ប្រធានាធិបតីទុយនីស៊ីលោក Kais Saied កាលពីថ្ងៃចន្ទ បានពន្យារពេលផ្អាកសភារហូតដល់មានការជូនដំណឹងបន្ថែម បន្ទាប់ពីបានបណ្តេញនាយករដ្ឋមន្រ្តីរបស់លោកចេញពីតំណែង កាលពីខែមុន និងបានបន្តប្រើសិទ្ធិអំណាចនីតិប្រតិបត្តិដែលគូប្រជែងចាត់ទុកថា រដ្ឋប្រហារ។ នេះបើតាមទីភ្នាក់ងារសារព័ត៌មាន Reuters ដែលស្រង់សម្តីប្រភពការិយាល័យប្រធានាធិបតី។
ការិយាល័យប្រធានាធិបតីថា លោក Saied ក៏បានពន្យារការព្យួរអភ័យឯកសិទ្ធិសមាជិកសភាផងដែរ ដោយបន្ថែមថា លោក Saied នឹងថ្លែងសុន្ទរកថាទៅកាន់ប្រទេសជាតិនៅប៉ុន្មានថ្ងៃខាងមុខនេះ តែមិនផ្តល់ព័ត៌មានលម្អិតបន្ថែមទេ។
មួយខែបន្ទាប់ពីអន្តរាគមន៍ភ្លាមៗរបស់លោក លោក Saied មិនទាន់បានតែងតាំងនាយករដ្ឋមន្ត្រីថ្មី ឬមិនទាន់បានប្រកាសពីផែនការគម្រោងការងារដែលសម្ព័ន្ធមិត្តលោកខាងលិច និងភាគីសំខាន់ៗនៅប្រទេសទុយនីស៊ីទាមទារនោះទេ។
លោក Saied បាននិយាយថា អន្តរាគមន៍របស់លោក គឺត្រូវការចាំបាច់ដើម្បីជួយសង្គ្រោះកុំឱ្យប្រទេសដួលរលំ។ លោកហាក់ដូចជាទទួលបានការគាំទ្រពីប្រជាជនយ៉ាងទូលំទូលាយនៅក្នុងប្រទេសទុយនីស៊ីដែលអភិបាលកិច្ចមិនត្រឹមត្រូវជាច្រើនឆ្នាំ អំពើពុករលួយ និងនយោបាយមិនទៅមុខ ត្រូវបានធ្វើឱ្យកាន់តែធ្ងន់ធ្ងរឡើងដោយសារកំណើនដ៏គ្រោះថ្នាក់នៃជំងឺកូវីដ១៩។
ប៉ុន្តែចំណាត់ការរបស់លោកប្រធានាធិបតី បានធ្វើឱ្យមានការព្រួយបារម្ភក្នុងចំណោមប្រជាជនទុយនីស៊ីខ្លះអំពីអនាគតនៃប្រព័ន្ធប្រជាធិបតេយ្យដែលប្រទេសនេះ បានអនុម័តបន្ទាប់ពីបដិវត្តន៍នៅឆ្នាំ២០១១របស់ខ្លួនដែលបង្កឱ្យមានចលនាប្រឆាំងរាលដាល គឺ Arab Spring។ ចាប់តាំងពីពេលនោះមក អាជ្ញាធរ បានឃុំខ្លួនមន្រ្តីមួយចំនួនក្នុងផ្ទះ រួមទាំងអតីតរដ្ឋមន្រ្តីផង និងរារាំងអ្នកនយោបាយនិងពាណិជ្ជករមិនឱ្យធ្វើដំណើរ។ លោក Saied បានជាប់ឆ្នោតដោយឈ្នះភ្លូកទឺក ភ្លូកដីនៅឆ្នាំ២០១៩ ដោយលោកប្តេជ្ញាប្រឆាំងអំពើពុករលួយ៕
