ភ្ជាប់​ទៅ​គេហទំព័រ​ទាក់ទង

ពលរដ្ឋ​ខ្មែរ​អាមេរិកាំង​ពីរ​រូប​ឈ្នះ​ការ​បោះឆ្នោត​ចូល​ដឹកនាំ​ក្រុង​ឡូវែល


លោក នួន វាសនា ដែល​ជា​ពលរដ្ឋ​អាមេរិកាំង​ដើម​កំណើត​ខ្មែរ​ បាន​ឈ្នះ​ការ​បោះឆ្នោត​ថ្នាក់​ក្រុង ហើយ​បាន​ក្លាយ​ជា​សមាជិក​ម្នាក់​នៃ​ក្រុម​ប្រឹក្សា​ក្រុង​ឡូវែល​ដែល​មាន​សមាជិក​៩នាក់ កាលពីថ្ងៃអង្គារ ទី៧ ខែវិច្ឆិកា ឆ្នាំ២០១៧។ (រូបថតដកស្រង់ពីទំព័រហ្វេសប៊ុក Vesna Nuon for City Council)

ពលរដ្ឋ​នៅ​ទីក្រុង​ឡូវែល រដ្ឋ​ម៉ាសាឈូសេត ដែល​បាន​ចេញ​ទៅ​បោះឆ្នោត​ថ្នាក់​ក្រុង​កាលពី​ថ្ងៃអង្គារ ទី​៧ ខែ​វិច្ឆិកា​នេះ បាន​បោះ​ឆ្នោត​ជ្រើស​តាំង​ពលរដ្ឋ​ខ្មែរ​អាមេរិកាំង​ម្នាក់ ឲ្យ​ក្លាយ​ជា​សមាជិក​ម្នាក់​នៃ​ក្រុម​ប្រឹក្សា​ក្រុង​ឡូវែល និង​ពលរដ្ឋ​ខ្មែរ​អាមេរិកាំង​ម្នាក់​ទៀត ឲ្យ​ក្លាយ​ជា​សមាជិក​ម្នាក់​នៃ​ក្រុមប្រឹក្សា​សាលារៀន​ឡូវែល។

ទាំង​ពលរដ្ឋ​អាមេរិកាំង​ស្បែក​ស និង​ពលរដ្ឋ​ខ្មែរ​អាមេរិកាំង បាន​ត្រេក​អរ​នឹង​លទ្ធផល​នេះ ដែល​បង្ហាញ​ឲ្យ​ឃើញ​ពី​ភាព​ចម្រុះ​ពូជសាសន៍​ក្នុង​ជួរ​ដឹកនាំ​ក្រុង​ឡូវែល​នេះ។

នៅក្នុង​ការ​បោះឆ្នោត​ថ្នាក់​ក្រុង​ដ៏មាន​ការ​ប្រកួត​ប្រជែង​ខ្លាំង​នៅទីក្រុង​ឡូវែល រដ្ឋ​ម៉ាសាឈូសេត លោក នួន វាសនា ដែល​ជា​ពលរដ្ឋ​អាមេរិកាំង​ដើម​កំណើត​ខ្មែរ​ បាន​ឈ្នះ​ការ​បោះឆ្នោត​ថ្នាក់​ក្រុង ហើយ​បាន​ក្លាយ​ជា​សមាជិក​ម្នាក់​នៃ​ក្រុម​ប្រឹក្សា​ក្រុង​ឡូវែល​ដែល​មាន​សមាជិក​៩នាក់។ បន្ថែម​លើ​នេះ ​លោក ឡាយ ឌូមីនិច (Dominik Lay) ដែល​ជា​ពលរដ្ឋ​អាមេរិកាំង​ដើម​កំណើត​ខ្មែរ​ម្នាក់​ទៀត ​បាន​ឈ្នះ​ការ​បោះឆ្នោត ហើយ​បាន​ក្លាយ​ជា​សមាជិក​ម្នាក់​គណៈកម្មាធិការ​សាលារៀន​ឡូវែល​ដែល​មាន​សមាជិក​៦នាក់។

នៅ​ទីក្រុង​ឡូវែល​នេះ មាន​ចំនួន​ពលរដ្ឋ​អាមេរិកាំង​ដើម​កំណើត​ខ្មែរ​ជាង​៣ម៉ឺន​នាក់​រស់នៅ។ ការ​បោះឆ្នោត​ថ្នាក់​ក្រុង​ឆ្នាំ​នេះ គេ​ឃើញ​ពលរដ្ឋ​ជាង​៩ម៉ឺន​នាក់​បាន​ចេញ​ទៅ​បោះ​ឆ្នោត។

អ្វី​ដែល​ជា​លក្ខណៈ​ប្រវត្តិសាស្ត្រ​នៃ​ការ​បោះឆ្នោត​ថ្នាក់​ក្រុង​ឆ្នាំ​នេះ គឺ​ថា លោក នួន វាសនា ដែល​ជា​អតីត​សមាជិក​ក្រុម​ប្រឹក្សា​ក្រុង​ ពី​ឆ្នាំ២០១១ ដល់​ឆ្នាំ​២០១២ បាន​ជាប់​ក្នុង​លំដាប់​លេខ​រៀង​ទី១​នៃ​បេក្ខជន​ចំនួន​៩នាក់ ដែល​ត្រូវបាន​ជ្រើស​តាំង​ជា​សមាជិក​ក្រុម​ប្រឹក្សា​ក្រុង។ លោក​បាន​ទទួល​សំឡេង​ឆ្នោត​គាំទ្រ​ច្រើន​ជាង​គេ​បង្អស់ ក្នុង​ចំនួន​ជាង​៦៤០០​សំឡេង។ ហើយ​លោក ឡាយ ឌូមីនិច បាន​ក្លាយ​ពលរដ្ឋ​ខ្មែរ​អាមេរិកាំង​លើក​ដំបូង​គេ​បង្អស់ ដែល​បាន​ក្លាយ​ជា​សមាជិក​នៃ​គណៈកម្មាធិការ​សាលារៀន​នៅ​ទីក្រុង​ឡូវែល​នេះ។

លោក នួន វាសនា (ស្តាំ) និង​លោក Ed Kennedy ចៅហ្វាយក្រុងឡូវែល ថ្លែង​នៅក្នុង​ពិធីឃោសនាបោះឆ្នោត​នៅទីក្រុងឡូវែល កាលពីថ្ងៃទី៣០ ខែតុលា ឆ្នាំ២០១៧។ លោក​ នួន វាសនា បាន​ឈ្នះ​ការ​បោះឆ្នោតដោយ​ទទួល​បាន​សំឡេង​គាំទ្រ​ច្រើន​ជាង​គេបង្អស់នៅក្នុង​ចំណោម​បេក្ខជន​៩នាក់ ដែល​ត្រូវបាន​ជ្រើសតាំង​ជា​សមាជិក​ថ្មីនៃ​ក្រុម​ប្រឹក្សាក្រុង​ឡូវែលអាណាត្តិ​ថ្មីនេះ។ (រូបថតដកស្រង់ពីទំព័រហ្វេសប៊ុក Vesna Nuon for City Council)
លោក នួន វាសនា (ស្តាំ) និង​លោក Ed Kennedy ចៅហ្វាយក្រុងឡូវែល ថ្លែង​នៅក្នុង​ពិធីឃោសនាបោះឆ្នោត​នៅទីក្រុងឡូវែល កាលពីថ្ងៃទី៣០ ខែតុលា ឆ្នាំ២០១៧។ លោក​ នួន វាសនា បាន​ឈ្នះ​ការ​បោះឆ្នោតដោយ​ទទួល​បាន​សំឡេង​គាំទ្រ​ច្រើន​ជាង​គេបង្អស់នៅក្នុង​ចំណោម​បេក្ខជន​៩នាក់ ដែល​ត្រូវបាន​ជ្រើសតាំង​ជា​សមាជិក​ថ្មីនៃ​ក្រុម​ប្រឹក្សាក្រុង​ឡូវែលអាណាត្តិ​ថ្មីនេះ។ (រូបថតដកស្រង់ពីទំព័រហ្វេសប៊ុក Vesna Nuon for City Council)

លោក នាង សុវណ្ណដារា ដែល​ជា​ពលរដ្ឋ​ខ្មែរ​អាមេរិកាំង​ម្នាក់ រស់នៅ​ក្នុង​ទីក្រុង​ឡូវែល​ជាង​៣០ឆ្នាំ បាន​ប្រាប់​ VOA ​ថា ជោគជ័យ​របស់​បេក្ខជន​ដែល​ជា​ពលរដ្ឋ​ខ្មែរ​អាមេរិកាំង​នេះ បង្ហាញ​ឲ្យ​ឃើញ​ពី​សំឡេង​របស់​ពលរដ្ឋ​ខ្មែរ​នៅ​ទីក្រុង​ឡូវែល​នេះ។ លោក សុវណ្ណដារា ​ក៏​សង្ឃឹម​ថា លោក នួន វាសនា ដែល​ជា​សមាជិក​ថ្មី​ម្នាក់​នៃ​ក្រុម​ប្រឹក្សា​ក្រុង នឹង​«‍ចូលរួម​ដើម្បី​អភិវឌ្ឍ​ទីក្រុង​ឡូវែល​»ទៅ​មុខ​ទៀត។ លោក​ ក៏​បាន​បន្ថែម​ថា ជោគជ័យ​នេះ​គឺ​ដោយសារ​តែ​គុណសម្បត្តិ​របស់​លោក នួន វាសនា ដែល​បាន​ធ្វើ​ឲ្យ​ពលរដ្ឋ​អាមេរិកាំង​ស្បែកស និង​ពលរដ្ឋ​ជនជាតិ​ភាគតិចនៅ​ក្រុង​នេះ​ ជឿ​ទុក​ចិត្ត។

លោក​បាន​លើក​ឡើង​ថា៖ «‍គេ​ឃើញ​ទង្វើ​របស់​គាត់ ដែល​គាត់​រាក់ទាក់​គ្រប់​ពូជសាសន៍ ហើយ​គេ​គាំទ្រ​គាត់ ដោយ​ទង្វើ​របស់​គាត់​បាន​ធ្វើ​ពី​មុន ដែល​គាត់ធ្លាប់​បាន​ធ្វើ​ជា​ក្រុម​ប្រឹក្សា​ក្រុង​ឡូវែល​ពី​មុន​មក ហើយ​លោក​នៅ​តែ​ចូលរួម​ជាមួយ​ជនជាតិ​ស្បែក​ស និង​សហគមន៍​ខ្មែរ​យើង ដើម្បី​ឲ្យ​ [ស្និទ្ធ] ជាប់​គ្នា ប្រាស្រ័យ​ទាក់ទង​ដោះស្រាយ​លើ​បញ្ហា​អី​ផ្សេងៗ»។

លោក Rodney Elliott គឺជា​សមាជិក​ក្រុម​ប្រឹក្សា​ក្រុង​ឡូវែលម្នាក់ ដែល​ត្រូវបាន​ជ្រើស​តាំង​សារ​ជាថ្មី​ នៅក្នុង​ការ​បោះឆ្នោត​ដ៏​មាន​ការ​ប្រកួត​ប្រជែង​ខ្លាំង​នា​ឆ្នាំ​នេះ។ លោក​បាន​ជាប់​លេខ​រៀង​ទី៧​ក្នុង​ចំណោម​សមាជិក​ថ្មី​ចំនួន​៩​នាក់ ដែល​ត្រូវបាន​ជ្រើស​តាំង​ឲ្យ​ដឹកនាំ​សាលាក្រុង​ឡូវែល​នេះ។​

សមាជិក​ក្រុម​ប្រឹក្សា​ក្រុង​រូប​នេះ ដែល​ជា​ពលរដ្ឋ​អាមេរិកាំង​ស្បែក​ស បាន​ប្រាប់ VOA ថា លទ្ធផល​នៃ​ការ​បោះឆ្នោត​ឆ្នាំ​នេះ មាន​លក្ខណៈ​ប្រកួត​ប្រជែង​ខ្លាំង។ លោក​រីករាយ​នឹង​លទ្ធផល​នៃ​ការ​បោះឆ្នោត​នេះ​ ហើយ​លោក​បាន​សង្កត់​ធ្ងន់​ពី​ការ​មាន​តំណាង​នៃ​សហគមន៍​ខ្មែរ​នៅ​ក្នុង​ជួរ​ដឹកនាំ​ក្រុង​ឡូវែល​នៅ​អាណត្តិ​ថ្មី​នេះ។

លោក Rodney Elliott បាន​លើក​ឡើង​ថា៖

«‍ខ្ញុំ​គិត​ថា ថ្ងៃនេះ​គឺជា​ថ្ងៃប្រវត្តិសាស្ត្រ​នៅ​ក្នុង​ទីក្រុង​យើង។ យើង​មាន​ខ្មែរ​ជា​តំណាងរាស្ត្រ​ប្រចាំ​រដ្ឋ ហើយ​[ឥឡូវ] យើង​មាន​ខ្មែរ​ជា​សមាជិក​ក្រុម​ប្រឹក្សា​ក្រុង និង​ខ្មែរ​ជា​សមាជិក​គណៈកម្មាធិការ​សាលារៀន។ ​នេះ​គឺជា​រឿង​ល្អ​ដល់​ទីក្រុង​យើង។ ខ្ញុំ​គិតថា នេះ​គឺជា​សារ​មួយ​ដ៏​សំខាន់ ដែល​ថា យើង​ទាំងអស់​គ្នា គឺ​រួម​គ្នា​ជា​ទីក្រុង​តែ​មួយ ហើយ​ដូច្នេះ​យើង​នាំ​គ្នា​រួបរួម​គ្នា យោគយល់​គ្នា និង​ធ្វើការ​រួម​គ្នា»។

លោក Elliott ដែល​ជា​អតីត​ចៅហ្វាយ​ក្រុង​ឡូវែល បាន​សង្កេត​ឃើញ​ថា ពលរដ្ឋ​នៅ​ទីក្រុង​ឡូវែល​ជាច្រើន​នាក់​បាន​ចេញ​មក​បោះឆ្នោត ហើយ​នេះ​គឺ​ដោយ​សារ​តែ​បញ្ហា​ចម្រូង​ចម្រាស់​នៃ​ការ​ផ្លាស់ទី​វិទ្យាល័យ​ឡូវែល។ លោក​បាន​បញ្ជាក់​ថា តាមរយៈ​លទ្ធផល​នៃ​ការ​បោះឆ្នោត​ ពលរដ្ឋ​មួយ​ភាគ​ធំ​មិន​គាំទ្រ​ឲ្យ​មាន​ការ​ផ្លាស់ទី​វិទ្យាល័យ​ឡូវែល​នេះ​ទេ។

លោក ឡាយ ឌូមីនិច (Dominik Lay) (ឈរ​ជួរមុខទីបី​រាប់​ពីខាងឆ្វេង) ថត​រូបជាមួយ​នឹង​អ្នក​គាំទ្រ និង​បេក្ខជន​ឈរឈ្មោះ​បោឆ្នោត​ខ្លះដែល​បាន​ឈ្នះការបោះឆ្នោតថ្នាក់ក្រុង កាលពីថ្ងៃអង្គារ ទី៧ ខែវិច្ឆិកា ឆ្នាំ២០១៧ នៅទីក្រុង​ឡូវែល រដ្ឋ​ម៉ាសាឈូសេត។ (រូបដកស្រង់ពីទំព័រហ្វេសប៊ុក Dominik Lay)
លោក ឡាយ ឌូមីនិច (Dominik Lay) (ឈរ​ជួរមុខទីបី​រាប់​ពីខាងឆ្វេង) ថត​រូបជាមួយ​នឹង​អ្នក​គាំទ្រ និង​បេក្ខជន​ឈរឈ្មោះ​បោឆ្នោត​ខ្លះដែល​បាន​ឈ្នះការបោះឆ្នោតថ្នាក់ក្រុង កាលពីថ្ងៃអង្គារ ទី៧ ខែវិច្ឆិកា ឆ្នាំ២០១៧ នៅទីក្រុង​ឡូវែល រដ្ឋ​ម៉ាសាឈូសេត។ (រូបដកស្រង់ពីទំព័រហ្វេសប៊ុក Dominik Lay)

យោង​តាម​សារព័ត៌មាន​ក្នុង​ក្រុង​ឈ្មោះ Lowell Sun ក្នុង​ចំណោម​បេក្ខជន​ចំនួន​៩នាក់ ដែល​ត្រូវបាន​ជ្រើស​តាំង​ជា​សមាជិក​ក្រុម​ប្រឹក្សា​ក្រុង​អាណត្តិ​ថ្មី​នេះ បេក្ខជន​៧នាក់ គឺជា​អ្នក​គាំទ្រ​ឲ្យ​វិទ្យាល័យ​ឡូវែល​នេះ ​ស្ថិត​នៅ​កណ្តាល​ក្រុង​ឡូវែល​ដដែល។

លោក ចៅ ​សុខារី គឺជា​បេក្ខជន​ខ្មែរ​អាមេរិកាំង​ម្នាក់​ដែល​បាន​ប្រកួត​ប្រជែង​ការ​បោះឆ្នោត​ជ្រើសរើស​ក្រុម​ប្រឹក្សាក្រុង​ឡូវែល​អាណត្តិ​ថ្មី​នេះ ក៏​ប៉ុន្តែ​លោក​មិន​បាន​ជាប់​ជា​សមាជិក​ក្រុម​ប្រឹក្សា​ក្រុង​ទេ។ លោក​ ​សុខារី បាន​ប្រាប់​ VOA ថា លោក​បាន​ខកចិត្ត​ដែល​លោក​មិន​បាន​ទទួល​ជោគជ័យ​សម្រាប់​ការ​ឈរ​ឈ្មោះ​ជា​បេក្ខជន​របស់​លោក​ជា​លើក​ដំបូង​នេះ។ លោក​បាន​អះអាង​ថា នេះ​គឺ​ដោយសារ​តែ​បញ្ហា​ផ្លាស់ទី​វិទ្យាល័យ​ឡូវែល ដែល​គ្រប​ដណ្តប់​ខ្លាំង​បំផុត​ក្នុង​ការ​បោះឆ្នោត​ឆ្នាំ​នេះ ហើយ​ពលរដ្ឋ​ភាគច្រើន​បាន​បោះឆ្នោត​ឲ្យ​បេក្ខជន​ណា​ដែល​គាំទ្រ​ឲ្យ​វិទ្យាល័យ​នេះ ស្ថិត​នៅទីតាំង​ដដែល។

យោង​តាម​សារព័ត៌មាន​ដដែល​នេះ អ្នក​បោះឆ្នោត​ប្រមាណ​ជិត​៦០ភាគរយ​នៃ​ចំនួន​អ្នក​បោះឆ្នោត​សរុប​ជាង​៩ម៉ឺននាក់ គឺ​ចេញ​ពី​តំបន់ Belvidere ដែល​អ្នក​ទាំង​នោះ​គាំទ្រឲ្យវិទ្យាល័យ​ឡូវែល​នេះ​ស្ថិត​នៅ​ទីតាំង​នៅ​កណ្តាល​ក្រុង​ដដែល។

ទោះ​ជា​យ៉ាងណា​ក្តី លោក ចៅ ​សុខារី បាន​បញ្ជាក់​ថា លោក​អបអរ​សាទរ​ និង​មាន​មោទនភាព​ចំពោះ​លោក នួន វាសនា ដែល​បាន​ជាប់​ជា​សមាជិក​ម្នាក់​នៃ​ក្រុម​ប្រឹក្សា​ក្រុង​ឡូវែល និង​លោក ឡាយ ឌូមីនិច ដែល​បាន​ជាប់​ជា​សមាជិក​ម្នាក់​នៃ​គណៈកម្មាធិការ​សាលារៀន។

លោក​បាន​បញ្ជាក់​ថា៖​ «‍យើង​ចង់​បង្ហាញ​អំពី​សហគមន៍​យើង ដែល​ជា​ខ្មែរ​អាមេរិកាំង​នៅ​ក្រុង​នេះ។ ការណ៍​ដែល​យើង​អាច​បង្កើត​មូលដ្ឋាន​គ្រឹះ​របស់​យើង​នៅ​ក្នុង​ក្រុង​នេះ យើង​ចាំ​បាច់​ត្រូវ​រួបរួម​គ្នា ហើយ​ចូលរួម​ចំណែក​នៃ​សាលាក្រុង និង​ថ្នាក់​ដឹកនាំ​ក្រុង និង​ក្នុង​ទីក្រុង​ទាំង​មូល​ ហើយ​នេះ​គឺជា​រឿង​ដ៏​មាន​ឥទ្ធិពល​មួយ»។

លោក នួន វាសនា ​បាន​ឈ្នះ​ការ​បោះឆ្នោត​ដោយ​បាន​សំឡេង​ច្រើន​បង្អស់ ហើយ​បាន​ក្លាយ​ជា​សមាជិក​ម្នាក់​នៃ​ក្រុម​ប្រឹក្សា​ក្រុង​ឡូវែល។

លោក​ បាន​ប្រាប់ VOA ថា៖ «‍ជោគជ័យ​នេះ មិន​មែន​សម្រាប់​តែ​ពូទេ គឺ​ជោគ​ជ័យ​សម្រាប់​ខ្មែរ​អាមេរិកាំង​នៅ​ទីក្រុង​ឡូវែល ហើយ​ក៏​ដូច​ជា​អ្នក​នៅ​ភូមិ​ក្បែរៗ​ហ្នឹង ពីព្រោះ​អី វា​ស​ឲ្យ​ឃើញ​ថា ខ្មែរ​អាមេរិកាំង​ដែល​លោក​បាន​មក​ដល់​ស្រុក​នេះ​យូរ​ឆ្នាំ​ណាស់​ថា បើ​សិន​ណា​លោក​ខំប្រឹង តស៊ូ​មតិ តស៊ូ​អ្វី​សម្រាប់​ផល​ប្រយោជន៍​ដល់​សហគមន៍ មិនមែន​តែ​សង្គម​ខ្មែរ​អាមេរិកាំង​ទេ គឺ​សង្គម​ទាំង​មូល គឺ​ថា​ថ្ងៃណា​[មួយ] នឹង​បាន​ជ័យ​ជម្នះ​ហើយ»។

ពលរដ្ឋ​នៅទីក្រុង​ឡូវែល ឈរ​កាន់​បដា​ឃោសនា​ការ​គាំទ្រ​ដល់​បេក្ខជន​ដែល​ខ្លួន​ពេញ​ចិត្ត នៅក្នុង​ដំណើរការ​បោះឆ្នោត​ថ្នាក់ក្រុង នៅ​ទីក្រុង​ឡូវែល រដ្ឋ​ម៉ាសាឈូសេត កាលពី​ថ្ងៃអង្គារ ទី៧ ខែ​វិច្ឆិកា ឆ្នាំ២០១៧។ (រូបថតផ្តល់​ឲ្យ​ដោយ Sidney Liang)
ពលរដ្ឋ​នៅទីក្រុង​ឡូវែល ឈរ​កាន់​បដា​ឃោសនា​ការ​គាំទ្រ​ដល់​បេក្ខជន​ដែល​ខ្លួន​ពេញ​ចិត្ត នៅក្នុង​ដំណើរការ​បោះឆ្នោត​ថ្នាក់ក្រុង នៅ​ទីក្រុង​ឡូវែល រដ្ឋ​ម៉ាសាឈូសេត កាលពី​ថ្ងៃអង្គារ ទី៧ ខែ​វិច្ឆិកា ឆ្នាំ២០១៧។ (រូបថតផ្តល់​ឲ្យ​ដោយ Sidney Liang)

លោក​បាន​បញ្ជាក់​ថា លោក​នឹង​ធ្វើ​ជា​«‍តំណាង​ក្រុង​ទាំង​មូល» ប៉ុន្តែ​លោក​នឹង​ផ្តោត​ការ​យកចិត្ត​ទុក​ដាក់​លើ​សហគមន៍​ជនជាតិ​ភាគតិច​នៅ​ទីក្រុង​ឡូវែល​នេះ មិន​ថាទាំង​ខ្មែរ​អាមេរិកាំង​ទេ គឺ​រួម​ទាំង​សហគមន៍​ពលរដ្ឋ​អាមេរិកាំង​ស្បែក​ស និង​ជនជាតិភាគតិច​ផ្សេង​ទៀត ដែល​មិន​មាន​តំណាង​ពី​សហគមន៍​របស់​ខ្លួន​ក្នុង​ថ្នាក់​ដឹកនាំ​ក្រុម​ប្រឹក្សា​ក្រុង។

លោក​ នួន វាសនា បាន​បន្ថែម​ថា លោក​នឹង​ផ្តោត​លើ​កិច្ចការ​ចម្បង​ចំនួន​ពីរ គឺ​ដំណើរការ​ជួសជុល​វិទ្យាល័យ​ឡូវែល និង​ដំណើរការ​រក​ដំណោះ​ស្រាយ​លើ​ពាក្យ​បណ្តឹង​ដែល​ទាមទារ​ឲ្យ​ទីក្រុង​ឡូវែល​នេះ ផ្លាស់ប្តូរ​ប្រព័ន្ធ​បោះឆ្នោត។

លោក នួន វាសនា បាន​មាន​ប្រសាសន៍​ថា៖ «‍ក្តី​រំពឹង​នឹង​គឺ​ ជាពិសេស​គឺ​ទីតាំង​វិទ្យាល័យ​នៅ​ទីក្រុង​ឡូវែល។ នៅទីក្រុង​ឡូវែល​ទាំងមូល គឺ​ចង់​ឲ្យ​វិទ្យាល័យ​ឡូវែល​នៅ​កណ្តាល​ក្រុង ហើយ​សាងសង់​ និង​ជួសជុល​ជា​ថ្មី។​ អាហ្នឹង​ទីមួយ។ ទីពីរ​ហ្នឹង គឺ​ពាក់ព័ន្ធ​នឹង​រឿង​ប្រព័ន្ធ​បោះឆ្នោត​សព្វថ្ងៃ​នេះ ដែល​មាន​បណ្តឹង​ដោយ​ជនជាតិ​ភាគតិច​នៅឯ​តុលាការ​នោះ មិន​ទាន់​ចប់​សព្វគ្រប់​ទេ‍»។

សមាជិក​ក្រុម​ប្រឹក្សា​ក្រុង​ឡូវែល​ចំនួន​៩នាក់ និង​សមាជិក​នៃ​គណៈកម្មាធិការ​សាលារៀន​ឡូវែល​ចំនួន​៦នាក់ សម្រាប់​អាណត្តិ​ថ្មី​នេះ ដែល​មាន​ពលរដ្ឋ​ខ្មែរ​អាមេរិកាំង​ពីររូប គឺ​លោក នួន វាសនា និង​លោក ឡាយ ឌូមីនិច នឹង​ស្បថ​ចូល​កាន់​តំណែង​នៅ​ដើម​ខែ​មករា ឆ្នាំ​២០១៨​ខាង​មុខ​នេះ៕

XS
SM
MD
LG