សហរដ្ឋអាមេរិកបានជំទាស់ទៅនឹងការសម្រេចរបស់អង្គការពាណិជ្ជកម្មពិភពលោកទាក់ទិននឹងការណ៍ដែលខ្លួនយកពន្ធគយបន្ថែមលើផលិផលរបស់ប្រទេសចិន។
អង្គការពាណិជ្ជកម្មពិភពលោកបានសម្រេចកាលពីថ្ងៃអង្គារថា ការយកពន្ធគយខ្លះរបស់សហរដ្ឋអាមេរិកលើទំនិញរបស់ចិនបានរំលោភច្បាប់ពាណិជ្ជកម្មអន្តរជាតិ។ ការសម្រេចនេះបានធ្វើឲ្យមានភាពតានតឹងកាន់តែធ្ងន់ធ្ងរឡើងរវាងសហរដ្ឋអាមេរិក និងអង្គការពាណិជ្ជកម្មពិភពលោក និងបានធ្វើឲ្យរដ្ឋាភិបាលក្រុងវ៉ាស៊ីនតោនខឹងសម្បារ។
គណៈកម្មាធិការមួយរបស់អង្គការពាណិជ្ជកម្មពិភពលោកបានបញ្ជាក់ថា៖ «ចិនបានបង្ហាញថា ការយកពន្ធគយបន្ថែម [របស់សហរដ្ឋអាមេរិកនេះ] សំដៅតែលើផលិតផលមកពីប្រទេសចិនប៉ុណ្ណោះ។ ការធ្វើដូច្នេះគឺមិនបានគោរពផលិតផលដែលមានប្រភពនៅក្នុងប្រទេសចិន ដែលការគោរពបែបនេះគឺជាប្រយោជន៍ដែលអង្គការពាណិជ្ជកម្មពិភពលោកផ្តល់ជូនប្រទេសជាសមាជិកទាំងអស់»។
អ្នកតំណាងពាណិជ្ជកម្មសហរដ្ឋអាមេរិកលោក Robert Lighthizer បានរិះគន់ការសម្រេចរបស់អង្គការពាណិជ្ជកម្មពិភពលោកនេះ ដោយនិយាយថា ការលើកឡើងរបស់គណៈកម្មាធិការអង្គការពាណិជ្ជកម្មពិភពលោកនេះបានបង្ហាញឲ្យឃើញថា «អ្វីដែលរដ្ឋបាលរបស់លោកប្រធានាធិបតី Donald Trump បានបញ្ជាក់អស់រយៈពេល ៤ ឆ្នាំមកនេះ ដែលថា អង្គការពាណិជ្ជកម្មពិភពលោកមិនមានសមត្ថភាពគ្រប់គ្រាន់ដើម្បីបញ្ឈប់ទង្វើដ៏គ្រោះថ្នាក់របស់ប្រទេសចិនទាក់ទិននឹងរឿងបច្ចេកវិទ្យានោះ» គឺពិតជាត្រឹមត្រូវ។
ក្រសួងពាណិជ្ជកម្មចិនបានបញ្ជាក់ថា ការសម្រេចរបស់អង្គការពាណិជ្ជកម្មពិភពលោកនេះគឺ «ត្រឹមត្រូវនិងមិនលំអៀង» និងបានលើកឡើងថា ខ្លួនសង្ឃឹមថា សហរដ្ឋអាមេរិកនឹងអនុវត្តតាមការសម្រេចនេះ៕
