ប្រធានាធិបតីអាមេរិក លោក ដូណាល់ ត្រាំ នឹងមិនកែប្រែចិត្តចំពោះការដកកងកម្លាំងអាមេរិកចេញពីប្រទេសស៊ីរីនោះទេ។ នេះបើយោងតាមការបញ្ជាក់របស់នាយខុទ្ទកាល័យស្តីទីរបស់លោកកាលពីថ្ងៃអាទិត្យ។
លោក Mick Mulvaney បានថ្លែងប្រាប់បណ្តាញសារព័ត៌មាន ABC ក្នុងកម្មវិធី This Week ថា «ខ្ញុំគិតថា លោកប្រធានាធិបតីបានប្រាប់ដល់ប្រជាពលរដ្ឋតាំងពីដំបូងម៉្លេះថាលោកមិនចង់ដាក់កងកម្លាំងអាមេរិកក្នុងប្រទេសស៊ីរីជារៀងរហូតនោះទេ។ ហើយនេះគឺជាសមិទ្ធផលក្រោយពីការងាររបស់លោកបានដំណើរការអស់រយៈពេលពីរឆ្នាំ»។
នៅពេលសួរអំពីការលាលែងពីតំណែងរបស់លោក Jim Mattis រដ្ឋមន្ត្រីក្រសួងការពារប្រទេសនិងលោក Brett McGurk ដែលជាបេសកជនពិសេសរបស់អាមេរិកប្រចាំនៅក្រុមសម្ព័ន្ធមិត្តសកលប្រឆាំងនឹងក្រុមរដ្ឋឥស្លាម លោក Mulvaney បានឆ្លើយថា «នេះមិនមែនជារឿងមិនធម្មតានោះទេ» សម្រាប់សមាជិកគណៈរដ្ឋមន្ត្រីលាលែងពីតំណែងចំពោះការមិនព្រមព្រៀងគ្នារបៀបនេះនោះ។
ការលាលែងពីតំណែងរបស់លោក McGurk និងលោក Mattis ត្រូវបានធ្វើឡើង បន្ទាប់ពីលោក ត្រាំ បានប្រកាសកាលពីសប្តាហ៍មុនថា ក្រុមរដ្ឋឥស្លាមត្រូវបានកម្ចាត់ហើយ ហើយថាកងកម្លាំងរបស់អាមេរិកចំនួន២០០០នាក់ក្នុងប្រទេសស៊ីរីនឹងត្រូវដកត្រឡប់មកកាន់សហរដ្ឋអាមេរិកវិញ។
ដោយថ្លែងពីប្រទេសឆាដ កាលពីថ្ងៃអាទិត្យ ប្រធានាធិបតីបារាំង លោក Emmanuel Macron បាននិយាយថា លោក «មានការសោកស្តាយយ៉ាងខ្លាំង» ចំពោះការសម្រេចចិត្តរបស់លោក ត្រាំ ក្នុងការដកកងកម្លាំងពីប្រទេសស៊ីរីនោះ។
លោកបានថ្លែងថា «ជាសម្ព័ន្ធមិត្តនឹងគ្នាគឺត្រូវប្រយុទ្ធកៀកស្មានឹងគ្នា ហើយលោកក៏សម្តែងការគោរពចំពោះលោករដ្ឋមន្ត្រី Mattis ដែលនឹងចេញពីតំណែង ដែលលោកប្រធានាធិបតី Macron ហៅលោកថា «ជាដៃគូដ៏គួរឲ្យទុកចិត្តមួយរូប»៕
