សហរដ្ឋអាមេរិកនិងក្រុមតាលីបង់ប្រហែលបានព្រមព្រៀងគ្នាលើផែនការសម្រាប់កងទ័ពអាមេរិកាំងដកចេញពីប្រទេសអាហ្វហ្គានីស្ថាន។នេះតាមប្រភពនានាដែលបានប្រាប់ VOAនៅថ្ងៃសៅរ៍នេះ។ ជាការដោះដូរវិញ ក្រុមបះបោរ បានផ្តល់ការធានាថា មិនមានក្រុមភេរវជនអន្តរជាតិ នឹងត្រូវអនុញ្ញាតិឲ្យប្រើប្រាស់ទឹកដីអាហ្វហ្គានីស្ថានដើម្បីគំរាមកំហែងប្រទេសអាមេរិកឬប្រទេសដ៏ទៃផ្សេងទៀតនៅថ្ងៃអនាគតទេ។
ការព្រមព្រៀងគ្នានេះជាលទ្ធផលនៃការចរចាដ៏ខ្លាំងក្លានិងគ្មានការរំខានរយៈពេលជិតមួយសប្តាហ៍រវាងអ្នកតំណាងសហរដ្ឋអាមេរិកនិងក្រុមបះបោរនៅក្នុងទីក្រុងដូហានៃប្រទេសកាតា។ ពួកអ្នកតំណាងនៃរដ្ឋាភិបាលម្ចាស់ផ្ទះនិងប៉ាគីស្ថានក៏បានចូលរួមនៅក្នុងការចរចានោះដែរ។
ប្រភពនានាបានប្រាប់ VOA ថា ពួកគេរំពឹងថា ភាគីចរចាទាំង២នឹងប្រកាសពីផែនការដកកងទ័ពយ៉ាងលឿនបំផុតនៅថ្ងៃសៅរ៍នេះហើយយ៉ាងយូរបំផុតនៅត្រឹមថ្ងៃចន្ទ ប្រសិនបើអ្វីៗទាំងអស់ប្រព្រឹត្តដូចទៅតាមការគ្រោងទុក។ ផែនការរបស់សហរដ្ឋអាមេរិក នឹងតម្រូវឲ្យក្រុមតាលីបង់គោរពការឈប់បាញ់គ្នា។ទោះជាយ៉ាងណាក៏ដោយ ប្រភពនានាមិនបានច្រានចោលពីលទ្ធភាពនៃប្រធានាធិបតី ដូណាល់ ត្រាំ ប្រកាសពីកិច្ចព្រមព្រៀងចុងក្រោយជាមួយក្រុមតាលីបង់នៅឯសុន្ទរកថាស្តីពីស្ថានភាពសហព័ន្ធឥឡូវនេះដែលការបិទរដ្ឋាភិបាលសហរដ្ឋអាមេរិកបានបញ្ចប់។
មិនមានអត្ថាធិប្បាយភ្លាមៗមកពីសហរដ្ឋអាមេរិកឬក្រុមតាលីបង់ស្តីពីរបាយការណ៍ជឿនលឿននៅក្នុងការចរចារបស់ខ្លួននោះទេ។ លោក Zalmay Khalilzad តំណាងពិសេសរបស់សហរដ្ឋអាមេរិកសម្រាប់ប្រទេសអាហ្វហ្គានីស្ថានកំពុងដឹកនាំភាគីអាមេរិកាំងបានស្ថិតនៅក្នុងអ្វីដែលពួកអ្នកសង្កេតការពណ៌នាថាជាទាក់ទងមិនធ្លាប់មានកាលពីពេលមុនរវាងគូសត្រូវទាំង២នៅក្នុងសង្គ្រាមដែលមានរយៈពេល១៧ឆ្នាំនេះ៕
