នាយករដ្ឋមន្ត្រីចក្រភពអង់គ្លេសលោក Rishi Sunak នៅថ្ងៃចន្ទនេះបានបណ្ដេញរដ្ឋមន្ត្រីមហាផ្ទៃអ្នកស្រី Suella Braverman ចេញពីតំណែង។ អ្នកស្រី Braverman គឺជាឥស្សរជនដែលនាំឱ្យមានការមិនចុះសម្រុងគ្នាដែលបានបង្កឱ្យមានកំហឹងនៅពេលអ្នកស្រីបានចោទប្រកាន់ប៉ូលិសថា មានលក្ខណៈអត់ឱនពេកចំពោះក្រុមអ្នកតវ៉ាគាំទ្រប៉ាឡេស្ទីន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
រដ្ឋាភិបាលចក្រភពអង់គ្លេសបានបញ្ជាក់ថា អ្នកស្រី Braverman បានចាកចេញពីតំណែងនៅក្នុងផ្នែកមួយនៃការសើរើគណៈរដ្ឋមន្ត្រី នៅពេលដែលលោក Sunak សើរើក្រុមមន្ត្រីកំពូលៗក្នុងរដ្ឋាភិបាលរបស់លោក។ លោក James Cleverly ដែលជារដ្ឋមន្ត្រីការបរទេស បានជំនួសតំណែងរបស់អ្នកស្រី Braverman។
នៅក្នុងវិធានការមួយដែលខុសប្លែកខ្លាំងពីធម្មតា អតីតនាយករដ្ឋមន្ត្រីចក្រភពអង់គ្លេសលោក David Cameron ត្រូវបានតែងតាំងជារដ្ឋមន្ត្រីការបរទេស។ វាជារឿងដ៏កម្រសម្រាប់បុគ្គលដែលជាអតីតនាយករដ្ឋមន្ត្រីនិងមិនមែនជាសមាជិកសភាបានកាន់តំណែងកំពូលមួយនៅក្នុងរដ្ឋាភិបាល។ រដ្ឋាភិបាលចក្រភពអង់គ្លេសថា លោក Cameron នឹងត្រូវតែងតាំងជាសមាជិកនៅក្នុងព្រឹទ្ធសភាដែលមិនត្រូវបានជ្រើសរើសតាមរយៈការបោះឆ្នោត។
អ្នកស្រី Braverman បាននិយាយថា៖ «វាគឺជាកិត្តយសដ៏ខ្ពង់ខ្ពស់បំផុតរបស់ខ្ញុំនៅក្នុងការធ្វើជារដ្ឋមន្ត្រីក្រសួងមហាផ្ទៃ»។ អ្នកស្រីបានបន្ថែមថា អ្នកស្រីនឹង «និយាយបន្ថែមទៀតនៅពេលសមរម្យណាមួយ»។
នៅក្នុងការវាយប្រហារដោយពាក្យសម្ដីខុសប្លែកខ្លាំងពីធម្មតាមួយលើប៉ូលិសកាលពីសប្ដាហ៍មុន អ្នកស្រី Braverman បាននិយាយថា កងកម្លាំងប៉ូលិសទីក្រុងឡុងដ៍បានធ្វើព្រងើយកន្តើយចំពោះការរំលោភច្បាប់ដែលប្រព្រឹត្តិដោយ «ហ្វូងមនុស្សឥតសណ្ដាប់ធ្នាប់ដែលគាំទ្រប៉ាឡេស្ទីន»។ អ្នកស្រីបានហៅក្រុមបាតុករដែលទាមទារឱ្យមានកិច្ចឈប់បាញ់គ្នានៅក្នុងតំបន់ហ្កាហ្សាថាជា «អ្នកដើរក្បួនតវ៉ាពោរពេញដោយគំនុំ»។
ការលើកឡើងរបស់អ្នកស្រីនេះមិនមានការយល់ព្រមជាមុនពីខុទ្ទកាល័យនាយករដ្ឋមន្ត្រីដូចសព្វដងនោះទេ៕
