ការបំផ្ទុះគ្រាប់បែកពីរនៅក្នុងក្រុង Homs នៃប្រទេសស៊ីរីបានបណ្តាលឱ្យមនុស្សយ៉ាងតិចណាស់១៩នាក់ស្លាប់កាលពីថ្ងៃច័ន្ទ ដោយអ្នកដាក់គ្រាប់បែកអត្តឃាតម្នាក់បានបំផ្ទុះគ្រឿងផ្ទុះនៅពេលក្រុមមនុស្សនៅជិតខាងបានមកមើលការខូចខាតដោយការផ្ទុះទីមួយ។
ការផ្ទុះគ្រាប់បែកទាំងនេះបានកើតមានឡើងនៅក្នុងសង្កាត់ al-Zahraa នៃក្រុង Homs ដែលស្ថិតនៅក្នុងផ្នែកកណ្តាលនៃទីក្រុង។ គេនៅតែមិនទាន់ដឹងច្បាស់លាស់នៅឡើយទេអំពីចំនួនពិតប្រាកដនៃអ្នកបាត់បង់ជីវិត ដោយបណ្តាញផ្សាយព័ត៌មានរបស់រដ្ឋនៃប្រទេសស៊ីរីរាយការណ៍ថាមនុស្ស១៩នាក់បានស្លាប់ ហើយអង្គការ Syrian Observatory for Human Rights បាននិយាយថាមានមនុស្សបាត់បង់ជីវិត៣២នាក់។ មានមនុស្សច្រើននាក់ទៀតបានត្រូវរបួស។
នេះជាការវាយប្រហារធំលើកទីពីរនៅក្នុងក្រុង Homs ចាប់តាំងពីមានកិច្ចព្រមព្រៀងឈប់បាញ់គ្នារវាងភាគីច្បាំងគ្នាបានចូលជាធរមានកាលពីពេលមុននេះក្នុងខែនេះ ដែលបានបើកផ្លូវឱ្យរដ្ឋាភិបាលចូលកាន់កាប់តំបន់ចុងក្រោយបង្អស់ដែលត្រួតត្រាដោយក្រុមឧទ្ទាមនៅក្នុងក្រុងនេះ។
នៅពេលជាមួយគ្នានេះ ការជម្លៀសមនុស្សចេញពីក្រុងបីផ្សេងទៀតបានចាប់ផ្តើមធ្វើ នៅក្រោយមានកិច្ចព្រមព្រៀងខាងមនុស្សធម៌មួយគាំទ្រដោយអ.ស.ប.ត្រូវបានសម្រេចកាលពីខែកញ្ញារវាងរដ្ឋាភិបាលនិងក្រុមឧទ្ទាមដែលប្រឆាំងនឹងរដ្ឋបាលរបស់ប្រធានាធិបតី Bashar al-Assad៕
