ក្រុមនិយ័តករអង់គ្លេសបាននិយាយកាលពីថ្ងៃសៅរ៍ថាពួកគេកំពុងតែពិនិត្យមើលភស្តុតាងដែលប្រមូលបានមកពីការិយាល័យនានារបស់ក្រុមហ៊ុនស្រាវជ្រាវទិន្នន័យ Cambridge Analytica មុននឹងសម្រេចពី«ជំហានបន្ទាប់»។
ក្រុមអ្នកស៊ើបអង្កេតអង់គ្លេសបានចូលឆែកឆេរក្នុងការិយាល័យក្រុមហ៊ុននេះនៅក្នុងទីក្រុងឡុងដ៍កាលពីថ្ងៃសុក្រ។ ក្រុមហ៊ុន Cambridge Analytica កំពុងមានរឿងរ៉ាវចម្រូងចម្រាសពាក់ព័ន្ធនឹងការប្រើប្រាស់ទិន្នន័យផ្ទាល់ខ្លួនរបស់មនុស្សរាប់លាននាក់ពីបណ្តាញសង្គមហ្វេសប៊ុក។
កាលពីថ្ងៃសុក្រចៅក្រមបានផ្តល់ដីកាឆែកឆេឱ្យការិយាល័យស្នងការព័ត៌មានរបស់ចក្រភព អង់គ្លេស។ អ្នកស៊ើបអង្កេតជាង១០នាក់បានចំណាយពេលប្រហែល៧ម៉ោងនៅក្នុងក្រុមហ៊ុននោះមុនពេលចាកចេញវិញនៅព្រឹកព្រលឹមថ្ងៃសៅរ៍។
ក្រុមហ៊ុនស្រាវជ្រាវនេះរងការចោទប្រកាន់ថាបានប្រើប្រាស់ទិន្នន័យរបស់អ្នកប្រើប្រាស់ហ្វេសប៊ុកប្រហែលជាង៥០លាននាក់ដើម្បីរៀបចំជាព័ត៌មានសម្រាប់ក្រុមយុទ្ធនាការនយោបាយនៅក្នុងសហរដ្ឋអាមេរិកដែលក្នុងនោះរួមមានក្រុមយុទ្ធនាការរបស់លោកប្រធានាធិបតីដូណាល់ ត្រាំផងដែរ។
ប៉ុន្តែក្រុមហ៊ុននេះបានប្រកែកថាមិនបានធ្វើអ្វីខុសឆ្គងទេ។ អគ្គនាយកក្រុមហ៊ុននេះត្រូវបានព្យូរការងារមួយរយៈហើយលោក Alexander Tayler អគ្គនាយកស្តីទីបានបញ្ជាក់ក្នុងសេចក្តីថ្លែងការណ៍ថាក្រុមហ៊ុនមិនបានធ្វើការណាដែលជំរុញដោយហេតុផលនយោបាយទេហើយក៏មិនបានប្រព្រឹត្តខុសក្រមសីលធម៌ដូចការលើកឡើងដែរ៕
