កាលពីថ្ងៃអង្គារ ព្រឹទ្ធសភាអាមេរិកបានអនុម័តតែងតាំងលោក Mark Esper រដ្ឋលេខាធិការនៃកងទ័ពជើងគោកឱ្យកាន់តំណែងជារដ្ឋមន្ត្រីការពារប្រទេស ដោយបញ្ចប់រយៈពេលយូរបំផុតដែលក្រសួងការពារប្រទេសអាមេរិកាំងគ្មានមន្ត្រីកំពូលជាអចិន្ត្រៃយ៍ម្នាក់។
ព្រឹទ្ធសភាស.រ.អាបានគាំទ្រដោយសំឡេងភាគច្រើនឱ្យលោក Esper ដែលជាអតីតអ្នកនិយាយបញ្ចុះបញ្ចូលផ្តល់ផលប្រយោជន៍ឱ្យក្រុមហ៊ុនផលិតអាវុធ Raytheon Co. កាន់តំណែងជាមេដឹកនាំក្រសួងការពារប្រទេសទីពីររបស់លោកប្រធានាធិបតី Donald Trump ដែលបានទទួលការយល់ព្រមពីព្រឹទ្ធសភាអាមេរិកាំង។
លោក Esper ដែលមានអាយុ ៥៥ឆ្នាំ បានទទួលការគាំទ្រខ្លាំងពីគណបក្សទាំងពីរទោះណាជាមានការសាកសួរខ្លាំងៗពីលោកស្រី Elizabeth Warren សមាជិកព្រឹទ្ធសភាខាងគណបក្សប្រជាធិបតេយ្យនៅក្នុងសវនាការអំពីការតែងតាំងលោកអំពីចំណងទាក់ទងរបស់លោកជាមួយក្រុមហ៊ុន Raytheon និងអំពីការប្រកែករបស់លោកមិនព្រមបន្តការប្តេជ្ញាខាងសីលធម៌មួយដែលលោកបានចុះហត្ថលេខាកាលពីឆ្នាំ ២០១៧ដើម្បីបញ្ចៀសកុំឱ្យមានសេចក្តីសម្រេចមានការទាក់ទិនជាមួយក្រុមហ៊ុននេះ។
លោកស្រី Warren ដែលជាបេក្ខជនប្រធានាធិបតីម្នាក់សម្រាប់ការបោះឆ្នោតក្នុងឆ្នាំ២០២០ ជាសមាជិកតែម្នាក់គត់នៃគណៈកម្មាធិការសេវាកងយោធពល ដែលបានជំទាស់នឹងការតែងតាំងលោក Esper នៅក្នុងសវនាការនេះ។
ក្រុមហ៊ុន Raytheon ជាក្រុមហ៊ុនមានកុងត្រាស្ថាបនាអាវុធធំទីបីរបស់ស.រ.អ.។ មិនមានការតែងតាំងរដ្ឋមន្ត្រីការពារប្រទេសស.រ.អាទេ ចាប់តាំងពីលោក Jim Mattis បានលាលែងចេញពីតំណែងកាលពីខែធ្នូ ដោយសារលោកមានការខ្វែងគំនិតខាងគោលនយោបាយជាមួយលោក Trump។
សមាជិកច្រើននាក់នៃសភាស.រ.អ.មកពីគណបក្សទាំងពីរបានសុំដល់លោក Trump ឱ្យចាត់វិធានការជាបន្ទាន់ដើម្បីបំពេញតំណែងមានអំណាចខ្លាំងនេះ។
លោក Mitch McConnell មេដឹកនាំក្រុមភាគច្រើននៅក្នុងព្រឹទ្ធសភាស.រ.អាបានអំពាវនាវដល់ពួកសមាជិកព្រឹទ្ធសភាឱ្យគាំទ្រលោក Esper នៅពេលលោកបើកការប្រជុំព្រឹទ្ធសភាកាលពីព្រឹកថ្ងៃអង្គារ៕
