រដ្ឋមន្ត្រីការបរទេសអាមេរិកលោក Mike Pompeo បានបន្ទោសរដ្ឋាភិបាលក្រុង តេហេរ៉ង់ ចំពោះការវាយប្រហារ កាលពីថ្ងៃព្រហស្បតិ៍ ទៅលើនាវាដឹកប្រេងពីរគ្រឿងដែលបានខូចខ្ទេចខ្ទីនៅក្នុងដែនសមុទ្រយុទ្ធសាស្ត្ររបស់អ៊ីរ៉ង់។
លោក Pompeo បានថ្លែងថា៖ «នេះគឺជាការវាយតម្លៃរបស់រដ្ឋាភិបាលអាមេរិកដែលថាសាធារណរដ្ឋឥស្លាមអ៊ីរ៉ង់ គឺជាអ្នកទទួលខុសត្រូវចំពោះរឿង ដែលបានកើតឡើងនៅក្នុងឈូងសមុទ្រអូម៉ង់នៅថ្ងៃនេះ»។
លោកបានថ្លែងបន្តទៀតថា៖ «ការវាយតម្លៃនេះគឺផ្អែកទៅលើភ្នាក់ងារស៊ើបការណ៍សម្ងាត់ អាវុធដែលត្រូវបានប្រើប្រាស់ កម្រិតជំនាញដែលប្រើប្រាស់ដើម្បីធ្វើប្រតិបត្តិការនេះ ដែលស្រដៀងគ្នាទៅនឹងការវាយប្រហាររបស់អ៊ីរ៉ង់កាលពីពេលថ្មីៗនេះទៅលើនាវាដឹកទំនិញនិងផ្អែកទៅលើការពិតដែលថា គ្មានក្រុមណាមួយដែលប្រតិបត្តិការនៅក្នុងតំបន់នេះមានធនធាននិងជំនាញដើម្បីរឿងនេះឡើយ»។
មន្ត្រីការពារប្រទេសរបស់អាមេរិកម្នាក់ដែលបានថ្លែងប្រាប់ VOA ដោយសុំមិនបញ្ចេញឈ្មោះបាននិយាយថា យោធាមានសូចនាករជាច្រើន ដែលបញ្ជាក់ថា អ៊ីរ៉ង់គឺជាអ្នកវាយប្រហារទៅលើនាវាដឹកប្រេងទាំងពីរគ្រឿងនេះ។
មន្ត្រីរូបនោះបានបន្ថែមទៀតថា៖ «យើងជឿជាក់ ហើយយើងក៏មានភស្តុតាងបញ្ជាក់ផងដែរ»។
មន្ត្រីរូបនោះមិនបានបង្ហាញឲ្យច្បាស់អំពីភស្តុតាងនោះទេ។ នេះគឺជាលើកចុងក្រោយបង្អស់ក្នុងចំណោមការចោទប្រកាន់ជាច្រើននៅក្នុងតំបន់នេះ ដែលអាមេរិកបានចោទប្រកាន់រដ្ឋាភិបាលក្រុង តេហេរ៉ង់ ថាជាអ្នកធ្វើ ប៉ុន្តែនៅមិនទាន់បង្ហាញភស្តុតាងសម្ងាត់អ្វីនៅឡើយទេ៕
