នៅថ្ងៃព្រហស្បតិ៍នេះសហរដ្ឋអាមេរិកកំពុងអបអរទិវាបុណ្យឯករាជ្យរបស់ខ្លួន ដោយមានការបា្ររព្ធពិធីតាមបែបប្រពៃណីមួយចំនួនដូចជា ការបាញ់កាំជ្រួច ការជួបជុំគ្នាជាមួយក្រុមគ្រួសារ និងមិត្តភក្តិនៅក្នុងសហគមន៍នៅទូទាំងប្រទេស ហើយក្នុងនោះក៏នឹងមានការថ្លែងសុន្ទរកថាដោយលោកប្រធានាធិបតី Donald Trump ផងដែរ។
ពិធីបុណ្យឯករាជ្យ ៤ កក្កដាគឺជា ការរំឮកថ្ងៃប្រកាសឯករាជ្យរបស់អាមេរិកពីប្រទេសអង់គ្លេសកាលពីឆ្នាំ១៧៧៦។ សម្រាប់រដ្ឋធានីវ៉ាស៊ីនតោនដែលជារដ្ឋធានីរបស់ប្រទេស ថ្ងៃបុណ្យឯករាជ្យ ៤ កក្កដានេះបានទាក់ទាញឲ្យមនុស្សម្នារាប់សែននាក់មកកំសាន្តនៅទីលានសួន National Mall ដើម្បីមកមើលការប្រគុំតន្ត្រីនិងការបាញ់កាំជ្រួច។ នៅឆ្នាំនេះ លោក Trump បានប្រកាសថា ក្រៅពីប្រារព្ធពិធីគោរពចំពោះប្រទេសអាមេរិក ដើម្បីបញ្ជាក់ពីអំណាចរបស់កងទ័ព លោកនឹងថ្លែងសុន្ទរកថានៅលើកាំជណ្តើរវិមានរំឭកអនុស្សាវរីយ៍ Lincoln។
ក្រសួងការពារប្រទេសសហរដ្ឋអាមេរិកបានបញ្ជាក់ប្រាប់ថា រដ្ឋមន្រ្តីស្តីទីនៃក្រសួងការពារប្រទេសលោក Mark Esper និងមន្រ្តីយោធាថ្នាក់កំពូលរបស់ប្រទេស ប្រធានក្រុមនាយអគ្គសេនាធិការចម្រុះលោក Joseph Dunford នឹងចូលរួមនៅក្នុងពិធីនេះដែរ។ មន្ត្រីការពារប្រទេសជាន់ខ្ពស់ផ្សេងទៀតក៏នឹងមានវត្តមានចូលរួមពិធីនៅថ្ងៃព្រហស្បតិ៍នេះ ដែលរួមមាន អនុរដ្ឋមន្រ្តីការពារប្រទេសទទួលបន្ទុកកងទ័ពជើងគោក រដ្ឋមន្រ្តីទទួលបន្ទុកកងទ័ពជើងទឹក រដ្ឋមន្រ្តីស្តីទីទទួលបន្ទុកកងទ័ពអាកាស មេបញ្ជាការរងនៃបញ្ជាការដ្ឋានកងម៉ារីន និងមេបញ្ជាការឆ្មាំឆ្នេរសមុទ្រអាមេរិក។
ក្រសួងការពារប្រទេសក៏បានប្រាប់ឲ្យដឹងទៀតថា សេតវិមានបានចែកសំបុត្រចំនួន៥០០០សំបុត្រដល់មន្រ្តីយោធានិងក្រុមគ្រួសាររបស់ពួកគេដើម្បីចូលរួមនៅក្នុងពិធីនៅថ្ងៃនេះ។ តាមទំនៀមទម្លាប់ ប្រធានាធិបតីសហរដ្ឋអាមេរិកមិនសូវចេញមុខច្រើនទេនៅអំឡុងពេលប្រារព្ធពិធីនេះ ហេតុដូច្នេះហើយបានជាក្រុមអ្នករិះគន់លោក Trump បានបង្ហាញក្តីបារម្ភថា លោក Trump អាចយកព្រឹត្តការណ៍នេះធ្វើជាយុទ្ធនាការឃោសនាបោះឆ្នោតរបស់លោក៕
