ភ្ជាប់​ទៅ​គេហទំព័រ​ទាក់ទង

ការ​ផ្ទុះ​ពីរគ្រាប់​​ក្នុង​ទីក្រុង​ Homs​ ប្រទេស​ស៊ីរី​បាន​សម្លាប់​មនុស្ស​៤៦​នាក់


រូបថត​បញ្ចេញ​ដោយ​ភ្នាក់​ងារ​សារព័ត៌មាន​រដ្ឋ​ស៊ីរី បង្ហាញ​ឲ្យ​ឃើញ​កន្លែង​ផ្ទុះ​ពីរគ្រាប់​ក្នុង​តំបន់​ Zahraa ដែលគាំទ្រ​រដ្ឋាភិបាល ក្នុង​ទីក្រុង​ Homs ប្រទេស​ស៊ីរី កាលពីថ្ងៃទី២១ ខែកុម្ភៈ ឆ្នាំ២០១៦។

អង្គការ​ឃ្លាំមើល​សិទ្ធិ​មនុស្ស​បាន​និយាយ​ថា ​ចំនួន​មនុស្ស​ស្លាប់​បណ្តាល​មក​ពី​ការ​ផ្ទុះ​២​គ្រាប់​នៅ​កណ្តាល​ក្រុង ​Homs ​នៃ​ប្រទេស​ស៊ីរី ​បានកើន​ឡើង​៤៦​នាក់​ដោយ​មាន​មនុស្ស​រាប់​សិប​នាក់​ទៀត​បាន​រង​របួស។

​អង្គការ​សិទ្ធិ​មនុស្ស​ឈ្មោះ​ថា​ Syrian Observatory ​ដែល​មាន​ទីតាំង​នៅ​ក្នុង​ប្រទេស​អង់គ្លេស​និយាយ​ថា ​ការ​ផ្ទុះ​គ្រាប់​២​គ្រាប់នៅ​ថ្ងៃ​អាទិត្យ​នេះ ​បាន​កើត​មាន​ឡើង​នៅ​សង្កាត់ ​al-Zahraa ​ហើយ​អ្នក​ស្លាប់​ភាគ​ច្រើន​ទំនង​ជា​ជន​ស៊ីវិល។

ទីក្រុង ​Homs ​ជា​ទីដៅ​នៃ​ការ​វាយ​ប្រហារ​ជា​ច្រើន​នៅ​ក្នុង​រយៈ​ពេល​ប៉ុន្មាន​ខែ​ថ្មីៗ​នេះ ​ដោយ​បាន​សម្លាប់​ហើយ​នឹង​ធ្វើ​ឲ្យ​មនុស្ស​របួស​មួយ​ចំនួន។​ អង្គការ​សិទ្ធិ​មនុស្ស​ Syrian Observatory បាន​ប្រាប់​ឲ្យ​ដឹង​ទៀត​ថា ​ការ​ផ្ទុះ​នៅ​ថ្ងៃ​អាទិត្យ​នេះ​ស្ថិត​ក្នុង​ចំណោម​នៃ​ការ​វាយ​ប្រហារ​ដ៏​ធំ​បំផុត​នៅ​ក្នុង​សង្កាត់​នោះ​នៅ​ក្នុង​សង្គ្រាម​ស៊ីវិល​ដែល​អូស​បន្លាយ​រយៈ​ពេល​៥​ឆ្នាំ​នេះ។

គ្មាន​ក្រុម​ណា​មួយ​អះអាង​ទទួល​ខុសត្រូវ​ចំពោះ​ការ​វាយ​ប្រហារ​ដ៏​ប្រល័យ​នេះ​ទេ ដែល​ការ​វាយ​ប្រហារ​នេះ​កើត​មាន​ឡើង​មួយ​ថ្ងៃ​បន្ទាប់​ពី​លោករដ្ឋ​មន្រ្តី​ការ​បរទេស​សហរដ្ឋ​ John Kerry ​ហើយ​រដ្ឋ​មន្រ្តីការ​បរទេស​រុស្ស៊ីលោក ​Sergei Lavrov ​បាន​ធ្វើ​ការ​ពិភាក្សា​គ្នា​តាម​ទូរស័ព្ទ​ស្តី​ពី​វិបត្តិ​នៅ​ក្នុង​ប្រទេ​សស៊ីរី។

ក្រុម​ឧទ្ទាមចម្រុះ​ដ៏​សំខាន់​មួយ​នៅ​ក្នុង​ប្រទេសស៊ីរី​បាន​និយាយ​ថា ​ខ្លួន​មាន​ឆន្ទៈ​ទទួល​យក​ការ​ឈប់​បាញ់​គ្នា​ជា​បណ្តោះ​អាសន្ន ​ក៏ប៉ុន្តែ​ ល្គឹកណា​រុស្ស៊ី​បញ្ឈប់​ការ​វាយ​ប្រហារ​តាម​អាកាស​ហើយ​រដ្ឋាភិបាល​ទីក្រុង​ដាម៉ាស ​បញ្ចប់​ការ​វាយ​ប្រហារ​របស់​ខ្លួន​នៅ​ជិត​ព្រំ​ដែន​ស៊ីរី​និង​តួកគី។

​គ្មាន​ការ​ចង្អុល​បង្ហាញ​ថា លោករដ្ឋ​មន្រ្តី​ការ​បរទេស​អាមេរិក​ Kerry ​និង​រដ្ឋ​មន្រ្តី​ការបរទេស​រុស្ស៊ី ​Lavrov ​បាន​ធ្វើ​ឲ្យ​មានការ​ជឿន​លឿន​ស្តី​ពី​បញ្ហា​ការ​ឈប់​បាញ់​គ្នា​នេះ​ទេ។

​ប្រទេស​រុស្ស៊ី ​បាន​និយាយ​ថា ​ខ្លួន​នឹង​បញ្ឈប់​ការ​វាយ​ប្រហារ​តាម​អាកាស​ប្រឆាំង​នឹង​អ្វី​ដែល​រុស្ស៊ី ​ហៅ​ថា​ទីដៅ​ភេរវជន​នៅ​ក្នុង​ប្រទេស​ស៊ីរី ទោះ​ជា​មាន​កិច្ច​ព្រម​ព្រៀង​អន្តរជាតិ​ស្តី​ពី​ការ​បញ្ឈប់​ការបាញ់​គ្នា​បណ្តោះ​អាសន្ន​ក៏ដោយ​ ដែល​ពួក​អ្នកការ​ទូត ​បាន​ហៅ​ថា ​ការ​ឈប់​បាញ់​គ្នា​ដោយ​អារិភាព។​

សហរដ្ឋ​អាមេរិកហើយ​និងប្រទេស​ផ្សេង​ទៀត​ដែល​ពាក់​ព័ន្ធ​ក្នុង​ការ​ព្យាយាម​បញ្ចប់​សង្គ្រាម​ស៊ី​វិល​ក្នុង​ប្រទេស​ស៊ីរី ​បាន​និយាយ​ថា ​ការ​ទម្លាក់​គ្រាប់​បែក​របស់​រុស្ស៊ី​ភាគ​ច្រើន ​គឺ​ទៅលើ​ពួក​ឧទ្ទាម​ដែល​ប្រយុទ្ធ​រដ្ឋាភិបាល​ស៊ី​រី ​មិន​មែន​ទៅ​លើ​ក្រុម​រដ្ឋ​ឥស្លាម​ទេ៕

XS
SM
MD
LG