ជនជាតិជប៉ុនចំនួន ២៥ នាក់ នឹងត្រូវបណ្តេញចេញពីកម្ពុជា ក្រោយការចាប់ខ្លួនពីបទសង្ស័យថាមានការពាក់ព័ន្ធនឹងការចាប់បង្ខាំងមនុស្ស និងប្រើអំពើហិង្សា។ នេះបើតាមមន្ត្រីជាន់ខ្ពស់មួយរូបរបស់ក្រសួងមហាផ្ទៃ។ ការចាប់ខ្លួននោះធ្វើឡើងទៅតាមសំណើរបស់ភាគីស្ថានទូតជប៉ុនប្រចាំទីក្រុងភ្នំពេញ។ ជនជាតិជប៉ុនដែលត្រូវបានចាប់ខ្លួននោះស្ថិតនៅក្នុងចំណោមជនជាតិជប៉ុន ២៨ នាក់ ដែលត្រូវបានកំណត់ថា ជាមុខសញ្ញានៃក្រុមដែលបានបង្កអំពើបង្ខាំងមនុស្សក្នុងប្រទេសប្រទេសកម្ពុជា។
អ្នកនាំពាក្យក្រសួងមហាផ្ទៃលោក ទូច សុខៈ បានបញ្ជាក់វីអូអេឱ្យដឹងថា ការចាប់ខ្លួនជនជាតិជប៉ុនទាំង ២៥ នាក់នេះ គឺធ្វើឡើងតាមសំណើរបស់ស្ថានទូតជប៉ុនដែលបានស្នើសុំកិច្ចសហប្រតិបត្តិការជាមួយក្រសួងមហាផ្ទៃ ក្រោយជនជាតិជប៉ុនម្នាក់ផ្តល់ព័ត៌មានថា មានការចាប់បង្ខាំងនិងប្រើអំពើហិង្សាលើរាងកាយគាត់។
លោកថ្លែងថា៖«អគ្គស្នងការដ្ឋាននគរបាលជាតិគឺ លោកបានកំណត់មុខសញ្ញាជនជាតិជប៉ុនទាំងអស់ ២៨ នាក់។ ហើយបានធ្វើប្រតិបត្តិការចាប់បានជាក់ស្តែងឃាត់ខ្លួនបាន ២៥ [នាក់] អ៊ីចឹង ៣នាក់ទៀតរត់គេចខ្លួន ដែលអគ្គស្នងការកំពុងតែបន្តនីតិវិធីនិងជំនាញក្នុងការងារបន្តទៀត។ ហើយករណីទាក់ទងនឹងបណ្តឹងរបស់ជនជាតិជប៉ុនម្នាក់ប្តឹងថា មានការបង្ខាំងនិងប្រើអំពើហិង្សាលើគាត់ គាត់ប្តឹងហ្នឹង ប្តឹងទៅស្ថានទូតជប៉ុនប្រចាំប្រទេសកម្ពុជាយើង»។
បើតាមអ្នកនាំពាក្យរូបនេះ ជនជាតិជប៉ុនទាំង ២៥ នាក់ ត្រូវបានឃាត់ខ្លួនកាលពីថ្ងៃទី១១ ខែកញ្ញា ឆ្នាំ២០២៣ ហើយជនជាតិជប៉ុន ៣ នាក់ទៀត កំពុងសម្ងំលាក់ខ្លួនក្នុងប្រទេសកម្ពុជា។
គិតត្រឹមថ្ងៃសុក្រនេះ ជនជាតិជប៉ុនដែលត្រូវបានឃាត់ខ្លួនទាំង ២៥ នាក់នោះ ត្រូវបានបញ្ជូនទៅកាន់អគ្គនាយកដ្ឋានអន្តោប្រវេសន៍ដើម្បីបន្តនីតិវិធីបណ្តេញចេញពីកម្ពុជាទៅប្រទេសជប៉ុនវិញ។ នេះបើតាមក្រុមមន្ត្រីប្រចាំក្រសួងមហាផ្ទៃ។
អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍លោក កែវ វណ្ណថន ប្រាប់វីអូអេនៅថ្ងៃសុក្រនេះថា មន្ត្រីអន្តោប្រវេសន៍កំពុងកសាងឯកសារស្នើសុំគោលការណ៍ពីក្រសួងមហាផ្ទៃជាមុនសិន ទើបអាចបញ្ជូនជនជាតិជប៉ុនទាំងនោះទៅកាន់ប្រទេសរបស់ពួកគេវិញបាន។
លោកលើកឡើងថា៖ «នៅទេ យើងរក្សាទុក[ជនជាតិជប៉ុន ២៥ នាក់បណ្តោះអាសន្ន នៅអគ្គនាយកដ្ឋានអន្តោប្រវេសន៍ កំពុងតែកសាងឯកសារសុំគោលការណ៍រដ្ឋមន្ត្រីមហាផ្ទៃ។ កាលណាបានប្រកាសពីរដ្ឋមន្ត្រីក្រសួងមហាផ្ទៃមកបានយើងរៀបចំបណ្តេញចេញ»។
ដោយឡែក អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ប្រាប់វីអូអេតាមប្រព័ន្ធទំនាក់ទំនងតេឡេក្រាមថា ការចាប់ខ្លួនជនជាតិជប៉ុនចំនួន ២៥ នាក់នេះ គឺធ្វើឡើងក្រោមការសង្ស័យថា ពួកគេជាប់ពាក់ព័ន្ធនឹងការប្រព្រឹត្តអំពើឆបោកជនជាតិជប៉ុននៅឯប្រទេសជប៉ុន។
ស្ថានទូតជប៉ុនប្រចាំនៅប្រទេសកម្ពុជា បានបញ្ជាក់វីអូអេឱ្យដឹងថា ស្ថានទូតបានដឹងអំពីករណីនៃការចាប់ខ្លួនជនជាតិជប៉ុនទាំង ២៥នាក់នោះ ប៉ុន្តែបដិសេធការផ្តល់នូវសេចក្តីលម្អិត។
អ្នកនាំពាក្យស្ថានទូតជប៉ុនអ្នកស្រី អាសាជី មីយោហ្ស៊ី Asagi Miyoshi បានលើកឡើងតាមសារអ៊ីមែលថា៖«ចំពោះករណីនេះ ដោយសារវាជារឿងមួយដែលស្ថិតក្រោមការស៊ើបអង្កេត ស្ថានទូតមិនអាចបង្ហាញព័ត៌មានលម្អិតបានទេ»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត លើកឡើងថា អាជ្ញាធរកម្ពុជាគួរតែពង្រឹងវិធានការនៃការអនុវត្តច្បាប់ឱ្យបានតឹងរ៉ឹងទៅលើជនជាតិបរទេសដែលមកប្រព្រឹត្តបទរល្មើស ឬបទឧក្រិដផ្សេងៗនៅ កម្ពុជា ដើម្បីបញ្ចៀសការខាតប្រយោជន៍នានារបស់កម្ពុជា ទាំងក្នុងវិស័យទេសចរណ៍ និងការវិនិយោគ។
លោកប្រាប់វីអូអេថា៖ «អ៊ីចឹងកម្ពុជាយើង ត្រូវតែពង្រឹងវិធានការនៃការអនុវត្តច្បាប់ ទាំងច្បាប់អន្តោប្រវេសន៍ ទាំងច្បាប់ក្នុងស្រុក ទៅជនបរទេសទាំងឡាយដើម្បីបង្កើននូវជំនឿទុកចិត្ត ឬក៏ការទប់ស្កាត់ និងការបង្ក្រាបទៅលើបទល្មើសផ្សេងៗ ជាពិសេសទាក់ទងជាមួយនឹង Cyber Crime [អំពើឆបោកតាមអនឡាញ]»។
បើតាមសេចក្តីរាយការណ៍របស់សារព័ត៌មានជប៉ុន The Japan Times ករណីជាច្រើនកើតឡើងជាបន្តបន្ទាប់ ដែលក្រុមទុច្ចរិតជនជាតិជប៉ុនជាច្រើននាក់ត្រូវបានរកឃើញថាកំពុងប្រើប្រាស់ប្រទេសនានាក្នុងតំបន់អាស៊ីអាគ្នេយ៍ធ្វើជាកន្លែងលាក់ខ្លួន ដើម្បីប្រព្រឹត្តអំពើឆបោក។
កាលពីខែមេសា អាជ្ញាធរកម្ពុជាបាននិរទេសជនជាតិជប៉ុនចំនួន ១៩ នាក់ ចំពោះការសង្ស័យថាបានពាក់ព័ន្ធនៅក្នុងអំពើឆបោកតាមទូរសព្ទ ហើយពួកគេត្រូវបានចាប់ខ្លួនម្តងទៀតនៅពេលបញ្ជូនដល់ប្រទេសជប៉ុន៕
