កងទ័ពអ៊ុយក្រែននិងកងទ័ពរុស្ស៊ីនៅបន្តប្រយុទ្ធគ្នាដើម្បីគ្រប់គ្រងរដ្ឋធានីកៀវ
កងទ័ពរុស្ស៊ីបានបន្តប្រយុទ្ធជាមួយនឹងកងទ័ពអ៊ុយក្រែននិងពលរដ្ឋអ៊ុយក្រែនដែលស្ម័គ្រចិត្តចូលរួមប្រយុទ្ធ ដើម្បីគ្រប់គ្រងរដ្ឋធានីកៀវ និងទីក្រុងផ្សេងៗទៀតក្នុងប្រទេសអ៊ុយក្រែន កាលពីថ្ងៃអាទិត្យដែលជាថ្ងៃទី ៤ នៃការឈ្លានពានរបស់រុស្ស៊ីលើអ៊ុយក្រែន។
នៅថ្ងៃអាទិត្យនេះ កងទ័ពរុស្ស៊ីបានចូលដល់ទីក្រុង Kharkiv ដែលជាទីក្រុងធំបំផុតទីពីររបស់អ៊ុយក្រែន ដែលនៅទីនោះពួកគេប្រឈមនឹងការតស៊ូទប់ទល់ដ៏ខ្លាំងក្លារបស់អ៊ុយក្រែន។
អគ្គរដ្ឋអាជ្ញាអ៊ុយក្រែនអ្នកស្រី Iryna Venediktova បាននិយាយថា កងកម្លាំងរុស្ស៊ីមិនអាចដណ្ដើមគ្រប់គ្រងទីក្រុង Kharkiv ដែលស្ថិតនៅចម្ងាយប្រមាណ ៤០ គីឡូម៉ែត្រពីព្រំដែនរុស្ស៊ីបានទេ។ អ្នកស្រីបានបញ្ជាក់ថា ការប្រយុទ្ធដ៏ខ្លាំងក្លាកំពុងបន្ត។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។
ចុចត្រង់នេះដើម្បីអានព័ត៌មានលម្អិត
អ៊ុយក្រែនប្ដឹងរុស្ស៊ីទៅតុលាការយុត្តិធម៌អន្តរជាតិ
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅថ្ងៃអាទិត្យនេះថា ប្រទេសអ៊ុយក្រែនបានដាក់ពាក្យបណ្ដឹងប្រឆាំងរុស្ស៊ីទៅកាន់តុលាការយុត្តិធម៌អន្តរជាតិ (ICJ) នៅក្នុងទីក្រុងឡាអេ ប្រទេសហូឡង់។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោក Zelenskyy បានសរសេរនៅលើ Twitter ថា៖ «ប្រទេសអ៊ុយក្រែនបានដាក់ពាក្យបណ្ដឹងប្រឆាំងនឹងរុស្ស៊ីទៅកាន់តុលាការ ICJ។ រុស្ស៊ីត្រូវតែទទួលខុសត្រូវចំពោះការយកគោលគំនិតដែលថាមានអំពើប្រល័យពូជសាសន៍មកធ្វើជាហេតុផលដើម្បីឈ្លានពាន [ប្រទេសអ៊ុយក្រែន]។
លោកបានបន្ថែមថា៖ «យើងស្នើឱ្យមានសេចក្ដីសម្រេចជាបន្ទាន់មួយដែលបញ្ជារុស្ស៊ីឱ្យបញ្ឈប់សកម្មភាពយោធារបស់ខ្លួននៅពេលឥឡូវនេះ»។
តុលាការ ICJ មិនមានយុត្តាធិការដោយស្វ័យប្រវត្តិនៅក្នុងសំណុំរឿងដែលពាក់ព័ន្ធនឹងប្រទេសទាំងពីរនេះទេ ហើយរដ្ឋាភិបាលអ៊ុយក្រែនចាំបាច់ត្រូវផ្អែកពាក្យបណ្ដឹងរបស់ខ្លួនលើសន្ធិសញ្ញាអង្គការសហប្រជាជាតិមួយ ដើម្បីអាចឱ្យតុលាការនេះមានយុត្តាធិការបើកសំណុំរឿងនេះបាន៕
អ៊ុយក្រែននឹងជួបពិភាក្សាជាមួយរុស្ស៊ីនៅព្រំដែនបេឡារុស
អ៊ុយក្រែនបានឲ្យដឹងនៅថ្ងៃអាទិត្យនេះថា ខ្លួនបានយល់ព្រមជួបចរចាជាមួយនឹងរុស្ស៊ីនៅឯព្រំដែនប្រទេសបេឡារុស។
ខុទ្ទកាល័យប្រធានាធិបតីអ៊ុយក្រែនបានឲ្យដឹងនៅក្នុងសេចក្ដីថ្លែងការណ៍មួយថា៖ «យើងបានយល់ព្រមថា គណៈប្រតិភូអ៊ុយក្រែននឹងជួបជាមួយនឹងគណៈប្រតិភូរុស្ស៊ីដោយគ្មានលក្ខខណ្ឌទុកជាមុន នៅឯព្រំដែនរវាងប្រទេសអ៊ុយក្រែននិងបេឡារុស ក្បែរទន្លេ Pripyat»។
លោក Putin បញ្ជាឲ្យកងកម្លាំងនុយក្លេអ៊ែររុស្ស៊ីត្រៀមខ្លួនរួចជាស្រេចដើម្បីឆ្លើយតបទៅនឹងវិធានការរបស់ក្រុមបស្ចិមប្រទេស
នៅក្នុងស្ថានការណ៍តានតឹងដែលកាន់តែធ្ងន់ធ្ងរឡើងរវាងប្រទេសរុស្ស៊ីនិងសហរដ្ឋអាមេរិកទាក់ទិននឹងការឈ្លានពានរបស់រុស្ស៊ីលើប្រទេសអ៊ុយក្រែន ប្រធានាធិបតីរុស្ស៊ីលោក Vladimir Putin បានបញ្ជាឲ្យកងកម្លាំងផ្នែកនុយក្លេអ៊ែររបស់រុស្ស៊ីត្រៀមខ្លួនរួចជាស្រេចនៅថ្ងៃអាទិត្យនេះ ដើម្បីឆ្លើយតបទៅនឹងអ្វីដែលលោកបានហៅថាជា «សេចក្ដីថ្លែងការណ៍បែបគឃ្លើន» របស់បណ្ដាប្រទេសជាសមាជិកនាំមុខនៃអង្គការអូតង់ (NATO)។
បទបញ្ជានេះមានន័យថា លោក Putin ចង់ឲ្យអាវុធនុយក្លេអ៊ែររបស់រុស្ស៊ីត្រៀមរួចជាស្រេចសម្រាប់បាញ់ ហើយបទបញ្ជានេះបានបង្កជាការគំរាមកំហែងថា ការឈ្លានពានរបស់រុស្ស៊ីលើអ៊ុយក្រែន និងការឆ្លើយតបរបស់ក្រុមបស្ចិមប្រទេសចំពោះការឈ្លានពាននេះ អាចឈានដល់ការប្រើប្រាស់អាវុធនុយក្លេអ៊ែរនៅក្នុងសង្គ្រាម។
ចុចត្រង់នេះដើម្បីអានព័ត៌មានលម្អិត