ភ្ជាប់​ទៅ​គេហទំព័រ​ទាក់ទង

លោក​ប្រធានាធិបតី​ ដូណាល់​​ ត្រាំ​ បំពេញ​ទស្សន​កិច្ច​ទី​បញ្ជាការ​កណ្តាល​កងទ័ព


លោក ដូណាល់ ត្រាំ ចូលរួម​ក្នុង​ការ​ទទួល​ទាន​អាហារ​ថ្ងៃ​ត្រង់​ជាមួយ​កង​យោធា​ក្នុង​ពេល​ធ្វើ​ទស្សនកិច្ច​ទៅ​កាន់ CENTCOM កាល​ពី​ថ្ងៃចន្ទ។

លោក​ប្រធានា​ធិបតី​សហរដ្ឋ​អាមេរិក ​ដូណាល់ ​ត្រាំ ​បាន​សន្យា​ផ្តល់​ការ​គាំទ្រ​យ៉ាង​ពេញ​ទំហឹង​ដល់​កងទ័ព​នៅ​ក្នុង​សុន្ទរកថា​មួយ​ទៅ​កាន់​ពួក​កងទ័ព​ ខណៈ​ដែល​លោក​បំពេញ​ទស្សនកិច្ចនៅ​ទីបញ្ជាការ​កណ្តាល​សហរដ្ឋ​អាមេរិក​ឬ ​CENTCOM​ នៅ​ឯ​មូលដ្ឋាន​ទ័ព​អាកាស ​MacDill ​នៅ​ក្នុង​ទីក្រុង​តាំប៉ា ​រដ្ឋផ្លរីដា។

លោក​ប្រធានា​ធិបតី​ ត្រាំ ​បាន​មាន​ប្រសាសន៍​ថា៖ «យើង​នឹង​គាំទ្រ​អស់​លោក ​អ្នក​១០០​ភាគរយ។​យើង​នឹង​ការពារ​អ្នក​ទាំង​ឡាយ​ណា​ដែល​ការពារ​យើង​ហើយយើង​នឹង​មិន​ធ្វើ​ឲ្យ​អស់​លោក ​អ្នក ​ខក​ចិត្ត​ទេ‍»។

ក្នុង​សុន្ទរកថា​ដ៏​ខ្លី​មួយ​បន្ទាប់​ពី​ការ​ទទួល​ទាន​អាហារ​ថ្ងៃ​ត្រង់​ជាមួយ​បុគ្គលិក​យោធា លោក​ប្រធានា​ធិបតី​ ត្រាំ ​បាន​សម្តែង​នូវ​ការ​គាំទ្រ​យ៉ាង​ខ្លាំង​ដល់​អង្គការ​អូតង់ ក៏ប៉ុន្តែ ​លោក​ប្រធានា​ធិបតី​ ​មាន​ប្រសាសន៍​បន្ត​ទៀត​ថា៖ «យើងសុំ​តែ​ម្យ៉ាង​គត់​ថា ​សមាជិក​ទាំង​អស់​របស់​អង្គការ​អូតង់​ត្រូវរួមវិភាគ​ទាន​ប្រាក់​ឲ្យ​បាន​ពេញ​លេញ​និង​សម​ស្រប‍»។

លោក​ប្រធានា​ធិបតី​ក៏​បាន​និយាយ​ប្រឆាំង​ក្រុមរដ្ឋ​ឥស្លាម​ដែរ​ ដែលលោក​បាន​មាន​ប្រសាសន៍​ថា ​ក្រុម​រដ្ឋ​ឥស្លាម​កំពុង​ប្រព្រឹត្ត​អំពើ​ប្រល័យ​ពូជសាសន៍​នៅ​ទូទាំង​សាកល​លោក។ ដោយ​មិន​និយាយ​ចំៗ​ពី​បទបញ្ជា​ប្រធានាធិបតី​ដែល​លោក​បាន​ចុះ​ហត្ថលេខា​កាល​ពី​សប្តាហ៍​កន្លង​មក​ដែល​កម្រិត​ជន​អន្តោ​ប្រវេសន៍​ចូល​ក្នុង​សហរដ្ឋ​អាមេរិក ​លោក​ប្រធានា​ធិបតី ​ត្រាំ ​បាន​មាន​ប្រសាសន៍​ថា ​លោក​បាន​ធ្វើ​ការហើយ​នឹង​បន្ត​ធ្វើ​ការ​ដើម្បី​ធ្វើ​ឲ្យ​ពួក​ក្រុម​រដ្ឋ​ឥស្លាម​ជ្រុល​និយម​ស្ថិត​នៅ​ក្រៅ​សហរដ្ឋ​អាមេរិក។

ប្រធានា​ធិបតី​ ត្រាំ ​ក៏​នឹង​ទទួលបាន​នូវ​ការ​ផ្តល់​ព័ត៌មានសង្ខេប​ក្នុង​ដំណើរ​បំពេញ​ទស្សនកិច្ច​នៅ​ CENTCOM​ ដែល​ជា​ដំណើរ​ទស្សនកិច្ច​ជាសាធារណៈ​លើក​ដំបូង​របស់​លោក​ជា​មួយ​កងទ័ព​ចាប់​តាំង​ពី​លោក​ចូលកាន់​ដំណែង​នៅ​ខែ​មករា​មក។

ទី​បញ្ជាការ​ CENTCOM ​បញ្ជា​កិច្ច​ប្រតិបត្តិការ​ និង​សកម្មភាព​យោធា​ជាមួយ​សម្ព័ន្ធមិត្ត​និង​ដៃ​គូ​នានា​ដើម្បី​បង្កើន​សន្តិសុខនៅ​ក្នុង​តំបន់​មជ្ឈិមបូពារ​ និង​តំបន់​អាស៊ី​កណ្តាល៕

XS
SM
MD
LG