vladimir Putin មិនឱ្យទទួលបានមាសបម្រុងទុករបស់ខ្លួន។ នៅមុនកិច្ចប្រជុំរបស់អង្គការអូតង់ (NATO) ចូលមកដល់ លោក Johnson បានប្រាប់វិទ្យុ LBC របស់អង់គ្លេសថា លោក Putin បានដើរហួសបន្ទាត់ក្រហមរួចហើយ និងថា លោក Putin គួរតែបង្ហាញខ្លួននៅពីមុខតុលាការឧក្រិដ្ឋកម្មអន្តរជាតិ (ICC)។ នេះបើយោងតាមទីភ្នាក់ងារព័ត៌មាន Reuters។
- ប្រទេសតួកគីបានអំពាវនាវឱ្យមានកិច្ចប្រឹងប្រែងខ្លាំងជាងមុនដើម្បីសម្រេចឱ្យបាននូវកិច្ចឈប់វាយប្រយុទ្ធគ្នានៅក្នុងប្រទេសអ៊ុយក្រែន និងបានសន្យាថានឹងបន្តកិច្ចការ «សម្រុះសម្រួលនិងសម្របសម្រួល» ជម្លោះរវាងរុស្ស៊ីនិងអ៊ុយក្រែន។ កន្លងមក តួកគីបានគាំទ្រអ៊ុយក្រែននិងរិះគន់ការឈ្លានពានរបស់រុស្ស៊ី ប៉ុន្តែបានប្រឆាំងនឹងការដាក់ទណ្ឌកម្មលើរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden បានធ្វើដំណើរទៅដល់ទីក្រុងប៊្រុចសែល ប្រទេសប៊ែលហ្ស៊ិកដើម្បីចូលរួមក្នុងកិច្ចប្រជុំបន្ទាន់នានាដើម្បីឆ្លើយតបទៅនឹងសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។ លោក Biden បានចូលរួមក្នុងជំនួបខ្លីមួយជាមួយនឹងអគ្គលេខាធិការអង្គការអូតង់ (NATO) លោក Jens Stoltenberg និងបានថតរូបជាលក្ខណៈគ្រួសារជាមួយនឹងមេដឹកនាំផ្សេងៗទៀតនៃអង្គការអូតង់។ កិច្ចប្រជុំរបស់ក្រុមប្រឹក្សាអឺរ៉ុបនៃសហភាពអឺរ៉ុបនិងកិច្ចប្រជុំរបស់ក្រុមប្រទេស G-7 ក៏នឹងធ្វើឡើងនៅថ្ងៃព្រហស្បតិ៍នេះផងដែរ។ នេះបើយោងតាមបណ្ដាញព័ត៌មាន CNN។
អគ្គលេខាធិការអង្គការអូតង់លោក Jens Stoltenberg ថ្លែងក្នុងកិច្ចប្រជុំកំពូលអូតង់អំពីការឈ្លានពានរបស់រុស្ស៊ីលើអ៊ុយក្រែន នៅទីក្រុងព្រុចសែល ប្រទេសបែលហ្ស៊ិក ថ្ងៃទី ២៤ ខែមីនា ឆ្នាំ ២០២២។
- អគ្គលេខាធិការអង្គការអូតង់ (NATO) លោក Jens Stoltenberg បានថ្លែងមុនកិច្ចប្រជុំនៅទីក្រុងប្រ៊ុចសែល ប្រទេសប៊ែលហ្ស៊ិក ចូលមកដល់នៅថ្ងៃព្រហស្បតិ៍នេះថា៖ «ប្រធានាធិបតីរុស្ស៊ីលោក Vladimir Putin បានប្រព្រឹត្តកំហុសដ៏ធំមួយ ដែលនោះគឺការធ្វើសង្គ្រាមប្រឆាំងនឹងប្រទេសជាតិឯករាជ្យអធិបតេយ្យមួយ។ លោកបានមើលស្រាលលើកម្លាំងរបស់ប្រជាពលរដ្ឋអ៊ុយក្រែន ភាពក្លាហានរបស់ប្រជាពលរដ្ឋអ៊ុយក្រែន និងកងទ័ពរបស់អ៊ុយក្រែន។ ដូច្នេះហើយ កងទ័ពរុស្ស៊ីកំពុងប្រឈមនឹងការតតាំងដ៏ខ្លាំងក្លាជាងអ្វីដែលពួកគេបានរំពឹងទុក»។
- ស្ថានទូតសហរដ្ឋអាមេរិកប្រចាំរដ្ឋធានីកៀវ ប្រទេសអ៊ុយក្រែន បានបញ្ជាក់ថា រដ្ឋាភិបាលអ៊ុយក្រែនបានបង្កើតប្រព័ន្ធទិន្នន័យភស្តុតាងមួយអំពីឧក្រិដ្ឋកម្មសង្គ្រាម «ដើម្បីចងក្រងឧក្រិដ្ឋកម្មដែលកងទ័ពរុស្ស៊ីបានប្រព្រឹត្តិលើអ៊ុយក្រែន»។
- លោក Ivan Fedorov អភិបាលក្រុង Melitopol នៃប្រទេសអ៊ុយក្រែន បានបញ្ជាក់ថា កងកម្លាំងរុស្ស៊ីកំពុងប្រព្រឹត្តិអំពើឃោរឃៅ។ លោកបាននិយាយថា កងទ័ពរុស្ស៊ីបានយកជនស៊ីវិលធ្វើជា «ចំណាប់ខ្មាំងនិងជារបាំងការពារ»។ នេះបើយោងតាមសារព័ត៌មាន The Washington Post។
- បណ្ដាញព័ត៌មាន CNN បានរាយការណ៍ដោយយោងទៅលើអភិបាលក្រុង Chernihiv ប្រទេសអ៊ុយក្រែនថា ទីក្រុង Chernihiv មានសាកសពជាច្រើន ហើយទីបញ្ចុះសពនៅក្នុងទីក្រុងមិនមានកន្លែងដែលអាចបញ្ចុះសពអ្នកស្លាប់នៅក្នុងសង្គ្រាមបានទាំងអស់នោះទេ។ អភិបាលក្រុង Chernihiv លោក Vladyslav Atroshenko បាននិយាយថា៖ «ទីបញ្ចុះសពរបស់ទីក្រុង Chernihiv មិនមានកន្លែងគ្រប់គ្រាន់ដើម្បីបញ្ចុះសពអ្នកស្លាប់ទាំងអស់បានទេ ដូច្នេះយើងទុកសពនៅកន្លែងដាក់សពនិងទូត្រជាក់ដាក់សពយូរជាងសព្វដង។ យើងបញ្ចុះសពខ្លះនៅទីបញ្ចុះសពចាស់ៗដែលបានទុកចោលអស់មួយរយៈមកហើយ»។
- ក្រសួងការបរទេសបារាំងបានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃពុធម្សិលមិញថា ខ្លួនបានសន្យាផ្ដល់ថវិកាចំនួន ៥០០.០០០ អឺរ៉ូ ដល់តុលាការឧក្រិដ្ឋកម្មអន្តរជាតិ (ICC) ដើម្បីគាំទ្រការស៊ើបអង្កេតលើឧក្រិដ្ឋកម្មដែលរុស្ស៊ីបានប្រព្រឹត្តិនៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន CNN។