ប្រធានាធិបតីទុយនីស៊ី លោក Beji Caid Essebsi នឹងធ្វើការប្រជុំជាបន្ទាន់មួយនៅថ្ងៃពុធនេះ ជាមួយនឹងក្រុមប្រឹក្សាសន្តិសុខរបស់លោក មួយថ្ងៃក្រោយពីការផ្ទុះមួយបានសម្លាប់មនុស្សយ៉ាងតិច១២នាក់នៅក្នុងរដ្ឋធានីរបស់ប្រទេសនេះ។
ការផ្ទុះនោះបានត្រូវចំរថយន្តក្រុងមួយគ្រឿង ដែលកំពុងដឹកកងសន្តិសុខប្រធានាធិបតីនៅលើមហាវិថីមួយ ដែលមានដើមឈើដុះអមសងខាង ក្នុងទីក្រុងទុយនីស។ ប្រភពពីភ្នាក់ងារសន្តិសុខនិងការិយាល័យប្រធានាធិបតីបាននិយាយថា ការផ្ទុះនោះគឺជាការវាយប្រហារមួយ ប៉ុន្តែគេនៅមិនទាន់អាចបញ្ជាក់ឲ្យច្បាស់ភ្លាមៗនៅឡើយទេ ថាតើការផ្ទុះនោះបណ្តាលមកពីការបង្កប់គ្រាប់បែក ឬក៏ពាក់ព័ន្ធនឹងសារធាតុផ្ទុះណាមួយដែលគេបាញ់សំដៅទៅលើឡានក្រុងនោះ។
លោក Essebsi បានប្រកាសស្ថានភាពមានអាសន្នរយៈពេល៣០ថ្ងៃ នៅក្នុងប្រទេសទុយនីស៊ី ហើយទីក្រុងទុយនីត្រូវស្ថិតនៅក្នុងបម្រាមគោចរណ៍នៅពេលពាក់កណ្តាលយប់។
ថ្លែងតាមកញ្ចក់ទូរទស្សន៍ជាតិកាលពីយប់ថ្ងៃអង្គារ លោក Essebsi បាននិយាយថា ប្រទេសទុយនីស៊ីកំពុង «ធ្វើសង្គ្រាមប្រឆាំងនឹងភេរវកម្ម» ហើយបានជំរុញឲ្យមានកិច្ចសហប្រតិបត្តិការអន្តរជាតិប្រឆាំងនឹងក្រុមជ្រុលនិយម ដែលបានបើកការវាយប្រហារដ៏ផ្តាច់ផ្តិលជីវិតជាច្រើននៅក្នុងរយៈពេលប៉ុន្មានសប្តាហ៍កន្លងមកនេះ។
អគ្គលេខាធិការអង្គការសហប្រជាជាតិ លោក Ban Ki-moon និងក្រុមប្រឹក្សាសន្តិសុខអង្គការសហប្រជាជាតិបានថ្កោលទោសចំពោះការវាយប្រហារនោះ ហើយបានសម្តែងការគាំទ្ររបស់ពួកគេចំពោះប្រទេសទុយនីស៊ី៕
