សមាជិកសភាប្រទេសតួកគីត្រូវគេរំពឹងថានឹងយល់ព្រមតាមការអំពាវនាវរបស់លោកប្រធានាធិបតីតួកគី Erdogan នៅថ្ងៃព្រហស្បតិ៍នេះ ឲ្យដាក់ប្រទេសតួកគីក្នុងភាពអាសន្នក្នុងរយៈពេល៣ខែ។ នេះជាការវិវឌ្ឍន៍មួយដែលអាចត្រួសត្រាយផ្លូវឲ្យមានការបោសសំអាតបន្ថែមទៀតចំពោះអ្នកប្រឆាំង នឹងលោក Erdogan ទាំងឡាយ បន្ទាប់ពីមានការប៉ុនប៉ងធ្វើរដ្ឋប្រហារកាលពីថ្ងៃសុក្រសប្តាហ៍មុន ដែលទទួលបរាជ័យក្នុងការទម្លាក់លោក Erdogan និងរដ្ឋាភិបាលរបស់លោករួចមក។
ការដាក់ប្រទេសតួកគីឲ្យស្ថិតក្នុងភាពអាសន្ននេះមានរយៈពេល៣ខែ។ នេះបើតាមការបញ្ជាក់របស់លោក Erdogan នៅក្នុងការថ្លែងសុន្ទរកថារបស់លោកតាមកញ្ជក់ទូរទស្សន៍កាលពីយប់ថ្ងៃពុធម្សិលមិញនេះ បន្ទាប់ពីមានកិច្ចប្រជុំបន្ទាន់ជាបន្តបន្ទាប់តាំងពីកិច្ចប្រជុំជាមួយក្រុមប្រឹក្សាសន្តិសុខ រហូតដល់កិច្ចប្រជុំជាមួយគណៈរដ្ឋមន្ត្រីរបស់លោករួចមក។
លោក Erdogan បាននិយាយថា គោលបំណងនៃការដាក់ប្រទេសតួកគីឲ្យស្ថិតក្នុងភាពអាសន្នគឺ «ដើម្បីមានលទ្ធភាពក្នុងការសម្រេចឲ្យមានប្រសិទ្ធិភាពនូវជំហានបន្ទាប់ ក្នុងការធ្វើឲ្យប្រទសតួកគីវិលមករកលទ្ធិប្រជាធិបតេយ្យ និងនីតិរដ្ឋវិញ»។ មេដឹកនាំតួកគីរូបនេះក៏បានបញ្ជាក់ផងដែរថា កងកម្លាំងប្រដាប់អាវុធនឹងមិនត្រួតត្រាប្រទេសទេក្នុងអំឡុងពេលនេះ។
នៅយប់ថ្ងៃពុធម្សិលមិញនេះ អ្នកគាំទ្រលោក Erdogan រាប់រយនាក់បានចេញមកឈរត្រៀបត្រាពេញទីលាន Taksim នៅក្នុងទីក្រុង Istanbul និងទីលានសាធារណៈផ្សេងៗទៀតនៅទូទាំងប្រទេសតួកគី ដើម្បីបង្ហាញការគាំទ្រដល់មេដឹកនាំតួកគីលោក Erdogan និងដើម្បីបង្វែងនូវការគិតដែលថាអ្វីដែលមេដឹកនាំតួកគីនិយាយអាចជាការប៉ុនប៉ងធ្វើរដ្ឋប្រហារលើកទីពីរនោះ។
ការថ្លែងសុន្ទរកថារបស់លោក Erdogan ត្រូវបានផ្សាយបន្តផ្ទាល់តាមផ្ទាំងកញ្ជក់ទូរទស្សន៍ធំៗ ដែលដាក់តម្លើងនៅជុំវិញទីលាន Taksim។ ការប្រកាសពីការដាក់ប្រទេសតួកគីឲ្យស្ថិតក្នុងភាពអាសន្ននេះ ត្រូវបានអ្នកគាំទ្រទាំងអស់ទះដៃអបអរសាទរ៕
