ភ្នាក់ងារប៉ូលិស ២ នាក់ ត្រូវគេបាញ់នៅក្នុងទីក្រុង Ferguson រដ្ឋ Missouri ភាគកណ្តាលនិងខាងលិចស.រ.អា នៅព្រឹកថ្ងៃព្រហស្បតិ៍នេះ ក្នុងពេលប៉ុន្មានម៉ោងបន្ទាប់ពីស្នងការនគរបាលទីក្រុងនោះបានលាឈប់ពីតំណែង បន្ទាប់ពីក្រសួងយុត្តិធម៌ស.រ.អាបានចេញសេចក្តីរាយការណ៍រិះគន់ក្រសួងនគរបាលក្រុង Ferguson អំពីគោលនយោបាយប្រកាន់ពូជសាសន៍។
ព្រឹត្តិការណ៍នេះបានកើតឡើងនៅពេលដែលក្រុមបាតុករបានប្រជុំគ្នានៅខាងក្រៅប៉ុស្តិ៍ប៉ូលិសក្រុង Ferguson។ ភ្នាក់ងារប៉ូលិសម្នាក់ដែលជាសមាជិកក្រសួងនគរបាលស្រុក St. Louis ត្រូវបាញ់ចំស្មា និងភ្នាក់ងារប៉ូលិសម្នាក់ទៀតមកពីទីក្រុងជិតខាង Webster Groves ត្រូវបាញ់ចំមុខ។ លោក Jon Belmar ស្នងការនគរបាលស្រុក St. Louis បានថ្លែងថា ភ្នាក់ងារនគរបាលទាំង ២ នាក់នៅដឹងខ្លួន តែលោកបានពណ៌នាថាមុខរបួស«មានភាពធ្ងន់ធ្ងរខ្លាំង»។
លោក Belmar ថ្លែងថា ភ្នាក់ងារទាំង ២ នាក់ត្រូវគេបាញ់«ពីព្រោះអ្នកទាំង ២ ជាភ្នាក់ងារប៉ូលិស» ហើយលោកបន្ថែមថា អ្នកបាញ់ «បានបង្កប់»នៅក្នុងក្រុមបាតុករ។
ក៏ប៉ុន្តែសាក្សីក្នុងក្រុង Ferguson រាយការណ៍ថា គ្រាប់កាំភ្លើងហាក់ដូចជាបាញ់ចេញពីកំពូលភ្នំនៅឆ្លងផ្លូវពីប៉ុស្តិ៍ប៉ូលិស។
ស្នងការនគរបាលក្រុង Ferguson លោក Thomas Jackson បានសុំលាឈប់កាលពីថ្ងៃពុធ ក្នុងពេល ៧ ខែបន្ទាប់ពីភ្នាក់ងារប៉ូលិសស្បែកស Darren Wilson បានបានបាញ់ស្លាប់យុវជនស្បែកខ្មៅដែលគ្មានអាវុធឈ្មោះ Michael Brown នៅក្នុងការប្រឈមមុខគ្នានៅតាមផ្លូវកាលពីខែសីហាឆ្នាំមុន៕
