ភ្ជាប់​ទៅ​គេហទំព័រ​ទាក់ទង

កងកម្លាំង​ពិសេស​ចាប់​ជន​សង្ស័យ​ក្នុង​ការ​វាយប្រហារ​ក្នុង​ក្រុង Benghazi


បុរស​ម្នាក់​ឈរ​នៅ​ក្បែរ​អគារ​បែកបាក់​នៅ​ក្នុង​ក្រុង Sabri ស្រុក Benghazi ប្រទេស​លីប៊ី កាលពី​ថ្ងៃទី១៥ ខែសីហា​ ឆ្នាំ២០១៧។

ប្រធានាធិបតី​ស.រ.អា. Donald Trump បាន​និយាយ​ថា​ កងកម្លាំង​ពិសេស​ស.រ.អា.​ចាប់​បាន​ជន​សកម្មប្រយុទ្ធ​ម្នាក់​មាន​ទាក់ទិន​នឹង​ការ​វាយ​ប្រហារ​ដ៏​ប្រល័យ​កាល​ពី​ឆ្នាំ២០១២​លើ​ស្ថាន​កុងស៊ុល​ស.រ.អា.​ក្នុង​ក្រុង​ Benghazi ប្រទេស​លីប៊ី។​

លោក Trump បាន​និយាយ​នៅ​ក្នុង​សេចក្តី​ថ្លែងការណ៍​មួយ​ពី​សេតវិមាន​ថា «ការ​ចង​ចាំ​របស់​យើង​មានរយៈពេល​យូរ​ហើយ​ការ​ទៅ​ដល់​របស់​យើង​មាន​វែង​ឆ្ងាយ​ហើយ​យើង​នឹង​មិន​ឈប់​សម្រាក​ទេ​នៅ​ក្នុង​កិច្ចខិតខំ​ប្រឹងប្រែង​របស់​យើង​ដើម្បី​ស្វែង​រក​ និង​នាំ​ខ្លួន​ពួក​ជន​ប្រព្រឹត្តបទ​ឧក្រិដ្ឋ​នៃ​ការ​វាយ​ប្រហារដ៏​សាហាវ​យង់ឃ្នង​នៅ​ក្នុង​ក្រុង​ Benghazi ទៅ​ឱ្យ​តុលាការ​កាត់ទោស»។

លោក​ប្រធានាធិបតី Trump បាន​ថ្លែង​ថា​គាត់​បាន​អនុញ្ញាត​ឱ្យ​មាន​កិច្ចប្រតិបត្តិការ​ដែល​នាំ​ទៅ​កាន់​ការ​ចាប់​ខ្លួន​ឈ្មោះ Musrafa al-Imam នៅ​ក្នុង​ក្រុង​ Misrata នៅ​ជាប់​ឆ្នេរ​សមុទ្រ​ខាង​ជើង​នៃ​ប្រទេស​លីប៊ី។​

គ្មាន​សេចក្តី​ល្អិតល្អន់នៃ​កិច្ច​ប្រតិបត្តិការនេះ​ទេ។​ ឈ្មោះ Al-Imam កំពុង​ស្ថិត​ក្នុង​ការ​ឃុំឃាំង​របស់​ស.រ.អា. ហើយ​កំពុង​ត្រូវ​នាំ​ខ្លួន​មក​កាន់​ប្រទេស​អាមេរិក​ដើម្បី​កាត់​ទោស។

លោក​ប្រធានាធិបតី​ Trump បាន​និយាយ​ថា «ស.រ.អា.​នឹង​បន្ត​គាំទ្រ​ពួក​ដៃ​គូ​លីប៊ី​របស់​យើង​ដើម្បី​ធ្វើ​ឱ្យ​ប្រាកដ​ប្រជា​ថា​ពួក ISIS និង​ពួក​ភេរវជន​ឯ​ទៀតៗ​មិន​ប្រើប្រាស់​ប្រទេស​លីប៊ី​ជា​កន្លែង​ជ្រក​កោន​សុខ​សាន្ត​ដើម្បី​ធ្វើការ​វាយ​ប្រហារ​ប្រឆាំង​នឹង​ពួក​ពលរដ្ឋ​ និង​អត្ថប្រយោជន៍​ស.រ.អា. ជន​ជាតិ​លីប៊ី និង​មនុស្ស​ឯទៀតៗ»។

ការ​វាយ​ប្រហារ​កាល​ពី​ថ្ងៃ​ទី១១ខែ​កញ្ញា​ឆ្នាំ២០១២​លើ​អាគារ​ការទូត​ស.រ.អា.​មាន​កំផែង​ព័ទ្ធជុំវិញ​ក្នុង​ក្រុង​ Benghazi ដោយ​ពួក​ជន​សកម្មប្រយុទ្ធ​ឥស្លាម​បាន​បណ្តាល​ឱ្យ​លោក​ឯកអគ្គរដ្ឋទូត​ស.រ.អា. Christopher Stevens និង​ជន​ជាតិ​អាមេរិកាំង​បី​នាក់ទៀត​បាត់បង់​ជីវិត៕

XS
SM
MD
LG