ទីភ្នាក់ងារព័ត៌មាន AP រាយការណ៍កាលពីថ្ងៃចន្ទថា ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) កំពុងខិតខំទាញត្រឡប់មកវិញនូវពាក្យសម្ដីដែលទំនងជាការទទួលស្គាល់ការឈ្នះឆ្នោតរបស់គូប្រជែងលោកគឺលោក ចូ បៃដិន (Joe Biden) នោះ ដោយលោក ត្រាំ បញ្ជាក់ច្បាស់ថា លោកនឹងព្យាយាមធ្វើឲ្យលទ្ធផលបោះឆ្នោតប្រែប្រួលវិញ។
កាលថ្ងៃអាទិត្យ លោក ត្រាំ បានផ្តល់ឲ្យអ្នករិះគន់និងអ្នកគាំទ្រជាច្រើននូវក្តីសង្ឃឹមថា សេតវិមានបានត្រៀមខ្លួនធ្វើការងារជាមួយក្រុមអន្តរកាលរបស់លោក Biden ប៉ុន្តែក្រោយមកលោក ត្រាំ បញ្ជាក់ថា មិនដូច្នេះទេ។
ដោយមិនបញ្ចេញឈ្មោះលោក Biden នោះក្នុងសារនោះលោកត្រាំនិយាយថា «គាត់ឈ្នះ» នៅក្នុងសារមួយដែលបានបង្ហោះក្នុងបណ្តាញ Twitter ដោយលោកចោទប្រកាន់ដោយគ្មានមូលដ្ឋានអំពីការបន្លំសន្លឹកឆ្នោតនោះ។
ប៉ុន្តែ នៅពេលលោកប្រធានាធីបតី ត្រាំ បានឃើញសាររបស់លោកត្រូវបានគេបកស្រាយខុសថា លោកទទួលស្គាល់ពីជ័យជម្នះរបស់លោក Biden នោះ លោក ត្រាំ បានប្រកាសទាត់ចោលភ្លាមៗនូវការបកស្រាយនោះ។
លោកត្រាំបានបង្ហោះសារបកស្រាយថា៖ «លោក Biden ជាអ្នកឈ្នះឆ្នោតតែក្នុងក្រសែភ្នែកនៃប្រព័ន្ធផ្សព្វផ្សាយក្លែងក្លាយប៉ុណ្ណោះ។ ខ្ញុំមិនបានប្រកាសទទួលការចាញ់អ្វីទាំងអស់។ យើងមានដំណើរផ្លូវទៅមុខឆ្ងាយទៀត។ នេះជាការបោះឆ្នោតមួយ ដែលមានការលួចបន្លំ»។
អតីតប្រធានាធិបតីសហរដ្ឋអាមេរិកលោក បារ៉ាក់ អូបាម៉ា (Barack Obama) ក្នុងបទសម្ភាសន៍មួយដែលត្រូវបានចាក់ផ្សាយកាលពីថ្ងៃអាទិត្យ ក្នុងកម្មវិធីដែលមានឈ្មោះថា «៦០នាទី» (60 Minutes) របស់ទូរទស្សន៍ CBS បានលើកឡើងថា លោកសូមរំឭកដល់លោក ត្រាំ ថា ក្នុងនាមជាប្រធានាធិបតី លោកជាមន្ត្រីរដ្ឋការសាធារណៈមួយរូប និងជាអ្នកកាន់កាប់តួនាទីដឹកនាំបណ្តោះអាសន្នតែប៉ុណ្ណោះ។
ក្នុងរយៈពេលប៉ុន្មានថ្ងៃចុងក្រោយនេះ លោក ត្រាំ ហាក់កាន់តែខិតជិតទៅរកការទទួលស្គាល់នៃភាពបរាជ័យរបស់លោក។ ក្នុងការថ្លែងមួយនៅសេតវិមាន កាលពីថ្ងៃសុក្រសប្តាហ៍មុន ជុំវិញវ៉ាក់សាំងការពារជំងឹកូវីដ១៩ នោះ លោក ត្រាំ លើកឡើងថា រដ្ឋបាលរបស់លោកនឹងមិនបិទសកម្មភាព ដើម្បីធ្វើការទប់ស្កាត់ការរីករាលដាលជំងឺកូវីដ១៩ នោះឡើយ។
លោកបន្ថែមថា៖ «អ្វីក៏ដោយដែលនឹងកើតមានឡើងក្នុងពេលអនាគត ហើយ តើវាជារដ្ឋបាលរបស់អ្នកណានោះ ខ្ញុំគិតថា មានតែពេលវេលាទេ ជាអ្នកដឹង»៕
