ប្រធានាធិបតីជាប់ឆ្នោតរបស់អាមេរិកលោក Donald Trump កំពុងជួបជាមួយក្រុមធ្វើការផ្លាស់ប្តូរគណរដ្ឋមន្ត្រីរបស់សេតវិមាន នៅក្នុងថ្ងៃទី២ ក្នុងខណៈពេលដែលពួកគេកំពុងព្យាយាមបំពេញតំណែងគណៈរដ្ឋមន្ត្រីនិងតំណែងរដ្ឋបាលកំពូលផ្សេងទៀតផងដែរនោះ។
មុខតំណែងជានាយកខុទ្ទកាល័យសេតវិមាន ដែលគ្រប់គ្រងទៅលើការិយាល័យប្រតិបត្តិរបស់ប្រធានាធិបតី ត្រូវបានគេរំពឹងថាមានសារៈសំខាន់ខ្លាំងនៅក្នុងរដ្ឋបាលរបស់លោក Trump ដោយសារតែលោក Trump មិនមានបទពិសោធន៍តាក់តែងគោលនយោបាយហើយខ្វះទំនាក់ទំនងជាមួយនឹងអ្នកមានអំណាចមួយចំនួននៅក្នុងជួររដ្ឋាភិបាលក្រុងវ៉ាស៊ីនតោន។
ប្រធានគណកម្មាធិការជាតិរបស់គណបក្សសាធារណរដ្ឋលោក Reince Priebus ត្រូវបានគេលើកឡើងថា កំពុងត្រូវបានពិចារណាថានឹងប្រគល់មុខតំណែងនេះដល់លោក ដូចគ្នាជាមួយនឹងលោក Stephen Bannon ប្រធានយុទ្ធនាការរបស់លោក Trumpផងដែរ។
លោក Trump បានថ្លែងនៅក្នុងសេចក្តីថ្លែងការណ៍មួយចេញកាលពីថ្ងៃសុក្រថា ក្រុមរបស់លោកកំពុងស្វែងរកក្រុមមេដឹកនាំដែលជោគជ័យនិងសាកសមបំផុតដែលនឹងអាចអនុម័តរបៀបវីរៈនៃការផ្លាស់ប្តូរនានានៅក្នុងជួររដ្ឋាភិបាលក្រុងវ៉ាស៊ីនតោន។
លោក Trump បានតែងតាំងលោក Mike Pence ដែលជាអនុប្រធានាធិបតីរបស់លោក ឲ្យគ្រប់គ្រងទៅលើក្រុមធ្វើការផ្លាស់ប្តូរគណៈរដ្ឋមន្ត្រី ជំនួសឲ្យលោក Chris Chistie។
កូនទាំងបីរបស់លោក Trump ហើយនិងកូនប្រសារប្រុសរបស់លោកគឺលោក Jared Kushner ក៏ត្រូវបានរាប់បញ្ចូលទៅក្នុងគណៈកម្មាធិកាប្រតិបត្តិដែលមានសមាជិក១៦នាក់នេះផងដែរ ដែលការសម្រេចចិត្តនេះអាចនឹងធ្វើឲ្យមានការព្រួយបារម្ភជុំវិញទំនាស់ផលប្រយោជន៍។
សមាជិកផ្សេងទៀតរបស់គណកម្មាធិកាប្រតិបត្តិនៃក្រុមផ្លាស់ប្តូរគណៈរដ្ឋមន្ត្រីនេះរួមមានលោកសមាជិកព្រឹទ្ធសភា Jeff Sessions អតីតអភិបាលរដ្ឋ New York លោក Rudolph Giuliani អតីតប្រធានសភាលោក Newt Gingrich នាយឧត្តមសេនីយ៍ទោចូលនិវត្តន៍លោក Michael Flynn និងអតីតបេក្ខជនប្រធានាធិបតីខាងគណបក្សសាធារណរដ្ឋលោក Ben Carson។ អ្នកទាំងអស់នេះគឺសុទ្ធតែកំពុងត្រូវបានពិចារណាឲ្យចូលកាន់មុខតំណែងកំពូលណាមួយនៅក្នុងរដ្ឋបាលរបស់លោក Trump។
ក្នុងពេលជាមួយគ្នានេះដែរ ក្រុមនេះមានតួនាទីត្រូវបំពេញមុខតំណែងគណៈរដ្ឋមន្ត្រីចំនួន១៥ និងតួនាទីចំនួនប្រហែល១០០០កន្លែងទៀតដែលត្រូវអនុម័តដោយព្រឹទ្ធសភា៕
