គ្រោះរញ្ជួយដីដ៏ខ្លាំងចំនួនពីរបានបោកបក់ទៅលើខេត្ត Sichuan នៃប្រទេសចិន កាលពីល្ងាចថ្ងៃចន្ទ ហើយប្រព័ន្ធផ្សព្វផ្សាយរបស់រដ្ឋរាយការណ៍ថា មនុស្សយ៉ាងហោចណាស់ម្នាក់បានស្លាប់។
ទីភ្នាក់ងារវាស់វែងភូមិសាស្ត្ររបស់អាមេរិកបានឲ្យដឹងថា គ្រោះរញ្ជួយដីដំបូងបង្អស់មានកម្រិត ៥,៩ ក្រោយមកមានកម្រិត ៥,២នៅក្នុងតំបន់ដដែលនេះ។ គ្រោះរញ្ជួយដីទាំងពីរនេះបានកើតឡើងនៅក្បែរក្រុង Changning នៅក្នុងតំបន់ជនបទដ៏ធំមួយ។
គ្រោះរញ្ជួយដីនេះបានបង្កឲ្យខូចខាតអគារនិងហេដ្ឋារចនាសម្ព័ន្ធនានា។ ទីភ្នាក់ងារវាស់វែងភូមិសាស្ត្ររបស់អាមេរិកបានព្រមានថា អាចនឹងមានការបំផ្លិចបំផ្លាញកាន់តែខ្លាំងពីគ្រោះរញ្ជួយដីនេះ។
ទូរទស្សន៍របស់រដ្ឋក្នុងប្រទេសចិនបានឲ្យដឹងថា ក្រុមការងារអ្នកជួយសង្គ្រោះបានជួយទាញមនុស្សមួយចំនួនចេញពីគំនរបាក់បែកនោះ។ មនុស្សយ៉ាងហោចណាស់ម្នាក់បានស្លាប់ ប៉ុន្តែទូរទស្សន៍របស់រដ្ឋមិនបានផ្ដល់ព័ត៌មានលម្អិតនោះទេ។
អ្នករស់នៅក្នុងក្រុង Chongqing ដែលជាក្រុងជិតកន្លែងកើតមានគ្រោះរញ្ជួយដីនេះបំផុត ដែលស្ថិតនៅចម្ងាយប្រមាណ២០០គីឡូម៉ែត្រពីនេះ បាននិយាយថា ពួកគេមានអារម្មណ៍ថាញ័រដោយសារគ្រោះរញ្ជួយដីនេះ។ ប្រព័ន្ធផ្សព្វផ្សាយរបស់រដ្ឋបានឲ្យដឹងថា ផ្ទះមួយចំនួននៅក្នុងទីក្រុងនេះត្រូវបានបំផ្លិចបំផ្លាញ ប៉ុន្តែមិនមានសេចក្តីរាយការណ៍ថាមានការរងរបួសដល់នរណាម្នាក់ឡើយ។
គ្រោះរញ្ជួយដីតែងតែកើតឡើងនៅក្នុងខេត្ត Sichuan ជាទៀងទាត់ ហើយគ្រោះរញ្ជួយដីកាលពីឆ្នាំ២០០៨ បានបង្កឲ្យមនុស្ស៩សែននាក់បាត់ខ្លួន ឬស្លាប់៕
