សហជីព​ការងារ​ដ៏​មាន​ឥទ្ធិពល​នៅ​ទុយនីស៊ី​ច្រានចោល​ការបោះឆ្នោត​នៅ​ខែ​ធ្នូ និង​វាយប្រហារ​របៀបវារៈ​របស់​ប្រធានាធិបតី

សហជីព​ដ៏​មាន​អំណាច​នៅ​ប្រទេស​ទុយនីស៊ី​បាន​វាយប្រហារ​របៀបវារៈ​នយោបាយ​និង​សេដ្ឋកិច្ច​របស់​ប្រធានាធិបតី​កាលពី​ថ្ងៃ​សៅរ៍ ទី៣ ខែ​ធ្នូ រួម​ទាំង​ការ​បោះឆ្នោត​នៅ​ខែ​នេះ ដោយ​និយាយ​ថា ពួកគេ​លែង​ទទួល​យក​អ្វី​ដែល​ខ្លួន​ហៅ​ថា​ជា​ការ​គំរាមកំហែង​លទ្ធិប្រជាធិបតេយ្យ នៅ​ក្នុង​ការ​តតាំង​យ៉ាង​ច្បាស់​មួយ​ប្រឆាំង​នឹង​ប្រធានាធិបតី។

សហជីព UGTT និយាយ​ថា ពួកគេ​មាន​សមាជិក​ជាង​មួយ​លាន​នាក់ និង​បាន​បង្ហាញ​ថា ពួកគេ​មាន​លទ្ធភាព​បង្អាក់​សេដ្ឋកិច្ច​ដោយ​ការ​ធ្វើ​កូដកម្ម។ សហជីព​នេះ​ធ្លាប់​បាន​គាំទ្រ​លោក​ប្រធានាធិបតី Kais Saied បន្ទាប់​ពី​លោក​ចូល​កាន់​តំណែង​កាលពី​ឆ្នាំ​មុន ប៉ុន្តែ​នៅ​ពេល​ខ្លះ​បាន​បង្ហាញ​ការ​ជំទាស់​យ៉ាង​ខ្លាំង​ផង​ដែរ។

មេដឹកនាំ​សហជីព​ UGTT លោក Noureddine Taboubi បាន​ថ្លែង​ក្នុង​សុន្ទរកថា​មួយ​ទៅ​កាន់​អ្នក​គាំទ្រ​រាប់​ពាន់​នាក់​ថា៖ «យើង​លែង​ទទួល​ស្គាល់​មាគ៌ា​ដឹកនាំ​បច្ចុប្បន្ន ដោយសារ​តែ​ភាព​មិន​ច្បាស់​លាស់​ និង​ការ​ដឹកនាំ​ដោយ​បុគ្គល និង​ភាព​ភ្ញាក់ផ្អើល​ដែល​មិន​អាច​ទទួល​យក​បាន​ដែល​ថ្នាក់ដឹកនាំ​លាក់​បាំង ហើយ​ការ​លាក់បាំង​នេះ​ធ្វើ​ឱ្យ​ប៉ះ​ពាល់​ដល់​ជោគវាសនា​ និង​លទ្ធិប្រជាធិបតេយ្យ​របស់​ប្រទេស​ជាតិ»។

នៅ​ក្នុង​ការ​រិះគន់​យ៉ាង​ខ្លាំង​បំផុត​ទៅ​លើ​ប្រធានាធិបតី លោក​ Taboubi បាន​បន្ថែម​ថា៖ «យើង​នឹង​មិន​ស្ទាក់ស្ទើរ​ក្នុង​ការ​ការពារ​សិទ្ធិ​និង​សេរីភាព មិន​ថា​យ៉ាង​ណា​នោះ​ទេ»។

លោក Saied បាន​រំសាយ​ចោល​សភា​ជ្រើសតាំងដោយ​ការ​បោះឆ្នោត​កាល​ពី​ឆ្នាំ​មុន​ និង​បាន​ងាក​ទៅ​ដឹកនាំ​ដោយ​វិក្រឹត្យការ មុន​ពេល​តាក់តែង​រដ្ឋធម្មនុញ្ញ​ថ្មី ដែល​ត្រូវ​បាន​អនុម័ត​នៅ​រដូវ​ក្តៅ​ឆ្នាំ​នេះ នៅ​ក្នុង​ការ​ធ្វើ​ប្រជាមតិ​មួយ ដែល​មិន​មាន​អ្នក​ចូលរួម​ច្រើន ដោយ​បើក​ឱកាស​ឲ្យ​មាន​ការ​បោះឆ្នោត​សម្រាប់​នីតិកាល​នៅ​ថ្ងៃ​ទី១៧ ខែ​ធ្នូ។

គណបក្ស​នយោបាយ​ភាគ​ច្រើន​កំពុង​ធ្វើ​ពហិការ​ការ​ឆ្នោត​នេះ ដោយ​និយាយ​ថា សភា​ថ្មី​មិន​មាន​អំណាច​ និង​បាន​ទម្លាក់​កំហុស​លើ​នីតិវិធី​ចេញ​ដោយ​ប្រធានាធិបតី​ ដែល​រួម​មាន​ការ​ដាក់​គណៈកម្មាធិការ​បោះឆ្នោតក្រោម​សមត្ថកិច្ច​របស់​លោក។

លោក Taboubi បាន​លើកឡើង​ថា ការ​បោះឆ្នោតនៅ​ខែ​ធ្នូនេះ​នឹង​ «មិន​មាន​ពណ៌​និង​រសជាតិ» ជា​លទ្ធផល​នៃ​រដ្ឋ​ធម្មនុញ្ញ​របស់​លោក Saied ហើយ​ការ​បោះឆ្នោត​ខ្វះ​ឯកភាព​ជាតិ។

ក្រុម​អ្នក​រិះគន់​ប្រធានាធិបតី​បាន​ពណ៌នា​ចំណាត់ការ​របស់​លោក​ប្រធានាធិបតី​ថា​ជា រដ្ឋប្រហារ​មួយ និង​បាន​ធ្វើ​បាតុកម្ម​តវ៉ា​តាម​ដងផ្លូវ​ជា​បន្តបន្ទាប់។ លោក Saied និយាយ​ថា ទង្វើ​របស់​លោក​គឺ​ចាំបាច់​ត្រូវធ្វើ​ដើម្បី​ជួយ​សង្រ្គោះ​ប្រទេស​ទុយនីស៊ី។

ទោះបី​ជា​សហជីព UGTT ពី​មុន​មក​ធ្លាប់​បាន​បង្ហាញ​ការ​ព្រួយបារម្ភ​ក៏​ដោយ ក៏​សហជីព​នេះ​មិន​បាន​ធ្វើ​ការ​ប្រឆាំង​នឹង​របៀបវារៈ​របស់​លោក​ Saied ដោយ​បើកចំហ​នោះ​ទេ លើកលែង​តែ​កូដកម្ម​មួយ​នៅ​រដូវ​ក្តៅ ពាក់ព័ន្ធ​នឹង​ប្រាក់​ឈ្នួល​និង​ការ​កាត់បន្ថយ​ការ​ចំណាយ​តែ​ប៉ុណ្ណោះ៕

ប្រែសម្រួល​ដោយ​លោក ណឹម សុភ័ក្រ្តបញ្ញា