លោកដូណាល់ ត្រាំ (Donald Trump) ប្រធានាធិបតីជាប់ឆ្នោតរបស់សហរដ្ឋអាមេរិកនិយាយថា លោកនឹងនិរទេសជនអន្តោប្រវេសន៍ ដែលគ្មានឯកសារត្រឹមត្រូវពី២លានទៅ៣លាន នាក់ ដែលមានប្រវត្តិឧក្រិដ្ឋកម្មនៅពេលដែលលោកកាន់ដំណែងជាប្រធានាធិបតី ហើយរក្សាពាក្យសន្យារបស់លោកនៅពេលធ្វើយុទ្ធនាការឃោសនាបោះឆ្នោតដែលលោកបានសន្យាថា នឹងស្ថាបនារបងនៅតាមបណ្តោយព្រំដែនរវាងសហរដ្ឋអាមេរិកនិងប្រទេសម៉ិចស៊ិច ដើម្បីរារាំងជនចំណាកស្រុកខុសច្បាប់មិនឲ្យចូលក្នុងសហរដ្ឋអាមេរិក។
លោកប្រធានាធិបតីជាប់ឆ្នោត Donald Trump បានប្រាប់បណ្តាញទូរទស្សន៍ CBS ក្នុងកម្មវិធី 60 នាទីថា «អ្វីដែលយើងកំពុងធ្វើគឺ ធ្វើឲ្យមនុស្សមានប្រវត្តិខាងឧក្រិដ្ឋកម្ម ដូចជាសមាជិកក្រុមអ្នកលេង មេជួញដូរថ្នាំញៀន ដែលមនុស្សទាំងនោះមានប្រហែល២លាននាក់ ឬអាចមានចំនួន៣លាននាក់ ដែលយើងនឹងយកពួកគេចេញពីប្រទេសរបស់យើង ឬយើងនឹងដាក់គុកពួកគេ។ ក៏ប៉ុន្តែ យើងនឹងយកពួកគេចេញពីប្រទេសរបស់យើង ពួកគេមកនៅទីនេះខុសច្បាប់»។
ក្នុងការដកស្រង់ចេញសម្ភាសន៍មួយដែលបានចេញផ្សាយមុនពេលការចេញនៅយប់ថ្ងៃអាទិត្យរបស់បណ្តាញទូរទស្សន៍នោះ លោក Trump បាននិយាយថា លោកមានគោលបំណងស្ថាបនារបង ដែលជាការសន្យាក្នុងពេលយុទ្ធនាការឃោសនាបោះឆ្នោតបានទទួលការគាំទ្រយ៉ាងខ្លាំងពីពួកអ្នកគាំទ្ររបស់លោក។ ក៏ប៉ុន្តែ ផ្នែកមួយនៃឧបសគ្គនោះ ប្រហែលជាការសាងសង់របងនោះ។
មហាសេដ្ឋីអចលនទ្រព្យ ដែលនិយាយមិនសំចៃមាត់ បាននិយាយថា «ខ្ញុំធ្វើកិច្ចការបានល្អលើបញ្ហាអ្វីដែលហៅថា ការសាងសង់របង»។ លោកបានសន្យានឹងធ្វើឲ្យប្រទេសម៉ិចស៊ិចបង់ប្រាក់ថ្លៃរបងនៅតាមព្រំដែននោះ ក៏ប៉ុន្តែ ប្រទេសជិតខាងភាគខាងត្បូងរបស់សហរដ្ឋអាមេរិកនោះនិយាយថា ខ្លួននឹងមិនបង់ប្រាក់សម្រាប់ការស្ថាបនារបងនៅតាមព្រំដែននោះ។
និយាយរួម ជនអន្តោប្រវេសន៍គ្មានឯកសារប្រហែល១១លាននាក់ រស់នៅក្នុងសហរដ្ឋអាមេរិក ក៏ប៉ុន្តែ លោក Trump បាននិយាយថា បន្ទាប់ពីព្រំដែនបានការពារហើយក្រុមមុនដំបូងនៃជនអន្តោប្រវេសន៍ដែលរំលោភច្បាប់ត្រូវបាននិរទេសខ្លួន រដ្ឋាភិបាលរបស់លោក នឹងសម្រេចពីអ្វីដែលត្រូវធ្វើបន្ទាប់ចំពោះជនចំណាកស្រុកដែលគ្មានឯកសារនៅសេសសល់រាប់លាននាក់ទៀត ដែលកំពុងរស់នៅក្នុងសហរដ្ឋអាមេរិកនោះ៕
