សមាជិកសភាប្រចាំទីក្រុងហុងកុងពីររូបដែលគាំទ្រលទ្ធិប្រជាធិបតេយ្យត្រូវបានចាប់ខ្លួន និងចោទប្រកាន់ថាជាប់ទាក់ទងនឹងបាតុកម្មប្រឆាំងរដ្ឋាភិបាលកាលពីថ្ងៃមុន។ ការចាប់ខ្លួនសមាជិកសភាទាំងពីររូបនេះបានធ្វើឲ្យរញ្ជួយទីក្រុងហុងកុង ដែលបច្ចុប្បន្នជាទីក្រុងពាក់កណ្ដាលស្វយ័ត។ បើយោងតាមទំព័រហ្វេកប៊ុករបស់គណបក្សប្រជាធិបតេយ្យ លោក Lam Cheuk-ting និងលោក Ted Hui ត្រូវបានគេចាប់ខ្លួននៅព្រឹកថ្ងៃពុធ នៅគេហដ្ឋានរបស់ពួកគាត់រៀងខ្លួន។
លោក Lam ត្រូវបានគេចាប់ខ្លួនដោយសង្ស័យថាបានចូលរួមក្នុងកុប្បកម្មថ្ងៃទី២១ កក្កដា ឆ្នាំមុន នៅពេលដែលបុរសជាង១០០នាក់ បានប្រើដំបងដែក និងគល់អំពៅ វាយប្រហារទៅលើក្រុមបាតុករគាំទ្រលទ្ធិប្រជាធិបតេយ្យ និងអ្នកដំណើរនៅស្ថានីយ៍រថភ្លើងក្រោមដី Yuen Long។ ក្រុមបាតុករបានចោទប៉ូលិសថាបានទៅដល់កន្លែងកើតហេតុយឺតយ៉ាវ និងបានអនុញ្ញាតឲ្យជនប្រដាប់អាវុធមួយចំនួនចាកចេញពីកន្លែងកើតហេតុ។ លោក Lam ក៏ត្រូវបានគេចោទប្រកាន់ជាមួយលោក Hui ថាជាប់ពាក់ព័ន្ធនឹងបាតុកម្មថ្ងៃទី ៦ខែកក្កដា នៅក្នុងសង្កាត់ Tuen Mun ផងដែរ។
ដោយសារតែមានបាតុកម្មហិង្សាជាច្រើនលើកច្រើនសារ នៅពេលថ្មីៗនេះរដ្ឋាភិបាលក្រុងប៉េកាំងបានដាក់ច្បាប់សន្តិសុខថ្មីមួយទៅលើទីក្រុងហុង ដែលច្បាប់នេះអាចចាប់ជនណាម្នាក់ ដែលគេជឿថាបានប្រព្រឹត្តិអំពើភេរវកម្ម បំបែកខ្លួន ធ្វើវិទ្ធង្សនា និងឃុបឃិតជាមួយកងកម្លាំងបរទេស ដាក់ពន្ធនាគារអស់មួយជីវិតបើត្រូវបានគេរកឃើញថា មានទោស៕
