ឃ្លីបវីដេអូថ្មីមួយដែលត្រូវបានផ្សព្វផ្សាយពីទីក្រុងអ៊ីស្តង់ប៊ុល ប្រទេសតួកគី បានបង្ហាញឲ្យឃើញថា ភ្នាក់ងាររបស់ប្រទេសអារ៉ាប៊ីសាអូឌីតម្នាក់ស្លៀកសម្លៀកបំពាក់របស់អ្នកកាសែតអារ៉ាប៊ីសាអូឌីតលោក Jamal Khashoggi និងបានដើរចាកចេញពីស្ថានកុងស៊ុលរបស់ក្រុងរីយ៉ាត់កាលពីថ្ងៃទី២ខែតុលា។ ការបង្កើតវីដេអូនេះឡើងគឺមានបំណងចង់បិទបាំងការស្លាប់របស់លោក Khashoggi ដោយសំអាងថាលោកបានចាកចេញពីស្ថានកុងស៊ុលទាំងនៅមានជីវិត។
វីដេអូនេះត្រូវបានរកឃើញដោយអាជ្ញាធរតួកគីនិងបានដាក់បង្ហាញតាមរយៈសារព័ត៌មាន CNN កាលពីថ្ងៃចន្ទដោយមានការលើកឡើងថាភ្នាក់ងាររបស់អារ៉ាប៊ីសាអូឌីតបានតែងខ្លួនជាលោក Khashoggi ដើម្បីព្យាយាមលាក់បាំងឃាតកម្មលើរូបលោក។
វីដេអូនេះត្រូវបានផ្សព្វផ្សាយខណៈមន្ត្រីអារ៉ាប៊ីសាអូឌីតមិនទាន់បានធ្វើការបកស្រាយអំពីការស្លាប់របស់លោក Khashoggiអាយុ៥៩ ជាអ្នកកាសែតអារ៉ាប៊ីសាអូឌីតដែលបានភៀសខ្លួនមករស់នៅសហរដ្ឋអាមេរិក បន្ទាប់ពីលោកបានសរសេរអត្ថបទមួយនៅក្នុងកាសែត The Washington Post រិះគន់ព្រះអង្គម្ចាស់រាជ្ជទាយាទអារ៉ាប៊ីសាអូឌីត Mohammed bin Salman និងការជាប់ពាក់ព័ន្ធរបស់រដ្ឋាភិបាលក្រុងរីយ៉ាត់ក្នុងជម្លោះនៅប្រទេសយេម៉ែន។ កាលពីដំបូងប្រទេសអារ៉ាប៊ីសាអូឌីតបានប្រកាសថាលោក Khashoggi បានចាកចេញពីស្ថានកុងស៊ុលនិងថាពួកគេមិនបានដឹងថាលោកនៅទីកន្លែងណានោះទេ។ ប៉ុន្តែក្រោយមកពួកគេបាននិយាយថាលោក Khashoggi បានស្លាប់ដោយសារវាយតប់គ្នានៅក្នុងស្ថានកុងស៊ុល។ ឥឡូវនេះអាជ្ញាធរអារ៉ាប៊ីសាអូឌីតបានប្រកាសថាលោក Khashoggi បានស្លាប់ដោយសារការច្របាច់កររារាំងមិនឲ្យលោកចាកចេញពីស្ថានកុងស៊ុលដើម្បីសុំជំនួយ៕
លោកប្រធានាធិបតីតួកគី Recep Tayyip Erdogan បានសច្ចាថានិងលាតត្រដាងលម្អិតអំពីករណីរបស់លោក Khashoggi៕
